ശ്രേഷ്ഠഭാരതത്തിലെ പ്രകൃതി-ജീവ-ആചാര്യ-ദേവതാ സങ്കല്പങ്ങളെയത്രയും മനസ്സിലേക്ക് ആവാഹിക്കുന്ന സ്തോത്രസഞ്ചയമാണ് ഏകാത്മതാസ്തോത്രം. അഖണ്ഡഭാരത സ്മരണയ്ക്കു വേണ്ടിയുള്ള സാധനാക്രമം.
പരമാത്മാവിനെ പ്രകീര്ത്തിച്ച് തുടങ്ങുന്ന സ്തോത്രത്തിന് മൂന്ന് സ്വരൂപങ്ങള് കാണാം. സത് (ശുദ്ധമായ അസ്തിത്വം) ചിത് ശുദ്ധമായ ചേതന) ആനന്ദ (ആനന്ദം). അതാകുന്നു സച്ചിദാനന്ദം. പ്രപഞ്ചത്തിലെ എല്ലാ സൃഷ്ടികളിലും കൃപ ചൊരിഞ്ഞ് ഈ ആന്തരിക സത്യം പ്രകാശിക്കുന്നു.
അറിയുന്നതും അറിയാത്തതുമായ എല്ലാത്തിന്റേയും മൂലാധാരമാണ് സച്ചിദാനന്ദ സ്വരൂപം. അദ്വിതീയമായ ഈ യാഥാര്ഥ്യത്തെ പ്രതിഫലിപ്പിക്കുന്ന ശബ്ദമാകുന്നു ‘ ഏകാത്മത ‘ . ഭാരതീയരുടെ മനസ്സില്, സംഘടിതമായ സമന്വയ ഭാവന നിറയ്ക്കുന്ന ഏകാത്മതാസ്തോത്രത്തിന്റെ വ്യാഖ്യാനങ്ങളിലേക്കൊരു അക്ഷരയാത്ര…
ഓം സച്ചിദാനന്ദരൂപായ
നമോസ്തു പരമാത്മനേ
ജ്യോതിര്മയ സ്വരൂപായ
വിശ്വമാംഗല്യ മൂര്ത്തയേ
ലോകത്തിനു മുഴുവന് മംഗളദായകനും ജ്യോതിര്മയ സ്വരൂപനും സച്ചിദാനന്ദസ്വരൂപനുമായ പരമാത്മാവിനു നമസ്ക്കാരം.സൃഷ്ടിയുടെ ആദിശബ്ദമാണ് ‘ഓം’. ഇത് പ്രണവമന്ത്രം എന്നും അറിയപ്പെടുന്നു. ഈ ശബ്ദബ്രഹ്മമാണ് ആകാശമാകമാനം അവ്യക്തമായി വ്യാപിച്ചിരിക്കുന്നത്. ബ്രഹ്മാവിന്റെ മുഖത്തു നിന്ന് പുറത്തുവിട്ട ആദ്യനാദമാണിതെന്ന് പുരാണങ്ങളിലും സ്മൃതികളിലും പരാമര്ശിക്കുന്നു. വേദപാഠത്തിന്റേയും ശുഭകാര്യങ്ങളുടേയും തുടക്കത്തിലും സമാപനത്തിലും പ്രണവമന്ത്രം ഉരുവിടുന്നു. ഓം, മൂര്ത്തിത്രയങ്ങളെ ദ്യോതിപ്പിക്കുന്നു. ഇതില്, സൃഷ്ടികര്ത്താവായ ബ്രഹ്മാവിനെയാണ് ‘അ’ സൂചിപ്പിക്കുന്നത്. ‘ ഉ ‘ സ്ഥിതികാരണനായ വിഷ്ണുവിന്റേയും ‘മ ‘ സംഹാരദേവനായ പരമേശ്വരന്റേയും സൂചകങ്ങളാണ്. മംഗള സൂചകമായതിനാല് ഭാരതത്തില് ‘അതെ’ , ‘ ശരി ‘ തുടങ്ങിയവയ്ക്ക് പകരമായും ഉപയോഗിക്കുന്നു.
( തുടരും)
ഏകാത്മതാ സ്തോത്രം
വ്യാഖ്യാനം : 1
