ലോകകപ്പില്‍ കരുത്തര്‍ നേര്‍ക്കുനേര്‍ വന്ന മത്സരത്തില്‍ ആതിഥേയര്‍ക്കെതിരെ കങ്കാരുക്കള്‍ക്ക് തകര്‍പ്പന്‍ ജയം. സ്റ്റോക്‌സിന്റെ രക്ഷപ്രവര്‍ത്തനത്തിനും ഇംഗ്ലണ്ടിനെ രക്ഷിക്കാന്‍ സാധിക്കാതെ വന്നതോടെ 64 റണ്‍സിനായിരുന്നു ഇംഗ്ലണ്ടിന്റെ തോല്‍വി. ഓസ്‌ട്രേലിയ ഉയര്‍ത്തിയ 286 റണ്‍സ് വിജയലക്ഷ്യം പിന്തുടര്‍ന്ന ഇംഗ്ലണ്ട് ഇന്നിങ്‌സ് 221 റണ്‍സില്‍ അവസാനിച്ചു. 45-ാം ഓവറില്‍ ഇംഗ്ലണ്ടിന്റെ എല്ലാ താരങ്ങളും കൂടാരം കയറുകയായിരുന്നു.
സ്വന്തം കാണികള്‍ക്ക് മുന്നില്‍ ജയം പ്രതീക്ഷിച്ചിറങ്ങിയ ഇംഗ്ലണ്ടിന് ബോളിങ്ങില്‍ കരുത്ത് കാട്ടാന്‍ സാധിച്ചെങ്കിലും ബാറ്റിങ്ങില്‍ പിഴച്ചു. 286 റണ്‍സ് വിജയലക്ഷ്യം പിന്തുടര്‍ന്നിറങ്ങിയ ഇംഗ്ലണ്ടിന് അക്കൗണ്ട് തുറക്കും മുമ്പ് ഓപ്പണര്‍ ജെയിംസ് വിന്‍സിനെ നഷ്ടമായി. അത് വരാനിക്കുന്ന വന്‍ ദുരന്തത്തിന്റെ സൂചനയായിരുന്നു. 15 റണ്‍സില്‍ ജോ റൂട്ടും 26ല്‍ ഇയാന്‍ മോര്‍ഗനും വീണതോടെ ഇംഗ്ലണ്ട് തകര്‍ച്ചയിലേക്ക് കൂപ്പുകുത്തി. ടീം സ്‌കോര്‍ 53 എത്തിയപ്പോഴേക്കും ജോണി ബെയര്‍‌സ്റ്റോയും വീണതോടെ പതനം പൂര്‍ത്തിയായിയെന്ന് കരുതിയടുത്താണ് ബെന്‍ സ്റ്റോക്‌സ് ക്രീസിലെത്തിയത്.
അഞ്ചാമനായി ക്രീസിലെത്തിയ ബെന്‍ സ്റ്റോക്‌സ ജോസ് ബട്ലറൊടൊപ്പം ചേര്‍ന്ന രക്ഷപ്രവര്‍ത്തനം ആരംഭിച്ചു. ബട്ലറിനൊപ്പവും ക്രിസ് വോക്‌സിനൊപ്പവും അര്‍ധസെഞ്ചുറി കൂട്ടുകെട്ട് തീര്‍ത്ത സ്റ്റോക്‌സ് ഇംഗ്ലണ്ടിന്റെ ജയ സാധ്യതകള്‍ക്ക് വീണ്ടും ജീവന്‍ നല്‍കി. എന്നാല്‍ സ്റ്റോക്‌സിന്റെ കുറ്റിതെറിപ്പിച്ച സ്റ്റാര്‍ക്ക് ഇംഗ്ലണ്ടിന്റെ പ്രതീക്ഷകള്‍ കൂടിയാണ് തകര്‍ത്തത്. അവസാന ഓവറുകളില്‍ ആദില്‍ റഷിദ് പൊരുതി നോക്കിയെങ്കിലും ഫലമുണ്ടായില്ല. 44.4 ഓവറില്‍ 221ന് എല്ലാവരും പുറത്ത്.
ഒമ്പത് വിക്കറ്റ് വീഴ്‌ത്തിയ പേസ് നിരയാണ് ഇംഗ്ലണ്ടിന്റെ നട്ടെല്ല് ഒടിച്ചത്. ജേസണ്‍ ബെഹ്റന്‍ഡോര്‍ഫ് അഞ്ച് വിക്കറ്റ് വീഴ്‌ത്തിയപ്പോള്‍ മിച്ചല്‍ സ്റ്റാര്‍ക്കിന്റെ സമ്പാദ്യം നാല് വിക്കറ്റായിരുന്നു.
നേരത്തെ ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഓസ്‌ട്രേലിയക്ക് മികച്ച തുടക്കമാണ് ഓപ്പണര്‍മാരായ ഡേവിഡ് വാര്‍ണറും നായകന്‍ ആരോണ്‍ ഫിഞ്ചും നല്‍കിയത്. ഒന്നാം വിക്കറ്റില്‍ സെഞ്ചുറി കൂട്ടുകെട്ടുമായി മുന്നേറിയ സഖ്യം പൊളിച്ചത് മൊയിന്‍ അലിയായിരുന്നു. അര്‍ധസെഞ്ചുറി നേടിയ വാര്‍ണറെ മൊയിന്‍ അലി ജോ റൂട്ടിന്റെ കൈകളില്‍ എത്തിച്ചു. 61 പന്തില്‍ 53 റണ്‍സുമായി വാര്‍ണര്‍ കളം വിട്ടതിന് പിന്നാലെ കാര്യമായ കൂട്ടുകെട്ടകള്‍ സൃഷ്ടിക്കാന്‍ ഓസ്‌ട്രേലിയക്ക് സാധിച്ചില്ല.
മൂന്നമനായി ഇറങ്ങിയ ഉസ്മാന്‍ ഖ്വാജ 23 റണ്‍സുമായി പുറത്തായി. സെഞ്ചുറിക്ക് പിന്നാലെ നായകന്‍ ഫിഞ്ചും മടങ്ങിയതോടെ ഓസ്‌ട്രേലിയ 185ന് മൂന്ന് എന്ന നിലയിലായി. 116 പന്തുകള്‍ നേരിട്ട ഫിഞ്ച് 100 റണ്‍സാണ് നേടിയത്. 11 ഫോറും രണ്ട് സിക്‌സും അടങ്ങുന്നതായിരുന്നു ഫിഞ്ചിന്റെ ഇന്നിങ്‌സ്. സ്റ്റീവ് സ്മിത്തും ഗ്ലെന്‍ മാക്‌സ്വെല്ലും കൂറ്റനടികള്‍ക്ക് മുതിര്‍ന്നെങ്കിലും ക്രീസില്‍ അധികം ആയുസുണ്ടായില്ല. 38 റണ്‍സായിരുന്നു സ്മിത്തിന്റെ സമ്പാദ്യം.
അവസാന ഓവറുകളില്‍ ഓസ്‌ട്രേലിന്‍ സ്‌കോറിങ് വേഗത കുറയുകയും വിക്കറ്റുകള്‍ വീഴുകയും ചെയ്തതോടെ സ്‌കോര്‍ 289 റണ്‍സില്‍ അവസാനിച്ചു. ഇംഗ്ലണ്ടിന് വേണ്ടി ക്രിസ് വോക്‌സ്, ജോഫ്രാ ആര്‍ച്ചര്‍, മാര്‍ക്ക വുഡ്, ബെന്‍ സ്റ്റോക്‌സ്, മൊയിന്‍ അലി എന്നിവര്‍ ഓരോ വിക്കറ്റ് വീതം വീഴ്‌ത്തി.
