ലണ്ടന്: 12-ാമത് ഏകദിന ലോകകപ്പിന്റെ നിറംകെടുത്തി മഴ വില്ലനാകുന്നു. ഈ ലോകകപ്പ് തുടങ്ങി ഇതുവരെ നാല് മത്സരങ്ങളാണ് മഴയില് ഒലിച്ചുപോയത്. ഒരു പന്തുപോലും എറിയാന് കഴിയാതെ മൂന്ന് മത്സരങ്ങള് ഉപേക്ഷിച്ചപ്പോള് ദക്ഷിണാഫ്രിക്ക-വിന്ഡീസ് മത്സരത്തില് 7.3 ഓവര് എറിഞ്ഞു. ഇതിന് പുറമെ പാക്കിസ്ഥാന്-ശ്രീലങ്ക, ബംഗ്ലാദേശ്-ശ്രീലങ്ക കളിയാണ് മഴയില് ഒലിച്ചുപോയലത്. മഴക്കളി തുടരുന്നതോടെ ഐസിസിയെ ട്രോളുകയാണ് ക്രിക്കറ്റ് ആരാധകര്.
ക്രിക്കറ്റ് പരിശീലകരും ഐസിസിക്കെതിരെ രംഗത്തുവന്നു കഴിഞ്ഞു. ലോകകപ്പ് മത്സരങ്ങള്ക്ക് റിസര്വ് ദിനങ്ങളില്ലാത്തത് കഷ്ടമാണെന്നാണ് ബംഗ്ലദേശ് കോച്ച് സ്റ്റീവ് റോഡ്സ് തുറന്നടിച്ചത്. കഴിഞ്ഞ ദിവസം ബ്രിസ്റ്റോളില് ബംഗ്ലദേശ്-ശ്രീലങ്ക മത്സരം മഴ മൂലം ഉപേക്ഷിച്ചതിനെത്തുടര്ന്നായിരുന്നു ഇംഗ്ലിഷുകാരന് കുടിയായ റോഡ്സിന്റെ പ്രതികരണം. റിസര്വ് ദിനങ്ങള് ഉള്ളതാണ് നല്ലതെന്ന് ശ്രീലങ്ക ക്യാപ്റ്റന് ദിമുത് കരുണരത്നെയും പറഞ്ഞു. മഴമൂലം കളികള് മുടങ്ങിയാല് നോക്കൗട്ട് ഘട്ടത്തിലേക്കുള്ള പ്രവേശനം ദുര്ഘടമാക്കുമെന്ന് ഓസ്ട്രേലിയന് ക്യാപ്റ്റന് ആരോണ് ഫിഞ്ചും അഭിപ്രായപ്പെട്ടു. നിലവില് സെമി ഫൈനലുകള്ക്കും ഫൈനലിനും മാത്രമാണ് റിസര്വ് ദിനമുള്ളത്.
മഴകാരണം ഏറ്റവും കുടുതല് മത്സരങ്ങള് ഉപേക്ഷിക്കപ്പെട്ട ലോകകപ്പെന്ന ചീത്തപ്പേരും ഇത്തവണ വീണു. 1992, 2003 ലോകകപ്പുകളില് 2 മത്സരങ്ങള് വീതം മഴ മൂലം നഷ്ടമായിരുന്നു. മഴ കളി തടസ്സപ്പെടുത്തുന്നതിനാല് വിദേശങ്ങളില് നിന്നെത്തിയ ആരാധകര് ഏറെ നിരാശയിലാണ്.വളരെയേറെ പണം മുടക്കിയെത്തിയിട്ടും ഒരു പന്തു പോലും എറിയാതെ മത്സരങ്ങള് ഉപേക്ഷിക്കുന്നതു കണ്ടു മടങ്ങേണ്ടി വരികയാണ് ഇവര്ക്ക്.
‘നാലു വര്ഷം കൂടുമ്പോള് നടക്കുന്ന ലോകകപ്പ് പോലും മര്യാദയ്ക്ക് നടത്താന് സാധിക്കാത്ത ഐസിസി പിരിച്ച് വിടണം. മഴ കളിക്കുന്ന ഈ ലോകകപ്പ് ആരാധകര് കാണില്ലെന്ന് തീരുമാനിക്കണം’ എന്നിങ്ങനെ പോകുന്ന ആരാധകരുടെ കമന്റുകള്.
ഇന്ത്യ-ന്യൂസിലാന്ഡ് മത്സരം വൈകിയതിനെക്കുറിച്ച് വന്ന ട്രോള് രസകരമാണ്. ‘ഇന്ത്യ ടോസ് ജയിച്ചു, ആദ്യം നീന്താന് തീരുമാനിച്ചു’ എന്നായിരുന്നു അത്. നീന്തല് മത്സരത്തില് പോരാടാന് ഇന്ത്യന് ടീം റെഡി എന്നായിരുന്നു മറ്റൊരു പോസ്റ്റ്.ലോകകപ്പില് സൂര്യനും മേഘങ്ങളും തമ്മിലാണ് പോരാട്ടം എന്നിങ്ങനെ പോകുന്നു ട്വിറ്റര് കമന്റുകള്.
ഇതിനിടെ, വിമര്ശനങ്ങള് ഉയര്ന്നതോടെ ലോകകപ്പില് റിസര്വ് ദിനങ്ങള് ഒഴിവാക്കിയതിനെ ന്യായീകരിച്ച് ഐസിസി രംഗത്ത് വന്നിരുന്നു. ‘റിസര്വ് ദിനം നടപ്പാക്കുക പ്രായോഗികമല്ല. ലോകകപ്പിന്റെ ദൈര്ഘ്യം ക്രമാതീതമായി നീണ്ടുപോകും. സ്റ്റേഡിയങ്ങളുടെ ലഭ്യത, ടീമുകളുടെയും ഒഫീഷ്യല്സിന്റെയും താമസം, കാണികളുടെ അടക്കമുള്ള മറ്റ് സൗകര്യങ്ങള് എന്നിവയൊക്കെ പരിഗണിച്ചാണ് മത്സരക്രമം തയ്യാറാക്കിയത്. റിസര്വ് ദിനത്തില് മഴ പെയ്യില്ലെന്ന് എന്താണ് ഉറപ്പെന്നും’ ഐസിസി ചീഫ് എക്സിക്യൂട്ടീവ് ഓഫീസര് ഡേവ് റിച്ചാര്ഡ്സണ് പറഞ്ഞു.
