ശ്രീനഗര്: കേന്ദ്ര ആഭ്യന്തര മന്ത്രിയായി ചുമതലയേറ്റ ശേഷമുള്ള അമിത് ഷായുടെ ആദ്യ ജമ്മു കശ്മീരില് സന്ദര്ശനം ഇന്നു തുടങ്ങും. സംസ്ഥാനത്തെ സുരക്ഷാ കാര്യങ്ങള് വിലയിരുത്താനാണ് ആഭ്യന്തര മന്ത്രി കശ്മീരിലെത്തുന്നത്. അമര്നാഥ് തീര്ത്ഥാടന യാത്രക്ക് തീവ്രവാദ ആക്രമണ ഭീഷണിയുള്ള പശ്ചാത്തില് സുരക്ഷ ക്രമീകരണങ്ങള് വിലയിരുത്താനായി പ്രത്യേക യോഗം ചേരും. അടുത്തമാസം 11നാണ് അമര്നാഥ് തീര്ത്ഥാടനം ആരംഭിക്കുന്നത്. ഇന്ന് രാത്രി കശ്മീര് രാജ്ഭവനില് തങ്ങുന്ന അമിത് ഷാ നാളെ ദില്ലിയിലേക്ക് തിരിക്കുമെന്നാണ് റിപ്പോര്ട്ട്. അതിന് മുമ്പ് സംസ്ഥാന ബിജെപി നേതാക്കളുമായും ടൂറിസം മേഖലയില് നിന്നുള്ളവരുമായും അമിത് ഷാ കൂടിക്കാഴ്ച നടത്തുമെന്നും വിവരമുണ്ട്.
ജമ്മു കശ്മീര് ഗവര്ണര് സത്യപാല് മാലിക്കുമായും അദ്ദേഹം കൂടിക്കാഴ്ച നടത്തും. അമര്നാഥ് തീര്ഥയാത്ര സംഘത്തിന് നേരെ ഭീകരാക്രമണ ഭീഷണിയുണ്ടെന്ന് രഹസ്യാനേഷണ റിപ്പോര്ട്ടുണ്ട്. ഈ പശ്ചാത്തലത്തില് പൗരാണികമായ ഗുഹക്ഷേത്രത്തിലേക്കുള്ള പാതയില് അതിശക്തമായ സുരക്ഷയാണ് ഒരുക്കിയിരിക്കുന്നത്. ശ്രീനഗറില് ഒന്നതലയോഗവും അദേഹത്തിന്റെ നേതൃത്വത്തില് ചേരും.
കേന്ദ്ര ആഭ്യന്തരമന്ത്രിയായി ചുമതലയേറ്റതിനു പിന്നാലെ ആഭ്യന്തര സുരക്ഷ മുന്നിര്ത്തി അമിത് ഷാ നിര്ണ്ണായകമായ ഉന്നതതല യോഗങ്ങള് വിളിച്ചു ചേര്ക്കുകയും ഇതിനു പിന്നാലെ കശ്മീരിലെ നിലവിലുള്ള സാഹചര്യങ്ങള് ഗവര്ണ്ണര് സത്യപാല് മാലിക്കുമായി ചര്ച്ച ചെയ്യുകയും ചെയ്തിരുന്നു. നിലവില് ആറു മാസത്തേക്ക് കൂടി കശ്മീരില് രാഷ്ട്രപതി ഭരണം ഏര്പ്പെടുത്തിയിരിക്കുകയാണ്.
