മാഞ്ചസ്റ്റര്: വിന്ഡീസിനെ 125 റണ്സിനാണ് തകര്ത്ത് ലോകകപ്പില് ഇന്ത്്യക്ക് വന് വിജയം. ടോസ് നേടി ബാറ്റിങ് തിരഞ്ഞെടുത്ത ഇന്ത്യ നിശ്ചിത 50 ഓവറില് 7 വിക്കറ്റ് നഷ്ടത്തില് 268 റണ്സാണ് നേടിയത്. മറുപടി പറഞ്ഞ വിന്ഡീസ് 34.2 ഓവറില് 143 റണ്സിന് എല്ലാവരും പുറത്തായി. ലോകകപ്പ് അരങ്ങേറ്റം കുറിച്ച സുനില് ആംബ്രിസ് 31 റണ്സുമായി വിന്ഡീസിന്റെ ടോപ് സ്കോററായി.
6.2 ഓവറില് 16 റണ്സ് മാത്രം വഴങ്ങി മുഹമ്മദ് ഷമി നാലു വിക്കറ്റ് വീഴ്ത്തിയപ്പോള് ആറ് ഓവറില് ഒന്പത് റണ്സ് മാത്രം വഴങ്ങി ജസ്പ്രീത് ബുമ്ര രണ്ടു വിക്കറ്റെടുത്തു. അതും അടുത്തടുത്ത പന്തുകളില്. യുസ്വേന്ദ്ര ചാഹല് ഏഴ് ഓവറില് 39 റണ്സ് വഴങ്ങി രണ്ടു വിക്കറ്റെടുത്തു, ഹാര്ദിക് പാണ്ഡ്യ, കുല്ദീപ് യാദവ് എന്നിവര് ഓരോ വിക്കറ്റ് സ്വന്തമാക്കി.
അപകടകാരിയായ ക്രിസ് ഗയിലിന്റെ മടക്കി മുഹമ്മദ് ഷമി ആദ്യവിക്കറ്റ് നേടി. 6 റണ്സ് എടുത്ത ഗയില് കേഥാര് യാദവിന്റെ കൈകളിലെത്തുകയായിരുന്നു. 10 പന്തില് ഒരു ബൗണ്ടറി സഹിതം അഞ്ചു റണ്സുമായി ഷായ് ഹോപ്പുവിനെ ക്ളീന് ബൗല് ചെയ്ത് ഷമി ഇന്ത്യയുടെ രണ്ടാം വിക്കറ്റും സ്വന്തമാക്കി. 40 പന്തില് ഒരു ബൗണ്ടറി സഹിതം 31 റണ്സുമായി സുനില് ആംബ്രിസിയെ ഹാര്ദിക് പാണ്ഡ്യയും 13 പന്തില് ആറു റണ്സുമായി ക്യാപ്റ്റന് ജെയ്സണ് ഹോള്ഡറെ്. യുസ്വേന്ദ്ര ചാഹലും പുറത്താക്കിയതോടെ വെസ്റ്റിന്ഡീസിന്റെ വിധി നര്ണ്ണയിക്കപ്പെട്ടു.
അടുത്തടുത്ത പന്തുകളില് രണ്ടുപേരെ മടക്കി ജസ്പ്രീത് ബുമ്ര വിജയത്തിലേക്കുള്ള ദൂരം കുറച്ചു. അഞ്ചു പന്തില് ഒരു റണ്ണുമായി കാര്ലോസ് ബ്രാത്ത്വെയ്റ്റ് ബുമ്രയുടെ പന്തില് ധോണി ക്യാച്ചെടുത്തു.നേരിട്ട ആദ്യ പന്തില്ത്തന്നെ ഫാബിയന് അലന് പുറത്തായി. 29 പന്തില് 18 റണ്സുമായി ഷിമ്രോണ് ഹെറ്റ്മെയര്, മുഹമ്മദ് ഷമിയുടെ പന്തില് ലോകേഷ് രാഹുല് ക്യാച്ചെടുത്തുഎട്ടു പന്തില് 10 റണ്സുമായി ഷെല്ഡണ് കോട്രലിനെ യുസ്വേന്ദ്ര ചാഹലും വീഴ്ത്തി. 6 റണ്സുമാമായി നിന്ന ഓഷ്നെ തോമസിനെ രോഹിത് ശര്മ്മയുടെ കൈകളിലെത്തിച്ച് ഷമി അവസാന വിക്കറ്റും വീഴ്ത്തി.
ടോസ് നേടി ബാറ്റിംഗ് തിരഞ്ഞെടുത്ത ഇന്ത്യ സാവധാനത്തിലാണ് തുടങ്ങിയത്. ആറാം ഓവറില് രോഹിത് ശര്മ്മ പുറത്തായി. 18 റണ്സെടുത്ത രോഹിതിനെ കെമാര് റോച്ച് വിക്കറ്റ് കീപ്പര് ഷായ് ഹോപ്പിന്റെ കൈകളിലെത്തിച്ചു.
രണ്ടാം വിക്കറ്റില് ലോകേഷ് രാഹുലിനൊപ്പം ചേര്ന്ന വിരാട് കോലി അനായാസം റണ്സ് കണ്ടെത്തി. സാവധാനത്തില് രാഹുലും ബൗണ്ടറികള് നേടാന് തുടങ്ങിയതോടെ ഇന്നിംഗ്സ് വേഗത കൈവരിച്ചു. രണ്ടാം വിക്കറ്റില് ഇരുവരും ചേര്ന്ന് 69 റണ്സാണ് കൂട്ടിച്ചേര്ത്തത്. അര്ദ്ധസെഞ്ചുറിക്ക് 2 റണ്സ് അകലെ വെച്ച് രാഹുലിനെ വിന്ഡീസ് ക്യാപ്റ്റന് ജേസന് ഹോള്ഡര് ക്ലീന് ബൗള്ഡാക്കി.
4 റണ്സെടുത്ത വിജയ് ശങ്കറിനെ ഷായ് ഹോപ്പിന്റെ കൈകളിലെത്തിച്ച റോച്ച് ഇന്ത്യയുടെ മൂന്നാം വിക്കറ്റു വീഴ്ത്തി. ഇതിനിടെ 55 പന്തുകളില് കോലി ലോകകപ്പിലെ തുടര്ച്ചയായ നാലാം അര്ദ്ധസെഞ്ചുറി കുറിച്ചു. കേദാര് ജാദവിനെ (7) കീപ്പറുടെ കൈകളിലെത്തിച്ച്് റോച്ചിന് മൂന്നാം വിക്കറ്റ്. ഏഴ് റണ്സെടുത്താണ് ജാദവ് പുറത്തായത്.
ധോണി-കോലി കൂട്ടുകെട്ട് ഇന്ത്യന് ഇന്നിംഗ്സിന്റെ വേഗതകൂട്ടി.. 40 റണ്ണുകള് നീണ്ട അഞ്ചാം വിക്കറ്റ് കൂട്ടുകെട്ട് ജേസന് ഹോള്ഡറാണ് പൊളിച്ചത്. 72 റണ്സെടുത്ത് മികച്ച നിലയില് ബാറ്റ് ചെയ്തിരുന്ന കോലിയെ ഹോള്ഡര് ഡാരന് ബ്രാവോയുടെ കൈകളിലെത്തിച്ചു.
പിന്നാലെ ക്രീസിലെത്തിയ ഹര്ദ്ദിക് പാണ്ഡ്യ നന്നായി ബാറ്റ് ചെയ്തു. കൃത്യമായ ഇടവേളകളില് ബൗണ്ടറി കണ്ടെത്തിയ പാണ്ഡ്യക്കൊപ്പം ധോണിയും ഫോമിലേക്കുയര്ന്നതോടെ അവസാന ഓവറുകളില് ഇന്ത്യന് റണ് റേറ്റ് ഉയര്ന്നു. 49ആം ഓവറില് കോട്രലിന് ആദ്യ വിക്കറ്റ് സമ്മാനിച്ച് പാണ്ഡ്യ മടങ്ങി. 38 പന്തുകളില് 46 റണ്സെടുത്ത പാണ്ഡ്യ ഫേബിയന് അലന്റെ കൈകളില് അവസാനിക്കുകയായിരുന്നു. പുറത്താവുമ്പോള് ധോണിയുമായി ആറാം വിക്കറ്റില് 70 റണ്സ് പാണ്ഡ്യ കൂട്ടിച്ചേര്ത്തിരുന്നു. ഓവറിലെ അഞ്ചാം പന്തില് ഷായ് ഹോപ്പിനു ക്യാച്ച് നല്കി മുഹമ്മദ് ഷമി (0)യും മടങ്ങി.
അവസാന ഓവറില് രണ്ട് സിക്സറുകളും ഒരു ബൗണ്ടറിയുമടക്കം 16 റണ്സടിച്ച ധോണി 59 പന്തുകളില് അര്ദ്ധസെഞ്ചുറിയിലെത്തി. ഇന്നിംഗ്സ് അവസാനിക്കുമ്പോള് ധോണിയും (56) കുല്ദീപ് യാദവും (0) പുറത്താവാതെ നിന്നു
