ബെലോ ഹോറിസോന്റെ (ബ്രസീല്): കോപ്പ അമേരിക്കയില് തപ്പിത്തടയുന്ന അര്ജന്റീനയ്ക്ക് ലയണല് മെസി രക്ഷകനായി. പരാഗ്വെക്കെതിരായ മത്സരത്തില് തോല്വിയിലേക്ക് നീങ്ങിയ അര്ജന്റീന മെസിയുടെ പെനാല്റ്റി ഗോളില് രക്ഷപ്പെട്ടു. മത്സരം സമനിലയായി (1-1).
57-ാം മിനിറ്റില് പെനാല്റ്റിയിലൂടെയാണ് മെസി ഗോളടിച്ചത്. തുടക്കത്തില്ത്തന്നെ റിച്ചാര്ഡ് സാഞ്ചസ് നേടിയ ഗോളില് പരാഗ്വെ മുന്നിലെത്തി. ഗോള് കീപ്പര് ഫ്രാങ്കോ അര്മാനിയും അര്ജന്റീനയുടെ രക്ഷകനായി. രണ്ടാം പകുതിയില് പരാഗ്വെയ്ക്ക് ലീഡ് നേടാനുള്ള അവസരം അര്മാനി തകര്ത്തുകളഞ്ഞു. പരാഗ്വെ താരത്തിന്റെ പെനാല്റ്റി സേവ് ചെയ്താണ് അര്മാനി അര്ജന്റീനയെ രക്ഷപ്പെടുത്തിയത്.
ഈ സമനിലയോടെ അര്ജന്റീന ഗ്രൂപ്പ്് ബിയില് രണ്ട് മത്സരങ്ങളില് ഒരു പോയിന്റുമായി ഏറ്റവും പിന്നിലാണ്. അവസാന ഗ്രൂപ്പ് മത്സരത്തില് ഖത്തറിനെ തോല്പ്പിച്ചാല് അര്ജന്റീനയ്ക്ക് ക്വാര്ട്ടര് ഫൈനലില് കടക്കാം.
സാവോപോളോയില് നടന്ന മത്സരത്തില് ഖത്തറിനെ ഏകപക്ഷീയമായ ഒരു ഗോളിന് തോല്പ്പിച്ച് കൊളംബിയ ക്വാര്ട്ടര് ഫൈനലില് കടന്നു. ഡുവാന് സപറ്റയാണ് ഗോള് നേടിയത്. കോപ്പ അമേരിക്കയില് ക്വാര്ട്ടറിലെത്തുന്ന ആദ്യ ടീമാണ് കൊളംബിയ.
ശനിയാഴ്ച നടക്കുന്ന മത്സരത്തില് നിലവിലെ ചാമ്പ്യന്മാരായ ചിലി ഇക്വഡോറിനെ നേരിടും. ഇന്ത്യന് സമയം പുലര്ച്ചെ 4.30നാണ് കളി. ആദ്യ മത്സരത്തില് ജപ്പാനെ മറുപടിയില്ലാത്ത നാല് ഗോളുകള്ക്ക് തകര്ത്താണ് ചിലി വരുന്നത്. ഇക്വഡോര് ഉറുഗ്വെയോട് ഇതേ മാര്ജിനില് തോറ്റിരുന്നു. ഇൗ മത്സരത്തില് പരാജയപ്പെട്ടാല് ഇക്വഡോറിന്റെ ക്വാര്ട്ടര് സാധ്യത ഏറെക്കുറെ അവസാനിക്കും.
