തിരുവനന്തപുരം : ഓര്ത്തഡോക്സ് – യാക്കോബായ സഭാതര്ക്കവുമായി ബന്ധപ്പെട്ട കോടതിവിധി സമവായത്തിലൂടെ നടപ്പാക്കുമെന്ന് മുഖ്യമന്ത്രി പിണറായി വിജയന്. മലങ്കര സഭാ തര്ക്കത്തില് സംസ്ഥാന സര്ക്കാരിന്റേത് ഒരേ സമീപനമാണെന്നും മുഖ്യമന്ത്രി നിയമസഭയില് അറിയിച്ചു. ആന്റണി ജോണ് എംഎല്എയുടെ സബ്മിഷന് നല്കിയ മറുപടിയിലാണ് ഇക്കാര്യം അറിയിച്ചത്.
സുപ്രീംകോടതി വിധി നടപ്പാക്കാന് സര്ക്കാര് പ്രതിജ്ഞാബദ്ധമാണ്. സമവായത്തിലൂടെ വിധി നടപ്പാക്കാനാണ് സര്ക്കാരിന്റെ ശ്രമമെന്നും മുഖ്യമന്ത്രി നിയമസഭയില് പറഞ്ഞു.
വിധി നടപ്പാക്കുമ്പോള് പള്ളി പൂട്ടാനോ ക്രമസമാധാന പ്രശ്നമുണ്ടാകാനോ പാടില്ലെന്ന് വിധിയില് പറയുന്നുണ്ടെന്ന് മുഖ്യമന്ത്രി ചൂണ്ടിക്കാട്ടി. രണ്ടുസഭയും പിന്തുടരുന്ന വിശുദ്ധ മതത്തിന്റെ പാവനതയ്ക്ക് വേണ്ടിയും സ്ഥാപനത്തിന്റെ ജീര്ണത ഒഴിവാക്കാനായി തര്ക്കവും അനിഷ്ട സംഭവങ്ങളും തുടരാതിരിക്കാനായും ഒരു പൊതു വേദിയില് പ്രശ്ന പരിഹാരത്തിന് ശ്രമിക്കുകയാണ് വേണ്ടതെന്ന് മുഖ്യമന്ത്രി മറുപടിയില് പറയുന്നു.
ശബരിമല വിഷയത്തില് സംസ്ഥാന സര്ക്കാര് വിധി നടപ്പാക്കാന് കാട്ടിയ തിടുക്കം പള്ളിത്തര്ക്ക കേസുകളില് അത് കാലതാമസവും വരുത്തുന്നതിനെതിരെ എറെ വിമര്ശനം ഉയര്ന്നിരുന്നു. കൂടാതെ ഓര്ത്തഡോക്സ് സഭയ്ക്ക് അനുകൂലമായ കോടതി വിധി നടപ്പാക്കാന് വൈകുന്നതില് സംസ്ഥാന സര്ക്കാരിനെ സുപ്രീംകോടതി രൂക്ഷമായി വിമര്ശിച്ചിരുന്നു.
കട്ടച്ചിറ- വാരിക്കോലി പള്ളികള് നല്കിയ ഹര്ജികള് പരിഗണിക്കുമ്പോഴായിരുന്നു വിമര്ശനം. കേരള സര്ക്കാര് നിയമത്തിന് മുകളിലാണോ എന്ന് കോടതി ചോദിച്ചു. കോടതി വിധി മറികടക്കാന് ശ്രമിച്ചാല് ചീഫ് സെക്രട്ടറിയെ വിളിച്ച് വരുത്തി ജയിലില് അടയ്ക്കുമെന്നും ജസ്റ്റിസ് അരുണ് മിശ്ര മുന്നറിയിപ്പ് നല്കിയിരുന്നു.
അതേസമയം സുപ്രീംകോടതി വിധി നടപ്പാക്കിയില്ലെങ്കില് സര്ക്കാരിനെതിരെ കോടതിയലക്ഷ്യത്തിന് പരാതി നല്കുമെന്ന് ഓര്ത്തഡോക്സ് സഭയും അറിയിച്ചിട്ടുണ്ട്. സഭയ്ക്ക് അനുകൂലമായ വിധി വന്നിട്ടും നടപ്പാക്കിത്തരേണ്ടവര് അത് ചെയ്യുന്നില്ല. പിറവം പള്ളിയുടെ കാര്യത്തില് തെരഞ്ഞെടുപ്പ് സമയത്ത് നല്കിയ വാഗ്ദാനങ്ങളൊന്നും എല്ഡിഎഫ് പാലിച്ചില്ലെന്നും സഭ കുറ്റപ്പെടുത്തി.
