ന്യൂദല്ഹി: സിപിഎം കേന്ദ്രകമ്മറ്റി യോഗത്തിനായി ദല്ഹിയിലെത്തിയ ആരോഗ്യമന്ത്രി കെ.കെ. ഷൈലജ കേന്ദ്ര മന്ത്രിമാരുമായി കൂടിക്കാഴ്ച നടത്തിയത് യാത്രാ ചെലവ് സര്ക്കാരില്നിന്ന് ഈടാക്കാനായി. ആരോഗ്യമന്ത്രി ഡോ. ഹര്ഷവര്ദ്ധന്, വനിത ശിശുക്ഷേമ മന്ത്രി സ്മൃതി ഇറാനി എന്നിവരെയാണ് ഇന്നലെ ഷൈലജ സന്ദര്ശിച്ചത്. പാര്ട്ടി യോഗത്തില് പങ്കെടുക്കുന്നതിനാണ് മുഖ്യമായും ിന്നലെ ഷൈലജ ദല്ഹിയില് എത്തിയത്. ഇതിന്റെ യാത്രാ ചെലവ് സര്ക്കാരില്നിന്ന് ഈടാക്കാനാകാത്തതിലാണ് കേന്ദ്ര മന്ത്രിമാരെ സന്ദര്ശിച്ച് ദല്ഹി യാത്ര ഔദ്യോഗികമാക്കിയത്.
കൂടിക്കാഴ്ച കഴിഞ്ഞ് കേരള ഹൗസില് നടത്തിയ പത്രസമ്മേളനത്തിന് ശേഷം നാല് മണിയോടെയാണ് മന്ത്രി കേന്ദ്ര കമ്മറ്റിയില് പങ്കെടുക്കാന് എകെജി ഭവനിലേക്ക് പോയത്. ചോദ്യങ്ങള് നീണ്ടപ്പോള് നാല് മണിക്ക് യോഗത്തില് പങ്കെടുക്കാനുണ്ടെന്ന് പത്രപ്രവര്ത്തകരെ അവര് പലതവണ ഓര്മ്മിപ്പിക്കുകയും ചെയ്തു. പോളിറ്റ് ബ്യൂറോ, കേന്ദ്ര കമ്മറ്റി യോഗങ്ങള്ക്കെത്തുന്ന മുഖ്യമന്ത്രിയും മന്ത്രിമാരും യാത്ര സര്ക്കാര് ചെലവിലാക്കാന് ഇത്തരം കൂടിക്കാഴ്ചകള് നടത്തുന്നത് പതിവാക്കിയിരിക്കുകയാണ്. ഇതേ തുടര്ന്ന് മുന്പ് മുഖ്യമന്ത്രി പിണറായി വിജയന് പ്രധാനമന്ത്രി നരേന്ദ്ര മോദി അനുമതി നിഷേധിച്ചിരുന്നു. അന്നത് കേന്ദ്ര അവഗണനയായി സിപിഎം പ്രചരിപ്പിച്ചു.
നിപ ദുരന്തത്തെക്കുറിച്ച് ചര്ച്ച ചെയ്യാനാണ് ഹര്ഷവര്ദ്ധനുമായി കൂടിക്കാഴ്ച നടത്തിയതെന്നാണ് ഷൈലജയുടെ വാദം. കഴിഞ്ഞ വര്ഷവും സംസ്ഥാനത്ത് നിപ ബാധിച്ചിരുന്നു. അതിന് ശേഷം ഇന്നലെയാണ് വിഷയം കേന്ദ്രവുമായി ചര്ച്ച ചെയ്യുന്നത്. കോഴിക്കോട് റീജണല് വൈറോളജി ലാബ് സ്ഥാപിക്കണമെന്ന് കേരളം ആവശ്യപ്പെട്ടു. നേരത്തെ ഇവിടെ വൈറോളജി ലാബിനായി മൂന്നു കോടി രൂപ കേന്ദ്രം അനുവദിച്ചിരുന്നു. ഇത് ആധുനിക സൗകര്യങ്ങളോട് കൂടിയ റീജണല് ലാബ് ആയി ഉയര്ത്തണമെന്നും തുക വര്ധിപ്പിക്കണമെന്നുമാണ് സംസ്ഥാനത്തിന്റെ ഇപ്പോഴത്തെ ആവശ്യം. സ്മൃതി ഇറാനിയുമായുള്ള കൂടിക്കാഴ്ചയില് അംഗനവാടി പ്രവര്ത്തകരുടെ ആനുകൂല്യങ്ങള് ഉള്പ്പടെയുള്ള വിഷയങ്ങളാണ് ഉന്നയിച്ചത്.
