ഗുരുവായൂര്‍ : കേന്ദ്ര സര്‍ക്കാരിന്റെ അഭിമാന പദ്ധതിയായ ആയുഷ്മാനില്‍ കേരളം ഇതുവരെ അംഗമാകാത്തതിനെ വിമര്‍ശിച്ച് പ്രധാനമന്ത്രി നരേന്ദ്രമോദി. രാജ്യത്തെ ജനങ്ങള്‍ക്കെല്ലാം ഒരു പോലെ പ്രയോജനം ലഭിക്കുന്ന ആരോഗ്യ ഇന്‍ഷുറന്‍സ് പദ്ധതിയാണ് ആയുഷ്മാന്‍. സംസ്ഥാന സര്‍ക്കാര്‍ ഇതുവരെ ഇതില്‍ പങ്കാളിത്തം എടുത്തിട്ടില്ല. ചികിത്സാ സഹായം ലഭ്യമാക്കുന്ന ഈ പദ്ധതി ഒട്ടനവധി സാധാരണക്കാര്‍ക്ക് പ്രയോജനപ്പെടുന്നതാണ്. ഇതാണ് നടപ്പാക്കാന്‍ വൈകിത്തുന്നതെന്നും അദ്ദേഹം കുറ്റപ്പെടുത്തി.
ഗുരുവായൂര്‍ ക്ഷേത്ര ദര്‍ശനം നടത്തിയതിന് ശേഷം ബിജെപിയുടെ പൊതു പരിപാടിയായ അഭിനന്ദന്‍ സഭയില്‍ പങ്കെടുക്കുകയായിരുന്നു അദ്ദേഹം. എല്ലാവര്‍ക്കും ഗുരുവായൂരപ്പന്റെ അനുഗ്രഹം ഉണ്ടാകട്ടെ എന്ന് മലയാളത്തില്‍ പ്രസംഗിച്ചായിരുന്നു മോദി ജനങ്ങളെ അഭിസംബോദന ചെയ്തത്. ഗുരുവായൂര്‍ സന്ദര്‍ശനം പുതിയ ഊര്‍ജം നല്‍കുന്നു.ഗുരുവായൂരില്‍ വരാന്‍ കഴിഞ്ഞത് ഭാഗ്യമാണ്. ഗുരുവായൂരിനെ ഭൂമിയിലെ വൈകുണ്ഠമെന്നും അദ്ദേഹം വിശേഷിപ്പിച്ചു.
തെരഞ്ഞെടുപ്പില്‍ വിജയിക്കുക എന്നത് മാത്രമല്ല, ജനസേവനമാണ് ആത്യന്തിക ലക്ഷ്യമെന്ന് പ്രധാനമന്ത്രി നരേന്ദ്ര മോദി. തെരഞ്ഞെടുപ്പ് കഴിഞ്ഞാല്‍ പിന്നെ അധികാരത്തില്‍ വരുന്നത് എല്ലാവരുടേയും സര്‍ക്കാരാണ്. തെരഞ്ഞെടുപ്പില്‍ സ്വീകരിച്ച സമീപനം നോക്കിയല്ല ജനക്ഷേമ പദ്ധതികള്‍ നടപ്പാക്കുന്നതെന്നും പ്രധാനമന്ത്രി നരേന്ദ്ര മോദി പറഞ്ഞു.
ജനാധിപത്യത്തിന്റെ ഉത്സവത്തില്‍ പങ്കാളിയായവരെ അഭിനന്ദിക്കുന്നു. ജയപരാജയമല്ല ജനക്ഷേമമാണ് ബിജെപി സര്‍ക്കാരിന്റെ ലക്ഷ്യം. ബിജെപി പ്രവര്‍ത്തകരും ജനങ്ങള്‍ക്കിടയില്‍ പ്രവര്‍ത്തിക്കുന്നത് തെരഞ്ഞെടുപ്പ് ജയപരാജയങ്ങള്‍ മാത്രം ലക്ഷ്യമിട്ടല്ല, മറിച്ച് ജനസേവനം മുന്‍നിര്‍ത്തിയാണെന്നും പ്രധാനമന്ത്രി പറഞ്ഞു.
അടിയുറച്ച വിശ്വാസത്തിലും ആധ്യാത്മിക പാരമ്പര്യത്തിലും ഉറച്ച് നില്‍ക്കുന്ന ജനതയാണ് കേരളത്തിലുള്ളത്. അതുകൊണ്ടുതന്നെ
ആധ്യാത്മികതയിലും പൈതൃകത്തിലും ഊന്നിനിന്നു കൊണ്ടുള്ള വികസന പദ്ധകളാണ് കേരളത്തില്‍ നടപ്പാക്കാന്‍ ശ്രമിച്ചിട്ടുള്ളത്.
വിവിധ വികസന പദ്ധതികളിലൂടെ ഓരോ വ്യക്തിയിലേക്കും കടന്നെത്താനാണ് സര്‍ക്കാര്‍ ശ്രമിക്കുന്നതെന്നും മോദി പറഞ്ഞു.
കേരളത്തില്‍ റിപ്പോര്‍ട്ട് ചെയ്ത നിപ വൈറസ് ബാധ കേന്ദ്ര സര്‍ക്കാരിന്റെ ശ്രദ്ധയില്‍ പെട്ടിട്ടുണ്ട്. നിപ പ്രതിരോധ പ്രവര്‍ത്തനങ്ങള്‍ക്ക് കേന്ദ്രം കേരളത്തിനൊപ്പമുണ്ടാകും. ഇതിനുള്ള എല്ലാ സഹയങ്ങളും കേന്ദ്രം ലഭ്യമാക്കുമെന്നും മന്ത്രി ഉറപ്പ് നല്‍കി.
പ്രധാനമന്ത്രിയായി വീണ്ടും തെരഞ്ഞെടുക്കപ്പെട്ട ശേഷമുള്ള മോദിയുടെ ആദ്യ പൊതുസമ്മേളനം കൂടിയായിരുന്നു ശ്രീകൃഷ്ണ ഹയര്‍ സെക്കന്‍ഡറി സ്‌കൂള്‍ മൈതാനത്ത് ഒരുക്കിയ പൊതുസമ്മേളനം. ഗുരുവായൂര്‍, മണലൂര്‍, കുന്ദംകുളം, നാട്ടിക നിയോജക മണ്ഡലങ്ങളിലെ പ്രവര്‍ത്തകരെയാണ് മോദി യോഗത്തില്‍ അഭിസംബോധന ചെയ്തത്.
