ന്യൂദല്ഹി : കോണ്ഗ്രസ് നേതാവ് രാഹുല് ഗാന്ധിക്കെതിരെ ബീഹാര് ഉപമുഖ്യമന്ത്രി സുശീല് കുമാര് മോദി നല്കിയ അപകീര്ത്തി കേസില് ഇന്ന് പാട്ന കോടതിയില് ഹാജരാകും. മോദിയെന്ന് ജാതിപ്പേരുള്ള എല്ലാവരും കള്ളന്മാരാണെന്ന് കര്ണാടകയില് നടത്തിയ പ്രസംഗത്തിനെതിരെയാണ് കേസ്.
കര്ണാടകയിലെ കോളാറില് തെരഞ്ഞെടുപ്പ് റാലിക്കിടെ രാഹുല് നടത്തിയ പരാമര്ശത്തിനെതിരെയാണ് പട്ന സിജെഎം കോടതിയില് സുശീല് കുമാര് മോദി കേസ് നല്കിയത്. ഏപ്രില് പതിമൂന്നിന് നടത്തിയ പ്രസംഗത്തില് നീരവ് മോദിയെയും ലളിത് മോദിയെയും പ്രധാനമന്ത്രി നരേന്ദ്ര മോദിയെയും പേരെടുത്ത പറഞ്ഞായിരുന്നു രാഹുലിന്റെ വിമര്ശനം.
തെരഞ്ഞെടുപ്പ് ലക്ഷ്യം വെച്ചുള്ള പ്രസംഗങ്ങളില് ഇത്തരത്തില് വിവാദ പരാമര്ശങ്ങള് നടത്തിയതിന് അഞ്ച് മാന നഷ്ടക്കേസുകളാണ് വിവിധ കോടതികളിലായി രാഹുലിന്റെ പേരില് ഉള്ളത്. കോണ്ഗ്രസ് അധ്യക്ഷ സ്ഥാനം ഒഴിഞ്ഞത് തന്നെ ഇത്തരം കേസുകളില് ഹാജരാകാനാണെന്ന് സമൂഹ മാധ്യമങ്ങളില് ട്രോളുകളും പുറത്തിറങ്ങിയിട്ടുണ്ട്.
മാധ്യമ പ്രവര്ത്തക ഗൗരി ലങ്കേഷിന്റെ കൊലപാതകത്തിനു പിന്നില് ആര്എസ്എസ് ആണെന്ന വ്യാപ പരാമര്ശത്തില് രാഹുല് കഴിഞ്ഞ ദിവസം മുംബൈ കോടതിയില് ഹാജരായിരുന്നു. ബാക്കിയുള്ള കേസുകളിലെ വിചാരണയ്ക്കായി വരും ആഴ്ചകളിലും ഹാജരാകും.
