കൊച്ചി: സിഡ്കോയിലെ അണ് സ്കില്ഡ് വര്ക്കര് ഗ്രേഡ് നാല് തസ്തികയിലേക്ക് 2014 ല് നടത്തിയ 146 നിയമനങ്ങള് സിംഗിള്ബെഞ്ച് റദ്ദാക്കിയത് ഹൈക്കോടതി ഡിവിഷന് ബെഞ്ച് ശരിവച്ചു. നിയമനം ലഭിച്ചവര് സിംഗിള്ബെഞ്ച് വിധിക്കെതിരെ നല്കിയ അപ്പീല് തള്ളിയ ഡിവിഷന് ബെഞ്ച് എഴുത്തുപരീക്ഷയുടെ അടിസ്ഥാനത്തില് മൂന്നു മാസത്തിനകം പുനര്നിയമന നടപടികള് പൂര്ത്തിയാക്കാനും നിര്ദേശിച്ചിട്ടുണ്ട്.
സംവരണ നിയമങ്ങള് ഉള്പ്പെടെ പാലിച്ച് മൂന്നു മാസത്തിനകം പുനര് നിയമനം നടത്താന് 2018 ല് നിര്ദേശിച്ച സിംഗിള് ബെഞ്ച് അതുവരെ നിലവിലുള്ളവര്ക്ക് തുടരാമെന്നും വ്യക്തമാക്കിയിരുന്നു. ഇത് ഡിവിഷന് ബെഞ്ച് ശരിവച്ചു. ഇക്കാലയളവില് പ്രൊമോഷന് ലഭിച്ചാല് ജോലിയില് തുടരാനുള്ള അര്ഹതയായി കണക്കാക്കരുതെന്നും ഡിവിഷന് ബെഞ്ച് വ്യക്തമാക്കി.
അവിദഗ്ദ്ധ ജീവനക്കാരുടെ തസ്തികയിലേക്ക് നിയമനം നടത്തിയതില് അപാകതയുണ്ടെന്ന് ആരോപിച്ച് കോഴിക്കോട് സ്വദേശി സി.കെ. സുകേഷ് ഉള്പ്പെടെ നല്കിയ ഹര്ജികളിലാണ് 2018 മാര്ച്ച് 15 ന് സിംഗിള്ബെഞ്ച് നിയമനങ്ങള് റദ്ദാക്കിയത്. എഴുത്തു പരീക്ഷയില് ഉയര്ന്ന മാര്ക്ക് നേടിയവരെ ഒഴിവാക്കി കുറഞ്ഞ മാര്ക്കുകാരെ നിയമിച്ചെന്നായിരുന്നു ഹര്ജിക്കാരുടെ പരാതി.
