കൊച്ചി: പെരുമ്പാവൂരില്‍ ഇന്‍കം ടാക്‌സ് കമ്മീഷണര്‍ എന്ന പേരില്‍ വ്യവസായികളില്‍ നിന്നും ലക്ഷങ്ങള്‍ തട്ടിയ കേസില്‍ ഒരാളെ പോലീസ് അറസ്റ്റ് ചെയ്തു. മഹാരാഷ്‌ട്ര അമരാവതി സ്വദേശി ആശിഷ് രമേശ് ബിസ്സയാണ് പിടിയിലായത്.
വ്യവസായികളെയും വ്യാപാരികളെയും ഫോണില്‍ വിളിച്ച് പരിചയപ്പെട്ട ശേഷം ഇവരുടെ വ്യവസായ സ്ഥാപനങ്ങളില്‍ ടാക്‌സ് വെട്ടിപ്പ് കണ്ടെത്തിയെന്നും ഇതിന്റെ രേഖകള്‍ കൈവശമുണ്ടെന്നും പറഞ്ഞ് ഭീഷണിപ്പെടുത്തിയാണ് തട്ടിപ്പ് നടത്തിയിരുന്നത്.
സ്വയം ഇന്‍കം ടാക്‌സ് കമ്മീഷ്ണര്‍ എന്ന് പരിചയപ്പെടുത്തുന്ന ഇയാള്‍ പലരില്‍ നിന്നായി ഒന്നരലക്ഷത്തിലധികം രൂപ വീതം തട്ടിയെടുത്തിട്ടുണ്ട്. പല പ്രമുഖ വ്യവസായികളെയും ഫോണില്‍ വിളിച്ച് വ്യാപാര സ്ഥാപനങ്ങളില്‍ റെയ്ഡ് ഒഴിവാക്കണമെങ്കില്‍ പണം നല്‍കണമെന്ന് ഇയാള്‍ ആവശ്യപ്പെട്ടിട്ടുണ്ടെന്നും പോലീസ് പറയുന്നു.
