ന്യൂദല്ഹി: നരേന്ദ്ര മോദി സര്ക്കാരിന്റെ സത്യപ്രതിജ്ഞാ ചടങ്ങ് ബഹിഷ്കരിച്ച മുഖ്യമന്ത്രി പിണറായി വിജയനെതിരെ ബിജെപി. മുഖ്യമന്ത്രിയുടെ നിലപാട് കേരളത്തെ സംബന്ധിച്ചിടത്തോളം അപമാനകരമെന്ന് കേന്ദ്രമന്ത്രി വി. മുരളീധരന് പറഞ്ഞു. രാഷ്ട്രീയമായി അഭിപ്രായ വ്യത്യാസങ്ങളുള്ളപ്പോഴും ജനാധിപത്യത്തില് പാലിക്കേണ്ട മര്യാദ മുഖ്യമന്ത്രിയുടെ ഭാഗത്തുനിന്നും ഉണ്ടായിട്ടില്ലെന്ന് അദ്ദേഹം ചൂണ്ടിക്കാട്ടി.
കേരളത്തിന്റെ മുഖ്യമന്ത്രിയെന്ന നിലയിലാണ് പിണറായി വിജയനെ ക്ഷണിച്ചതെന്ന് ബിജെപി സംസ്ഥാന അധ്യക്ഷന് അഡ്വ.പി.എസ്. ശ്രീധരന്പിള്ള പറഞ്ഞു. ജനാധിപത്യത്തിന്റെ മര്യാദ ഉള്ക്കൊണ്ട് അദ്ദേഹം പങ്കെടുക്കേണ്ടതായിരുന്നു. രാഷ്ട്രീയത്തിന്റെ കണ്ണട മാറ്റിവച്ച് ജനാധിപത്യത്തിലെ ഉദാത്ത ഭാവങ്ങള് ഉള്ക്കൊള്ളാന് തയാറാകുമ്പോഴാണ് ജനാധിപത്യം സാര്ത്ഥകമാകുന്നത്. സ്റ്റാലിനിസ്റ്റ് ശൈലിയുള്ളവര് മറ്റുള്ളവരെ ശത്രുവായി കണക്കാക്കുന്നവരാണ്. ഞങ്ങള് ആരെയും ശത്രുവായി കാണുന്നില്ല. ആരെയും മാറ്റിനിര്ത്തുന്നുമില്ല, അദ്ദേഹം വിശദീകരിച്ചു.
കേരളത്തെ സംബന്ധിച്ച് ചരിത്രപ്രാധാന്യമുള്ള നിമിഷത്തില് മുഖ്യമന്ത്രി വിട്ടുനിന്നത് ഖേദകരമാണെന്ന് കുമ്മനം രാജശേഖരന് ചൂണ്ടിക്കാട്ടി. ഈ അവസരത്തിലെങ്കിലും സഹിഷ്ണുതയും സമചിത്തതയും അദ്ദേഹം കാട്ടേണ്ടതായിരുന്നു. നവോത്ഥാന മൂല്യം ഉയര്ത്തിപ്പിടിക്കുമെന്നാണ് മുഖ്യമന്ത്രി പറഞ്ഞത്. അദ്ദേഹത്തിന്റെ നവോത്ഥാന മൂല്യം എന്താണെന്ന് ഇപ്പോള് മനസിലായി. കേരളത്തിന്റെ സഹിഷ്ണുതയുടെയും സഹവര്ത്തത്തിന്റെയും പാരമ്പര്യം മുഖ്യമന്ത്രി കളഞ്ഞുകുളിക്കരുത്, കുമ്മനം വ്യക്തമാക്കി.
