കോഴിക്കോട്: നരേന്ദ്ര മോദി ഇന്ന് വീണ്ടും പ്രധാനമന്ത്രിയായി അധികാരമേല്ക്കുമ്പോള് ഏറ്റവും കൂടുതല് സന്തോഷിക്കുന്ന ഒരു കോഴിക്കോട്ടുകാരനുണ്ട്. അംഗപരിമിതരുടെ ക്ഷേമത്തിനും അവകാശങ്ങള്ക്കുമായി പ്രവര്ത്തിക്കുന്ന പ്രജിത്ത് ജയ്പാല്. മോദി പകര്ന്ന കരുത്തില് കാറില് ലോകയാത്രയ്ക്കൊരുങ്ങുകയാണ് പ്രജിത്ത് ഇപ്പോള്.
കാറപകടത്തെത്തുടര്ന്ന് ശരീരം തളര്ന്ന പ്രജിത്ത് കഴിഞ്ഞ വര്ഷം കോഴിക്കോട് നിന്ന് ന്യൂദല്ഹി വരെ സ്വന്തമായി കാറോടിച്ചു ചെന്ന് പ്രധാനമന്ത്രിയെ സന്ദര്ശിച്ചു. താന് വരച്ച കൃഷ്ണകുചേല സംഗമം ചിത്രം പ്രധാനമന്ത്രിക്ക് സമ്മാനിച്ച പ്രജിത്ത്, അംഗപരിമിതരുടെ പ്രശ്നങ്ങള് അദ്ദേഹത്തിന്റെ ശ്രദ്ധയില്പ്പെടുത്തി. 2018 മെയ് രണ്ടിനായിരുന്നു മോദിയുമായുള്ള കൂടിക്കാഴ്ച.
പ്രജിത്തിന്റെ പ്രവര്ത്തനങ്ങള്ക്ക് പ്രധാനമന്ത്രി പൂര്ണ പിന്തുണ വാഗ്ദാനം ചെയ്തു. അംഗപരിമിതര്ക്കായി ഒരു എക്സ്പോ സംഘടിപ്പിക്കണമെന്ന നിര്ദേശം മുന്നോട്ടുവച്ചപ്പോള് അമേരിക്കയില് ഒരു എബിലിറ്റി എക്സ്പോയുണ്ടെന്നും അതു സന്ദര്ശിക്കണമെന്നുമായിരുന്നു മോദിയുടെ നിര്ദേശം. പ്രധാനമന്ത്രി നേരിട്ട് ഇടപെട്ട് എക്സ്പോയില് പങ്കെടുക്കുന്നതിനും യാത്രയ്ക്കും താമസത്തിനുമുള്ള സൗകര്യങ്ങളൊരുക്കി. ഇന്ത്യയിലും അത്തരത്തില് ഒരു എബിലിറ്റി എക്സ്പോ സംഘടിപ്പിക്കാമെന്നും പ്രധാനമന്ത്രി ഉറപ്പുനല്കി.
2021ല് ഇന്ത്യയില് എബിലിറ്റി എക്സ്പോ സംഘടിപ്പിക്കാനുള്ള പ്രവര്ത്തനങ്ങളുടെ ഭാഗമായാണ് പ്രജിത്ത് ഇപ്പോള് കാറില് ലോക യാത്രയ്ക്കൊരുങ്ങുന്നത്. ആറു ഭൂഖണ്ഡങ്ങളിലൂടെ 80,000 കിലോമീറ്റര് യാത്ര ചെയ്ത് 80 രാജ്യങ്ങള് സന്ദര്ശിക്കുകയാണ് ലക്ഷ്യം.
ഡ്രൈവ് ഫോര് ഡിസെബിലിറ്റി, ഡ്രൈവ് ടു ഇന്സ്പയര് എന്ന പേരില് ഒരു വര്ഷം നീളുന്ന യാത്ര ഡിസംബര് 15ന് കോഴിക്കോട്ടുനിന്ന് ആരംഭിക്കാനാണ് തീരുമാനം. ന്യൂദല്ഹിയില്നിന്ന് ചൈന, ഉസ്ബെക്കിസ്ഥാന്, കസാഖിസ്താന് വഴി യൂറോപ്പിലും അവിടെനിന്ന് ഗള്ഫ് രാജ്യങ്ങളിലുമെത്തും. പിന്നീട് ആഫ്രിക്കന് രാജ്യങ്ങളും ലാറ്റിനമേരിക്കന് രാജ്യങ്ങളും അമേരിക്കയും സന്ദര്ശിക്കും. ഓസ്ട്രേലിയ, സിംഗപ്പൂര്, നേപ്പാള് വഴി തിരിച്ചെത്തും.
ഒരു ഡോക്ടറും കാര് മെക്കാനിക്കും യാത്രയില് പ്രജിത്തിനൊപ്പമുണ്ടാകും. ആറു സ്ഥലങ്ങളില് കാര് കപ്പല്മാര്ഗം കൊണ്ടുപോകേണ്ടിവരും. ഒന്നരക്കോടി രൂപയാണ് ചെലവ് പ്രതീക്ഷിക്കുന്നത്. സ്പോണ്സര്ഷിപ്പിലൂടെ പണം കണ്ടെത്താനാണ് ശ്രമം. ജൂനിയര് ചേംബറാണ് (ജെസിഐ) യാത്രയ്ക്ക് പിന്തുണ നല്കുന്നത്. സഹായത്തിനായി കേന്ദ്ര വിനോദസഞ്ചാര വകുപ്പിന്റെ പിന്തുണയും പ്രതീക്ഷിക്കുന്നു.
ഭിന്നശേഷിക്കാര്ക്ക് പരസഹായമില്ലാതെ സ്വതന്ത്രമായി ജീവിക്കാനുള്ള സാഹചര്യം ഇന്ത്യയിലൊരുക്കണമെന്നാണ് പ്രജിത്തിന്റെ ആഗ്രഹം. ഭിന്നശേഷിക്കാര്ക്കായി ഒരുക്കേണ്ട സൗകര്യങ്ങളെക്കുറിച്ചുള്ള നിവേദനവും മോദിക്കു മുന്നില് വച്ചിട്ടുണ്ട്. തൊണ്ടയാട് നന്ദനത്തില് റിട്ട. ഫിഷറീസ് ഡെപ്യൂട്ടി ഡയറക്ടര് ജയ്പാല് അടിയോടിയുടെയും തങ്കമണി ജയ്പാലിന്റെയും മകനാണ്. ഭിന്നശേഷിക്കാരുടെ ഉന്നമനത്തിനായി ദിവ്യാംഗ് ഫൗണ്ടേഷന് എന്ന പേരില് ഒരു ട്രസ്റ്റും പ്രജിത്തിന്റെ നേതൃത്വത്തില് പ്രവര്ത്തിക്കുന്നു.
