2018 ലെ യൂജിസി ശമ്പളപരിഷ്കരണം കേരളത്തില് നടപ്പാക്കാന് സര്ക്കാര് തീരുമാനിച്ചതോടെ ഇവിടുത്തെ ഉന്നതവിദ്യാഭ്യാസം രക്ഷപെട്ടുവെന്ന് ആരെങ്കിലും കരുതുന്നുവെങ്കില് തെറ്റി. ശമ്പളപരിഷ്കരണം എന്ന ഒറ്റ കാര്യത്തിനാണ് സകല അധ്യാപക സംഘടനകളും ഇക്കാലമത്രയും മുറവിളികൂട്ടിയതെന്ന് ആരും തെറ്റിദ്ധരിക്കേണ്ട. കഴിഞ്ഞ ശമ്പളപരിഷ്കരണകാലം തൊട്ടു കോളേജ് അധ്യാപകസംഘടനകള്ക്ക് ഒരൊറ്റ അജണ്ട മാത്രമേയുണ്ടായിരുന്നുള്ളൂ. നിയമത്തില് ഒന്ന് വെള്ളം ചേര്ത്തുകിട്ടുക. എന്തിനാണെന്നല്ലേ? സര്വകലാശാലകളുടെ ഭരണതലപ്പത്തു കയറിപ്പറ്റാന്.
വൈസ്ചാന്സലര് ആകാന് 10 വര്ഷം പ്രൊഫസര് ആയിരിക്കുക എന്നതുതന്നെ ആദ്യത്തെ കടമ്പ. അത് മുതലെടുത്തത് സര്വകലാശാല അധ്യാപകസംഘടനാ തൊഴിലാളി വര്ഗമായിരുന്നു. മിക്കവാറും ഇതുവരെ നിയമിതനായവര് എല്ലാം സര്വകലാശാ അധ്യാപകസംഘടനാ നേതാക്കളോ അല്ലെങ്കില് അവര് ഇടപെട്ട് നേടിക്കൊടുത്തവരോ ആയിരുന്നു.
മുമ്പുണ്ടായിരുന്ന പ്രഗത്ഭരായ പലരുടെയും ഏഴയലത്തുനില്ക്കാന് കെല്പ്പുള്ള ആരെങ്കിലും ഇപ്പോള് ഈ ഉന്നതസ്ഥാനങ്ങളില് എത്തിയിട്ടുണ്ടോ? എത്തിയവരോ, സാങ്കേതികമായി യോഗ്യതയുള്ളവരാകാം. അതിനപ്പുറം സര്വകലാശാലകളെ ഭരിക്കാനുള്ള രാഷ്ട്രീയബോധവും, ധിഷണാശക്തിയും തന്റേടവും ഇതില് എത്രപേര്ക്കുണ്ട്? ഒരുമാസംകൊണ്ട് പതിനായിരങ്ങള് യാത്രാപ്പടിമാത്രം വാങ്ങാന്വരുന്ന ‘പ്രഗത്ഭ’ രാണ് കൂടുതലും. ആഴ്ചകളില് നാലും അഞ്ചും സിന്ഡിക്കറ്റ് കമ്മറ്റികള് ഇവര് സംഘടിപ്പിക്കും. സര്വകലാശാല ജീവനക്കാര് ഗതികേട് കൊണ്ട് ഇതിനൊക്കെ കൂട്ടുനില്ക്കും. നികുതിദായകരുടെ പണമാണ് ഇങ്ങനെ ധൂര്ത്തടിക്കുന്നത്.
2018ലെ യൂജിസി നിയമത്തില് വെള്ളം ചേര്ക്കാമെന്ന ഒരുവിചാരം ഇപ്പോള് അധ്യാപകസംഘടനാ നേതാക്കള്ക്കുണ്ട്. രാഷ്ട്രീയധാര്മികത നഷ്ടപ്പെട്ടു തുടങ്ങിയ ഈ കാലഘട്ടത്തില് ആര്ക്കു എന്ത് പ്രതിബദ്ധത?
അഡ്വ. റോയ് ഡാനിയേല്, വൈറ്റില
അജയ്യനായി മോദി
2014നെ അപേക്ഷിച്ച് 2019ല് കൂടുതല് വോട്ടും, കൂടുതല് സീറ്റുമായി തിളക്കമാര്ന്ന വിജയത്തോടെ രാജ്യത്തിന്റെ രണ്ടാം ഊഴം ഉറപ്പാക്കിയ നരേന്ദ്രമോദി അഭിനന്ദനം അര്ഹിക്കുന്നു. കേരളത്തില് ബിജെപിക്ക് നേരിടേണ്ടിവന്ന തോല്വിയില് അത്ര നിരാശപെടേണ്ട കാര്യമില്ല. ഭദ്രമായ അടിത്തറയും കൈയില് ഭരണവും ഉണ്ടായിട്ടും എല്ഡിഎഫ് സര്ക്കാരിന് നേരിട്ട തോല്വിക്കുമുമ്പില് ബിജെപിയുടെ തോല്വി ഒന്നുമല്ല. എന്നാല് കേരളത്തില് കോണ്ഗ്രസിന്റെ വന്വിജയത്തിന് ശബരിമലവിഷയവും കാരണമാണ്.
മീനാക്ഷിയമ്മ വയനാട്
പൊള്ളയായ മന്ത്രിയുടെ വാദം
ആന്തൂരില് വ്യവസായിയെ ആത്മഹത്യയിലേക്ക് നയിച്ചത് ഒറ്റപ്പെട്ട സംഭവമാണെന്ന മന്ത്രിയുടെ വാദം പൊള്ളയാണ്. ഉദ്യോഗസ്ഥരുടെ നിഷേധാത്മക നിലപാട് മാറ്റിയെടുക്കേണ്ട കാലം അതിക്രമിച്ചുകഴിഞ്ഞു. അപേക്ഷകളും പരാതികളും അദാലത്തുകളും കേവലമൊരു പ്രഹസനമായി. ഫോര് ദി പീപ്പിള്, ഓണ്ലൈന് സംവിധാനം കാര്യക്ഷമമല്ല. അപേക്ഷകരോടും പരാതിക്കാരോടുമുള്ള ധാര്മ്മിക ഉത്തരവാദിത്വം മറക്കരുത്.
വി. വിനോദ്കുമാര്, നറുകര
ഇതാണോ നവോത്ഥാനം
പൗരന്റെ ജീവനുംസ്വത്തിനും സുരക്ഷനല്കേണ്ട പോലീസ് ഓഫീസര് തന്റെ വകുപ്പില് ജോലിചെയ്യുന്ന മൂന്ന് കുരുന്നുകളുടെ മാതാവായ യുവതിയെ പൈശാചികമായി ജീവനോടെ അഗ്നിക്കിരയാക്കി. നവോത്ഥാനം കൊണ്ടുനടക്കുന്ന കേരളസര്ക്കാര് ഇക്കാര്യത്തില് ലജ്ജിക്കണം. സര്ക്കാരിന്റെ പിടിപ്പുകേടും ബൗദ്ധികമായി പോലീസ് തലപ്പത്തിരിക്കാന് കഴിവില്ലാത്ത ഉദ്യോഗസ്ഥരുടെ കഴിവില്ലായ്മയുമാണ് ഈ അരുംകൊലയ്ക്ക് കാരണം. ഇടതുസര്ക്കാര് വന്നതിനുശേഷം എത്രയോ കൊലപാതകങ്ങളാണ് ‘ദൈവത്തിന്റെ സ്വന്തം നാടായ’ കേരളത്തില് നടന്നത്. അതില് എത്ര പ്രതികളെ പിടികൂടാനും ശിക്ഷ ഉറപ്പാക്കാനും നമ്മുടെ പോലീസിന് കഴിഞ്ഞു.
പ്രകാശ് കുറുപ്പ്, കണിച്ചുകുളങ്ങര
കേരളഭരണം ഭയപ്പെടുത്തുന്നു!
പീരുമേട് സബ്ജയിലില് റിമാന്റുപ്രതി രാജ്കുമാര് പോലീസുകാരുടെ ക്രൂരമര്ദ്ദനത്തെ തുടര്ന്ന് മരിച്ച പത്രവാര്ത്ത വായിച്ചു! കേരളത്തിനും സേനയ്ക്കും നാണക്കേട്. പോലീസ് സേനയിലുള്ളവര് ഇത്രമാത്രം അധപ്പതിച്ചതെങ്ങനെ? മനുഷ്യശരീരത്തെ ചവിട്ടിയൊടിക്കുന്ന ഭ്രാന്തന്മാരായ പോലീസുകാരെ സര്വീസില് നിലനിര്ത്തുന്നതെന്തിന്? സംസ്ഥാന സര്ക്കാറിനെ സമൂഹം ഭയക്കുകയാണ്!
ശ്രീജിത് വഞ്ഞോട്, മരുതായി.
