തിരുവനന്തപുരം: ഖാദര് കമ്മറ്റി റിപ്പോര്ട്ടിനെ തുടര്ന്ന് ഹൈസ്ക്കൂള് ഹയര് സെക്കന്ഡറി ലയനം ഈ വര്ഷം നടപ്പിലാക്കുമെന്ന് വിദ്യാഭ്യാസ മന്ത്രി പ്രൊഫ.സി. രവീന്ദ്രനാഥ്. ഇന്ന് ചേരുന്ന മന്ത്രിസഭാ യോഗം തീരുമാനം എടുക്കുമെന്നും മന്ത്രി പറഞ്ഞു.
മന്ത്രിയുടെ അഭിപ്രായത്തെ പ്രതിപക്ഷ സംഘടനകള് എതിര്ത്തു. ലയന ഉത്തരവ് പുറത്തിറങ്ങിയാല് ഉടന് പ്രക്ഷോഭം ആരംഭിക്കുമെന്ന് പ്രതിപക്ഷ അധ്യാപക സംഘടനകള് മുന്നറിയിപ്പ് നല്കി. ഇതോടെ അധ്യായന വര്ഷാരംഭം കലുഷിതമാകുമെന്ന് ഉറപ്പായി.
ഖാദര് കമ്മിറ്റി റിപ്പോര്ട്ട് നടപ്പാക്കുന്നതിന് മുന്നോടിയായി അധ്യാപക, അനധ്യാപക സംഘടനകളുമായി ഇന്നലെ മന്ത്രിയുടെ അധ്യക്ഷതയില് യോഗം ചേര്ന്നു. ലയനം നടപ്പാക്കുമെന്ന് മന്ത്രി നിലപാട് ആവര്ത്തിച്ചതോടെയാണ് പ്രക്ഷോഭം നടത്താന് പ്രതിപക്ഷ സംഘടനകള് തീരുമാനിച്ചത്.
ലയനം നടപ്പായാല് നിലവിലുള്ള പൊതുവിദ്യാഭ്യാസ, ഹയര് സെക്കന്ഡറി, വൊക്കേഷണല് ഹയര് സെക്കന്ഡറി ഡയറക്ടറേറ്റുകളെ ലയിപ്പിച്ച് ഒന്നാക്കും. ഡയറക്ടറേറ്റ് ഓഫ് ജനറല് എഡ്യൂക്കേഷന് (ഡിജിഇ) എന്ന പുതിയ ഡയറക്ടറേറ്റിന് കീഴിലാകും വിദ്യാലയങ്ങള്. ഒരു പരീക്ഷാ കമ്മിഷണറാകും ഉണ്ടാവുക. ഹൈസ്കൂളുകളും ഹയര് സെക്കന്ഡറികളും ഒന്നിച്ച് പ്രവര്ത്തിക്കുന്ന വിദ്യാലയങ്ങളെ ഒരു യൂണിറ്റാക്കി ഹൈസ്ക്കൂള് എച്ച്എമ്മിനെ വൈസ് പ്രിന്സിപ്പാളാക്കും. ഹയര്സെക്കന്ഡറി പ്രിന്സിപ്പാളാണ് സ്ഥാപന മേധാവി. ഹൈസ്കൂളിലെ അനധ്യാപക ജീവനക്കാരും ഓഫീസും ഹയര്സെക്കന്ററി സ്കൂളിന്റെ ഓഫീസിന് കീഴിലാകും.
എന്നാല് വൈസ് പ്രിന്സിപ്പാളിനെ പ്രിന്സിപ്പാള് ആകാന് സാധിക്കില്ല. യോഗ്യത ഉണ്ടെങ്കില് ഹയര് സെക്കന്ഡറി അധ്യാപകനായി സ്ഥാനക്കയറ്റം ലഭിക്കും. എല്പി, യുപി ഘടനയിലും അധ്യാപക തസ്തികയിലും മാറ്റമുണ്ടാകില്ല.
ഹയര്സെക്കന്ഡറിയില് നിലവിലുള്ള റീജിയണല് ഡെപ്യൂട്ടി ഡയറക്ടര് (ആര്ഡിഡി), പൊതുവിദ്യാഭ്യാസ ഡയറക്ടറേറ്റിന് കീഴിലുള്ള എഇഒ, ഡിഇഒ, ഡിഡിഇ ഓഫീസ് എന്നിവയ്ക്ക് മാറ്റമുണ്ടാകില്ല.
എന്നാല് പത്താം ക്ലാസ്സുവരെ മാത്രമുള്ള സര്ക്കാര്, എയ്ഡഡ് സ്കൂളിലെ എച്ച്എം അതേ തസ്തികയില് തുടരും.
പൊതുവിദ്യാഭ്യാസ സെക്രട്ടറി എ.ഷാജഹാന്,ഡിപിഐ കെ. ജീവന്ബാബു, പൊതുവിദ്യാഭ്യാസ അഡീ.സെക്രട്ടറി ജെസി ജോസ്, ഹയര് സെക്കന്ഡറി ജോയിന്റ് ഡയറക്ടര് ഡോ.പി.പി. പ്രകാശന് അധ്യാപകസംഘടനാ പ്രതിനിധികളായ ശ്രീകലേശന്, അരുണ്കുമാര്, കെ.സി.ഹരികൃഷ്ണന്,ഹരികുമാര്, എന്. ശ്രീകുമാര്, ഒ.കെ. ജയകൃഷ്ണന് , ജെയിംസ് കുര്യന്, സലാഹുദ്ദീന്, അജിത്ത്, എ.കെ. സൈനുദ്ദീന്, സാബുജി വര്ഗീസ്, ജോഷി ആന്റണി, കെ.വി. ഇന്ദുലാല്, അബ്ദുള്ലത്തീഫ്, എസ്. മനോജ് തുടങ്ങിയവര് സംബന്ധിച്ചു.
അവ്യക്തത നീക്കണമെന്ന് എന്ടിയു
തിരുവനന്തപുരം: ലയനം സംബന്ധിച്ച അവ്യക്തത നീക്കണമെന്ന് എന്ടിയു ആവശ്യപ്പെട്ടു.കേന്ദ്ര സര്ക്കാര് കൊണ്ടു വന്ന പദ്ധതി യഥാവിധി നടപ്പിലാക്കാത്തതിനാലാണ് ആശയക്കുഴപ്പത്തിന് ഇടയാക്കിയത്. കേന്ദ്രസര്ക്കാര് നിര്ദ്ദേശം അനുസരിച്ച് വിഎച്ച്എസി യുടെ ഘടന ഇതുവരെയും സംസ്ഥാനത്ത് പൂര്ത്തിയാക്കിയിട്ടില്ല. ലയനം നടപ്പിലാക്കുമ്പോള് സ്ഥാനക്കയറ്റത്തെ സംബന്ധിച്ച് ഇപ്പോഴും അവ്യക്തത നിലനില്ക്കുന്നു. അതിനാല് ദുരൂഹതകള് നീക്കിയിട്ടേ ലയനം നടപ്പിലാക്കാവൂ എന്ന് എന്ടിയു സംസ്ഥാന വൈസ് പ്രസിഡന്റ് ശ്രീകലേശന്, ജനറല് സെക്രട്ടറി അനൂപ്കുമാര് എന്നിവര് ആവശ്യപ്പെട്ടു.
