ചേര്ത്തല: നെടുമ്പ്രക്കാട് ശ്രീരാമചന്ദ്രോദയം സുബ്രഹ്മണ്യം ക്ഷേത്രത്തിനോട് ചേര്ന്നുള്ള സ്ഥലം വ്യാജരേഖ ചമച്ച് തട്ടിയെടുക്കാന് നീക്കമെന്ന് പരാതി. മതില്കെട്ടാനുള്ള നീക്കം ഭക്തര് തടഞ്ഞു. മതില് നിര്മ്മിക്കാന് കോടതി ഉത്തരവുമായി എത്തിയ കമ്മീഷനെ സ്ത്രീകള് ഉള്പ്പെടെയുള്ളവര് തടയുകയായിരുന്നു.
സംഘര്ഷാവസ്ഥ കണക്കലെടുത്ത് വന് പോലീസ് സന്നാഹവും ഇവിടെ എത്തിയിരുന്നു. സ്ഥലം അളന്ന് കുറ്റിയിടുന്നതിന് ശ്രമം തുടങ്ങിയതോടെ സ്ത്രീകള് ഉള്പ്പെടെയുള്ള നൂറുകണക്കിന് പേര് നാമജപങ്ങളുമായി റോഡില് കുത്തിയിരുന്നു. ആത്മഹത്യാ ഭീഷണി മുഴക്കി മണ്ണെണ്ണയുമായി എത്തിയവരില് നിന്ന് പോലീസ് ബലമായി കുപ്പി പിടിച്ചുവാങ്ങി.
നഗരസഭ ഉദ്യോഗസ്ഥര് വീണ്ടും എത്തി മതില് നിര്മ്മിക്കുന്നതിന് സ്റ്റോപ് മെമ്മോ അധികാരികള്ക്ക് കൈമാറി. തുടര്ന്നാണ് രംഗം ശാന്തമായത്. സ്ഥലം തന്റേതാണെന്ന് കാട്ടി സമീപവാസി 1993ല് കോടതിയില് കേസ് ഫയല് ചെയ്തിരുന്നു. വ്യാജരേഖ ചമച്ച് കോടതിയെ തെറ്റിദ്ധരിപ്പിച്ചാണ് വിധി നേടിയെടുത്തെന്നാണ് ഭക്തജനങ്ങളുടെ പരാതി.
വില്ലേജ് ഓഫീസിലെ രേഖകളില് സ്ഥലം ഇപ്പോഴും ചക്കികോത എന്ന സ്ത്രീയുടെ പേരിലാണ്. ഈ 20 സെന്റ് സ്ഥലം പോക്കുവരവ് ചെയ്തതിനു രേഖകളില്ല. ചക്കികോതയുടെ അനന്തരാവകാശികളായ മൂന്നുപേര് ക്ഷേത്രത്തിന് സമീപം താമസിക്കുന്നുണ്ട്. ചക്കികോത മരിച്ചിട്ടു വര്ഷങ്ങളായി.
കേസ് കോടതിയില് എത്തിയതോടെ അനന്തരാവകാശികളും ഉടമസ്ഥാവകാശവുമായി ഹൈക്കോടതിയില് ഒപി ഫയല് ചെയ്തിട്ടുണ്ട്. ക്ഷേത്ര ഉത്സവത്തോട് അനുബന്ധിച്ച് ഭഗവാന്റെ ഇറക്കിപ്പൂജ ഉള്പ്പെടെ നടത്തുന്നത് ഈ സ്ഥലത്താണ്.
