ദേശീയ ഡോക്ടേഴ്സ് ഡേ ആയ ജൂലൈ ഒന്ന് രാജ്യവ്യാപകമായി ഡോക്ടര്മാരുടെ നിസ്വാര്ത്ഥ സേവനത്തേയും ഡോക്ടര് പ്രൊഫഷന്റെ അന്തസ്സും അഭിമാനവും അംഗീകരിക്കുവാനും പ്രകീര്ത്തിക്കുവാനുമായി ആചരിക്കുകയാണ്. ഡോ. ബിഥാല് ചന്ദ്രന് റോയ് എന്ന മഹാ ഭിഷഗ്വരന്റെ ജന്മദിനത്തെ ഓര്മ്മിപ്പിക്കാനാണ് ഈ ദിനത്തെ തെരഞ്ഞെടുത്തിരിക്കുന്നത്.
പശ്ചിമബംഗാളിലെ രണ്ടാമത്തെ മുഖ്യമന്ത്രിയായ അദ്ദേഹം മുഖ്യമന്ത്രിയായിരുന്നപ്പോഴും രോഗി പരിചരണത്തിന് സമയം കണ്ടെത്തി എന്നത് ഈ പ്രൊഫഷന്റെ ഔന്നിത്യം വിളിച്ചോതുന്നതാണ്.
1962 ജൂലൈ ഒന്നിന് മരണപ്പെട്ട അദ്ദേഹത്തിന്റെ നന്മകള് ലോകമെമ്പാടും ഇന്നും പ്രകീര്ത്തിക്കപ്പെടുന്നു. വൈദ്യശാസ്ത്രത്തിന്റെ പുരാതനരൂപമായ, ഇന്ത്യയില് ജന്മമെടുത്ത ആയുര്വേദത്തിന്റെ വിവിധ തലങ്ങളിലുള്ള വികാസമാണ് ഇന്നത്തെ മോഡേ ണ് മെഡിസിന്.
പക്ഷേ, ഡോക്ടര്മാരെ ഈശ്വരന് തുല്യമായി കണ്ടിരുന്ന ഇന്ത്യന് പാരമ്പര്യത്തിന്റെ എതിരായ ചില സംഭവങ്ങളാണ് അടുത്തകാലത്ത് ഇന്ത്യയില് കണ്ടുവരുന്നത്. ഇന്ത്യയില് പ്രതിശീര്ഷ വരുമാനത്തിന്റെ 2.27 ശതമാനം മാത്രം ആരോഗ്യപരിചരണത്തിന് അനുവദിക്കുമ്പോള് പല വിദേശരാജ്യങ്ങളിലും 15 മുതല് 18 ശതമാനം വരെയാണ് അനുവദിക്കപ്പെടുന്നത്. അതുമൂലം ആരോഗ്യരംഗത്തെ പ്രാഥമിക സൗകര്യങ്ങളുടേയും മറ്റു പോരായ്മകളുടെയും അപര്യാപ്തത മൂലമുണ്ടാകുന്ന കഷ്ടനഷ്ടങ്ങള്ക്ക് പലപ്പോഴും ഡോക്ടര്മാരും മറ്റുജീവനക്കാരും ആശുപത്രിയില് പോലും ജനക്കൂട്ടത്തിന്റെ രോഷപ്രകടനങ്ങള്ക്ക് വിധേയരാകാറുണ്ട്.
‘ഡോക്ടര്മാരേയും ആശുപത്രികളെയും ആക്രമിക്കുന്നത് യാതൊരു കാരണവശാലും സഹിക്കാന് കഴിയുകയില്ല’ എന്നതാണ് ഈ വര്ഷത്തെ ഡോക്ടേഴ്സ് ദിനാചരണത്തിന്റെ സന്ദേശം. ഈ ജൂലൈ ഒന്നിന് തുടങ്ങുന്ന ഒരാഴ്ചക്കാലം ആതുരരംഗത്തെ സുരക്ഷാവാരമായി ആചരിക്കുവാനും നിര്ദേശമുണ്ട്.
1991 മുതല് കേന്ദ്രസര്ക്കാരിന്റെ തീരുമാന പ്രകാരം ജൂലൈ ഒന്നിന് ആചരിച്ചുവരുന്ന ഡോക്ടേഴ്സ് ദിനാചരണം ഈ വര്ഷം അത്യധികം ഊര്ജസ്വലതയോടെ നടത്തപ്പെടുന്നു എന്ന് നമുക്ക് പ്രത്യാശിക്കാം.
(ആലപ്പുഴ ജനറല് ആശുപത്രി, ശ്വാസകോശ രോഗവിഭാഗം
മേധാവിയാണ് ലേഖകന്)
ജന്മഭൂമി ഓണ്ലൈന്