ന്യൂദല്ഹി: ആള്വാര് അള്ക്കൂട്ടക്കൊലക്കേസില് ജനക്കൂട്ടം തല്ലിക്കൊന്ന പെഹ്ലു ഖാനും മക്കളായ ഇര്ഷാദ്(25) ആരിഫ്( 22) എന്നിവര്ക്കും എതിരെ കുറ്റപത്രം സമര്പ്പിച്ച രാജസ്ഥാനിലെ കോണ്ഗ്രസ് സര്ക്കാരിനെതിരെ കടുത്ത വിമര്ശനവുമായി ഓള് ഇന്ത്യ മജിലിസ് ഇ ഇത്തിഹാദൂള് മുസ്ലിം നേതാവ് അസാദുദീന് ഉവൈസി.
പെഹ്ലുഖാന് അക്രമിക്കപ്പെട്ടപ്പോള് കോണ്ഗ്രസ് അതിനെ എതിര്ത്തിരുന്നു. എന്നാല് അശോക് ഗെഹ്ലോട്ട് സര്ക്കാറിന്റെ ഇപ്പോഴത്തെ നടപടി എതിര്ക്കപ്പെടേണ്ടതാണ്. പ്രതിപക്ഷത്തിരിക്കുമ്പോള് ന്യൂനപക്ഷങ്ങളുമായി ബന്ധപ്പെട്ട വിഷയത്തില് മുതലകണ്ണീര് ഒഴുക്കുന്ന കോണ്ഗ്രസ് അധികാരത്തിലെത്തുമ്പോള് അങ്ങനെ ചെയ്യുന്നില്ല. ഇനിയും കോണ്ഗ്രസിനെ വിശ്വസിക്കുകയും പിന്തുണക്കുകയും ചെയ്യുന്നത് രാജസ്ഥാനിലെ മുസ്ലിങ്ങള് നിര്ത്തണമെന്ന് ഉവൈസി ആവശ്യപ്പെട്ടു.
കഴിഞ്ഞ ദിവസമാണ് അശോക് ഗെഹ്ലോട്ടിന്റെ നേതൃത്വത്തിലുള്ള കോണ്ഗ്രസ് സര്ക്കാര് പശുക്കടത്ത് കേസില് കുറ്റപത്രം സമര്പ്പിച്ചത്. 2017ലായിരുന്നു സംഭവം.പെഹ്ലു ഖാന്, ഇര്ഷാദ്, ആരിഫ് എന്നിവര്ക്കെതിരെ രാജസ്ഥാന് ബോവിന് ആനിമല്( ഗോഹത്യയും കടത്തും തടയല്)ആക്ട് പ്രകാരമാണ് കുറ്റപത്രം.
കശാപ്പ് ചെയ്യാനായി പശുക്കളെ കടത്തുന്നതും അവയെ കശാപ്പ് ചെയ്യുന്നതും തടയുന്നതാണ് നിയമം. ഖാന്റെ രണ്ട് സുഹൃത്തുക്കള്ക്ക് എതിരെ 2018ല് ബിജെപി സര്ക്കാര് ഇതേ വകുപ്പുകള് പ്രകാരം കേസ് എടുത്തിരുന്നു. ഇപ്പോള് കോണ്ഗ്രസ് സര്ക്കാരും ഖാനും മക്കള്ക്കും എതിരെ അതേ വകുപ്പുകള് പ്രകാരമാണ് കേസ് എടുത്ത് കുറ്റപത്രം സമര്പ്പിച്ചിരിക്കുന്നത്.
സംഭവവുമായി ബന്ധപ്പെട്ട് ഖാനെ തല്ലിക്കൊന്നവര്ക്ക് എതിരെ മറ്റൊരു കേസ് എടുത്തിരുന്നു. ഡയറി ഫാം നടത്തിരുന്ന ഖാന് ഹരിയാനക്കാരനാണ്. ജെയ്പ്പൂരില് നിന്ന് വാങ്ങിയ പശുക്കളെ ഹരിയാനയിലെ നൂവിലേക്ക് വാഹനത്തില് കടത്തുന്ന സമയത്താണ് ഒരുപറ്റമാള്ക്കാര് എത്തി തര്ക്കമുണ്ടാക്കിയതും ഇയാളെ മര്ദ്ദിച്ചതും. അനുമതിയില്ലാതെ പശുക്കളെ കടത്തിയെന്നാരോപിച്ചായിരുന്നു മര്ദ്ദനം. പിന്നീട് ഇയാള് മരണമടഞ്ഞു. തങ്ങള്ക്ക് അനുമതിയുണ്ടെന്നാണ് ഖാനും മറ്റും പറഞ്ഞിരുന്നത്. എന്നാല് പശുക്കടത്തിന് ഖാന് അനുമതിയില്ലായിരുന്നുവെന്ന് പോലീസ് കണ്ടെത്തിയിട്ടുണ്ട്.
