കൊച്ചി: പ്രധാനമന്ത്രി നരേന്ദ്ര മോദിയെ മുക്തകണ്ഠം പ്രശംസിച്ച് കോണ്ഗ്രസ് നേതാവ് എ.പി. അബ്ദുള്ളക്കുട്ടി. മോദിയെ ഗാന്ധിയനെന്ന് വിശേഷിപ്പിച്ച മുന് എംപി, മോദി നടപ്പാക്കിയ ക്ഷേമപദ്ധതികള് വലിയ വിജയമായതായും അവയാണ് മോദിയുടെ വിജയത്തിന് കാരണമെന്നും ഫേസ്ബുക്ക് പോസ്റ്റില് കുറിച്ചു.
അബ്ദുള്ളക്കുട്ടിയെ അനുകൂലിച്ചും അപഹസിച്ചും പരിഹസിച്ചുമുള്ള പ്രതികരണങ്ങള് സാമൂഹമാധ്യമങ്ങളില് നിറഞ്ഞു. സ്വസമുദായത്തില്പെട്ട ഒരു വിഭാഗമാണ് സത്യം പറഞ്ഞതിന് അബ്ദുള്ളക്കുട്ടിയെ കടന്നാക്രമിക്കുകയും പരിഹസിക്കുകയും മറ്റും ചെയ്യുന്നത്. മാന്യദേഹം ബിജെപിയില് ചേരാന് ഒരുങ്ങുകയാണെന്നു വരെ കളിയാക്കുന്നു.
ഫേസ്ബുക്ക് പോസ്റ്റ്:
നരേന്ദ്ര മോദിയുടെ മഹാവിജയത്തെ പറ്റി
നരേന്ദ്ര മോദിയുടെ അത്യുഗ്രന് വിജയത്തെ കുറിച്ചുള്ള പല നിരീക്ഷണങ്ങളും പുറത്ത് വന്നു കൊണ്ടിരിക്കുകയാണല്ലൊ. എന്തുകൊണ്ട് ഈ വിജയം ഉണ്ടായി? എന്റെ എഫ്ബി കൂട്ടുകാരുടെ സമക്ഷത്തിങ്കലേക്ക് ചില തോന്നലുകള് തുറന്നു പറയട്ടെ.
പ്രതിപക്ഷക്കാര് മാത്രമല്ല, ബിജെപിക്കകത്തുള്ളവരെ പോലും ആശ്ചര്യപ്പെടുത്തുന്ന വിജയമാണ് ഉണ്ടായത്. എല്ലാ രാഷ്ടീയ പ്രവര്ത്തകരും വികാരങ്ങള് മാറ്റിവച്ച് നിഷ്പക്ഷമായി ശാന്തമായി വിശകലനം ചെയ്യേണ്ടതാണ് ഈ സംഗതി. നരേന്ദ്ര മോദിയുടെ ഭരണതന്ത്രജ്ഞതയുടെ, വികസന അജണ്ടയുടെ, അംഗീകാരം തന്നെയാണിത്.
വളരെ കൗതുകരമായ കാര്യം ഇദ്ദേഹത്തിനെ ജനപ്രിയനാക്കിയതിന്റെ രഹസ്യം ഗാന്ധിയന് മൂല്യം, ഗാന്ധിയുടെ നാട്ടുകാരന് മോദി തന്റെ ഭരണത്തില് പ്രയോഗിച്ചു എന്നുള്ളതാണ്.
മഹാത്മാ ഗാന്ധി പൊതുപ്രവര്ത്തകരോട് പറഞ്ഞു. നിങ്ങള് ഒരു നയം ആവിഷ്ക്കരിക്കുമ്പോള് ജീവിതത്തില് കണ്ടുമുട്ടിയ ഏറ്റവും പാവപ്പെട്ടവന്റെ മുഖം ഓര്മ്മിക്കുക. ശ്രീ മോദി അത് കൃത്യമായി നിര്വഹിച്ചു.
1) സ്വച്ഛ് ഭാരത് സ്കീമില് 9.16 കോടി കുടുംബങ്ങള്ക്ക് സ്വന്തം ടോയ്ലെറ്റ് നല്കി.
2) പ്രധാനമന്ത്രി ഉജ്വലയോജന സ്കീമില് ആറ് കോടി കുടുംബങ്ങള്ക്കാണ് സൗജന്യമായി എല്പിജി ഗ്യാസ് കണക്ഷന് നല്കിയത്. കേരളം വിട്ടാല് നാമല്ലാം കണ്ട സ്വതന്ത്ര ഇന്ത്യയിലെ ഏറ്റവും ദയനീയമായ കാഴ്ചയായിരുന്നു വെളിം പ്രദേശത്ത് മലമൂത്ര വിസര്ജനത്തിനിരിക്കുന്ന പാവങ്ങളുടെ ചിത്രം. മോദി ഒരുപരിധിവരെ അതിനോട് നീതി കാണിച്ചു
ചാണകം ഉണക്കി, ഉണക്ക ചില്ല കമ്പുകള് ശേഖരിച്ച് അടുപ്പു ഊതി തളര്ന്നു പോയ ആറ് കോടി അമ്മമാര്ക്ക് മോദി നല്കിയ ആശ്വാസം എത്ര ഹൃദ്യമാണ്.
ജനകോടികളില് അദ്ദേഹത്തെ പ്രിയങ്കരനാക്കിയത് ഇതൊക്കെ ഒരു കാരണമല്ലെ?
സ്മാര്ട്ട് സിറ്റികളും ബുള്ളന് ട്രെയിന് ഉള്പ്പെടെ നിരവധി സ്വപ്ന പദ്ധതികള് രാഷ്ടീയ അജണ്ടയില് കൊണ്ടുവന്നത് കാണാതെ പോകരുത്. നമ്മുടെ രാഷ്ട്രീയം മെല്ലെ മാറുകയാണ്.
വിജയങ്ങള് ഇനി വികസനങ്ങള്ക്കൊപ്പമാണ്. നരേന്ദ്ര മോദിയെ വിമര്ശിക്കുമ്പോള് ഈ യാഥാര്ത്ഥ്യങ്ങള് വിസ്മരിക്കരുത്.
പല വികസിത സമൂഹത്തിലും തെരഞ്ഞെടുപ്പ് കഴിഞ്ഞാല് രാജ്യവികസനത്തിലും ജനങ്ങളുടെ പുരോഗതിക്കും കൈകോര്ത്ത് നില്ക്കുന്ന ഭരണ പ്രതിപക്ഷ ശൈലിയും നാം ചര്ച്ചയ്ക്കെടുക്കാന് സമയമായി.
