തിരുവനന്തപുരം: ഡാമുകള് തുറന്നുവിട്ട് കേരളത്തെ പ്രളയത്തില് മുക്കിയതിന് ശേഷം നവകേരള നിര്മ്മിതിക്കായി പ്രവാസികളുടെ സഹായം തേടിയുള്ള മുഖ്യമന്ത്രിയുടെ വിദേശയാത്ര ഫലം പൂര്ണ്ണ പരാജയമെന്ന് ബി.ജെ.പി സംസ്ഥാന അദ്ധ്യക്ഷന് പി.എസ്. ശ്രീധരന് പിള്ള. സഹായമായി കേന്ദ്രത്തിനോട് കേരള സര്ക്കാര് തേടിയത് മൂവായിരം കോടിരൂപയായിരുന്നു. എന്നാല് മൂവായിരം കോടിക്ക് പകരം നാലായിരം കോടിയോളം കേന്ദ്രസഹായമായി നല്കി. ഈ തുക ഫലപ്രദമായി ഉപയോഗിക്കുന്നതില് സംസ്ഥാന സര്ക്കാര് പരാജയപ്പെട്ടുവെന്നും അദേഹം പറഞ്ഞു.
രാജ്യത്തിന്റെ അഭിമാനം പണയം വച്ച് വിദേശരാഷ്ട്രങ്ങളില് പ്രളയത്തിന്റെ പേരില് ഉല്ലാസയാത്ര നടത്താനുള്ള മന്ത്രിമാരുടെ നീക്കം തടഞ്ഞ കേന്ദ്ര സര്ക്കാരിനെ അഭിനന്ദിക്കുകയാണ് വേണ്ടതെന്നും ശ്രീധരന് പിള്ള പറഞ്ഞു. കേന്ദ്രത്തില് കാര്യങ്ങള് വിലയിരുത്താന് കഴിവുള്ള ഫലപ്രദമായ ആളുകളാണ് ഭരണത്തിലുണ്ടായിരുന്നത് അതിനാലാണ് മന്ത്രിമാരുടെ യാത്ര തടയാനായത്. മുഖ്യമന്ത്രിയുടെ വിദേശയാത്രകൊണ്ട് യാതൊരു ഫലവുമുണ്ടായില്ലെന്നും യാത്ര പരാജയമായിരുന്നുവെന്നും ശ്രീധരന്പിള്ള പറഞ്ഞു.
