ന്യൂദല്ഹി : എതിരാളികളെ ഇല്ലായ്മ ചെയ്യുന്ന ശൈലി സിപിഎം ആദ്യം അവസാനിപ്പിക്കണമെന്ന് കേന്ദ്രസഹ മന്ത്രി വി. മുരളീധരന്. അടുത്തകാലത്ത് എതിര്സ്ഥാനാര്ത്ഥിയെ വധിക്കാന് വരെ സിപിഎം ശ്രമം നടത്തിയിരുന്നു. ഈ ശൈലി അവസാനിപ്പിച്ചാല് മാത്രമേ കൊലപാതക രാഷ്ട്രീയത്തിന് അറുതി ഉണ്ടാവുകയുള്ളു.
കേന്ദ്രമന്ത്രിയായി സത്യ പ്രതിജ്ഞ ചെയ്ത് അധികാരമേറ്റശേഷം മാധ്യങ്ങളോട് സംസാരിക്കവേയാണ് അദ്ദേഹം ഇക്കാര്യം വ്യക്തമാക്കിയത്.
വികസന കാര്യങ്ങളില് കേരളത്തിന്റെ താല്പ്പര്യത്തിനായി നിലകൊള്ളുമെന്നും ദേശീയപാതാ വികസനത്തില് ഉണ്ടായ ആശയക്കുഴപ്പം പരിഹരിച്ചിട്ടുണ്ട്. വെള്ളപ്പൊക്ക ദുരിതം മതിയായ കേന്ദ്രസഹായം കിട്ടിയില്ല എന്നത് ശരിയല്ലെന്നും കേരളം സമര്പ്പിച്ച പദ്ധതികള്ക്ക് അനുസരിച്ച് പണം നല്കിയിട്ടുണ്ട്. സംസ്ഥാനത്തെ വികസന പദ്ധതികളില് കേന്ദ്രകേരള തര്ക്കത്തില് പകച്ചുനില്ക്കില്ലെന്നും അത് പരിഹരിക്കാനുള്ള ശ്രമങ്ങള് തന്റെ ഭാഗത്തുനിന്നുണ്ടാകുമെന്നും അദ്ദേഹം പറഞ്ഞു.
അതേസമയം ശബരിമല വിഷയത്തില് കേന്ദ്ര ഇടപെടല് ഉണ്ടാകുമെന്ന് കേന്ദ്രമന്ത്രി വി. മുരളീധരന്. വിശ്വാസ സംരക്ഷണം പാര്ട്ടി നിലപാടാണ്. കേരളത്തില് ക്രൈസ്തവരും, ന്യൂനപക്ഷ വിഭാഗങ്ങളും ഉള്പ്പടെ എല്ലാവരേയും ഒന്നിച്ചുനിര്ത്താനുള്ള ശ്രമം കേന്ദ്ര സര്ക്കാരിന്റെ ഭാഗത്തുനിന്ന് ഉണ്ടാകുമെന്നും വി. മുരളീധരന്.
ലോക്സഭാ തെരഞ്ഞെടുപ്പിലെ സംസ്ഥാനത്ത് വോട്ടിങ് ശതമാനം സംബന്ധിച്ചും പാര്ട്ടി യോഗത്തില് ചര്ച്ച ചെയ്യുമെന്നും അദ്ദേഹം അറിയിച്ചു.
ഓരോ കാലഘട്ടത്തിലും ഒരോ സാഹചര്യത്തിലാണ് വോട്ടിങ് ശതമാനം കൂടുകയും കുറയുകയും ചെയ്യുന്നത്. ഇത്തവണത്തെ തെരഞ്ഞെടുപ്പില് സംസ്ഥാനത്തിന്റെ പല സ്ഥലത്തും മുന്നേറ്റമുണ്ടായിട്ടുണ്ട്. നേരത്തെയുണ്ടായിരുന്നതിനേക്കാള് വോട്ട് വലിയതോതില് വര്ധിച്ച സ്ഥലങ്ങളുണ്ടെന്നും അദ്ദേഹം കൂട്ടിച്ചേര്ത്തു.
നരേന്ദ്രമോദിയുടെ രണ്ടാം മന്ത്രിസഭയില് സ്വതന്ത്ര ചുമതലയുള്ള സഹമന്ത്രിയായിട്ടാണ് വി മുരളീധരന് സത്യപ്രതിജ്ഞ ചെയ്തത്. കേരളത്തിലെ മുന് ബിജെപി സംസ്ഥാന അധ്യക്ഷനായിരുന്നു വി മുരളീധരന്. മഹാരാഷ്ട്രയില് നിന്നുള്ള രാജ്യസഭാംഗവും കൂടിയാണ് മുരളീധരന്.
