ബിര്മിങ്ഹാം: ലോകകപ്പില് ദക്ഷിണാഫ്രിക്കയുടെ സെമിഫൈനല് മോഹം പൊലിഞ്ഞു. എഡ്ജ്ബാസ്റ്റണിലെ നിര്ണായക മത്സരത്തില് ന്യൂസിലന്ഡിനോട് നാലു വിക്കറ്റിന് തോറ്റതോടെയാണ് ദക്ഷിണാഫ്രിക്കയുടെ പ്രതീക്ഷകള് തകര്ന്നത്.
ആറു മത്സരങ്ങളില് ദക്ഷിണാഫ്രിക്കയുടെ അഞ്ചാം തോല്വിയാണിത്. ഒറ്റ മത്സരം മാത്രം വിജയിച്ച അവര് പോയിന്റ് നിലയില് എട്ടാം സ്ഥാനത്താണ്. ശേഷിക്കുന്ന മൂന്ന് മത്സരങ്ങളിലും വിജയിച്ചാലും ദക്ഷിണാഫ്രിക്കയ്ക്ക് രക്ഷയില്ല.
ടോസ് നഷ്ടപ്പെട്ട് ബാറ്റ് ചെയ്ത ദക്ഷിണാഫ്രിക്ക, ബാറ്റിങ് ദുഷ്കരമായ പിച്ചില് അമ്പത് ഓവറില് ആറു വിക്കറ്റിന് 241 റണ്സ് പുടുത്തുയര്ത്തി. പക്ഷെ മുന്നില് നിന്ന് നയിച്ച നായകന് കെയ്ന് വില്യംസണിന്റെ സെഞ്ചുറിയില് വിജയത്തിലേക്ക് കുതിച്ചു. ആവേശകരമായ മത്സരത്തില് നാലു വിക്കറ്റിനാണ് കിവീസ് വിജയിച്ചത്. വില്യംസണ് 138 പന്തില് 106 റണ്സുമായി കീഴടങ്ങാതെ നിന്നു. 47 പന്തില് അഞ്ചു ഫോറും രണ്ട് സിക്സറും ഉള്പ്പെടെ 60 റണ്സ് അടിച്ചെടുത്ത ഗ്രാന്ഡ്ഹോമും കിവീസിന്റെ വിജയത്തിന് നിര്ണായക പങ്കുവഹിച്ചു.
കെയ്ന് വില്യംസണിനെ പുറത്താക്കാന് ലഭിച്ച അവസരം ദക്ഷിണാഫ്രിക്ക നഷ്ടമാക്കി. സ്കോര് 76 റണ്സിലെത്തിനില്ക്കെ വില്യംസണ് താഹിറിന്റെ പന്തില് വിക്കറ്റ് കീപ്പറിന് പിടികൊടുത്തതാണ്. പക്ഷെ ദക്ഷിണാഫ്രിക്ക റിവ്യൂ ആവശ്യപ്പെട്ടില്ല. റിപ്ലേയില് പന്ത് ബാറ്റിലുരസിയെന്ന് വ്യക്തമായിരുന്നു.
വിരമിച്ചെങ്കിലും ലോകകപ്പില് കളിക്കാമെന്ന പ്രഗത്ഭ ബാറ്റ്സ്മാന് എ.ബി. ഡിവില്ലിയേഴ്സിന്റെ വാഗ്ദാനം നിരസിച്ചതാണ് ദക്ഷിണാഫ്രിക്കയുടെ മോശം പ്രകടനത്തിന് കാരണമെന്ന് ഡിവില്ലിയേഴ്സിന്റെ ആരാധകര് വാദിക്കുന്നു. പക്ഷെ വാഗ്ദാനം വൈകിപ്പോയെന്നാണ് മറ്റുള്ളവരുടെ വിലയിരുത്തല്. ഈ ലോകകപ്പില് ബാറ്റ്സ്മാന്മാര് പരാജയപ്പെട്ടതാണ് ദക്ഷിണാഫ്രിക്കയുടെ തോല്വികള്ക്ക് കാരണം.
ലോക നിലവാരമുള്ള ബാറ്റ്സ്മാനാണ് കെയ്ന് വില്യംസണ്. ഒറ്റയ്ക്ക് കളി ജയിപ്പിക്കാന് കഴിവുള്ള താരം. ഒരറ്റത്ത് പൊരുതി നിന്ന് സെഞ്ചുറിയും നേടി അദ്ദേഹം ടീമിനെ വിജയത്തിലേക്ക് നയിച്ചെന്ന ദക്ഷിണാഫ്രിക്കന് ക്യാപ്റ്റന് ഡു പ്ലെസിസ് പറഞ്ഞു.
ലോകകപ്പിന്റെ ഫിക്സ്ചര് തീരുമാനിക്കും മുമ്പേ ദക്ഷിണാഫ്രിക്കയുടെ ലോകകപ്പ് പ്രതീക്ഷകള്ക്ക് തിരിച്ചടിയേറ്റിരുന്നു. അവരുടെ പരിചയ സമ്പന്നനായ ഫാസ്റ്റ് ബൗളര് ഡെയ്ന് സ്റ്റെയിനെ പരിക്ക് മൂലം നഷ്ടമായി.
ഉദ്ഘാടന മത്സരത്തില് തന്നെ ഇംഗ്ലണ്ടിനോട് തോറ്റു. പന്നീട് ഇന്ത്യയോടും ബംഗ്ലാദേശിനോടും തകര്ന്നതോടെ ലോകകപ്പില് മുന്നോട്ടുള്ള പ്രയാണം ദുഷ്കരമായി.
