ന്യൂദല്ഹി: ബിജെപി കേന്ദ്ര ഓഫീസില് പത്രസമ്മേളനത്തിനിടെ പാര്ട്ടി വക്താവിന് നേര്ക്ക് ഷൂ എറിയാന് ശ്രമിച്ചയാളെ സുരക്ഷാ ജീവനക്കാര് പിടികൂടി. അനധികൃത സ്വത്തു സമ്പാദന കേസിലെ പ്രതിയും കാണ്പൂരിലെ ഭാര്ഗവ ആശുപത്രി ഉടമയുമായ ശക്തി ഭാര്ഗവയെയാണ് പിടിച്ചത്. ബിജെപി വക്താവ് ജിവിഎല് നരസിംഹറാവു പത്രസമ്മേളനം നടത്തുന്നതിനിടെയാണ് ഇയാള് ഷൂ എറിയാന് ശ്രമിച്ചത്. ഷൂ റാവുവിന്റെ സമീപത്ത് വന്ന് വീണ്ടു. ഉടന് തന്നെ ബിജെപി ഓഫീസ് ജീവനക്കാരും സുരക്ഷാ ജീവനക്കാരും ഇയാളെ കീഴടക്കി പുറത്തേക്ക് കൊണ്ടുപോയി. തുടര്ന്ന് ഐപി എസ്റ്റേറ്റ് പോലീസ് സ്റ്റേഷനിലെത്തിച്ചിട്ടുണ്ട്.
നികുതി തട്ടിപ്പ് കേസിലെ പ്രതിയായ ശക്തി ഭാര്ഗവയ്ക്ക് മാനസിക പ്രശ്നങ്ങളുണ്ടെന്ന് ഇയാളുടെ അഭിഭാഷകന് പറയുന്നു. ഇയാളുമായി ബന്ധപ്പെട്ട എട്ടോളം കമ്പനികളെ നികുതിവകുപ്പിന്റെ അന്വേഷണത്തില് കണ്ടെത്തിയിരുന്നു. പത്തു കോടിയുടെ സ്വത്ത് സമ്പാദനത്തിലാണ് ആദായനികുതിവകുപ്പ് നോട്ടീസ് നല്കിയിരിക്കുന്നത്. ഇതേ തുടര്ന്ന് ഇയാള് പ്രധാനമന്ത്രി നരേന്ദ്രമോദിയുടെ കടുത്ത വിമര്ശകനായി സാമൂഹ്യ മാധ്യമങ്ങളിലടക്കം മാറിയിരുന്നു.
ലക്നൗ,കാണ്പൂര്, വാരണാസി എന്നിവിടങ്ങളിലെ ശക്തി ഭാര്ഗവയുടെ വസതികളിലും മറ്റു സ്ഥാപനങ്ങളിലും നടത്തിയ ആദായ നികുതി റെയ്ഡില് 28 ലക്ഷം രൂപയും അമ്പതു ലക്ഷം രൂപ വിലമതിക്കുന്ന ആഭരണങ്ങളും കണ്ടെത്തിയിരുന്നു. പാര്ട്ടി ഓഫീസില് കടന്നു കയറി നടത്തിയ അതിക്രമത്തെ ശക്തമായ ഭാഷയില് ബിജെപി നേതൃത്വം അപലപിച്ചു. കള്ളപ്പണക്കാര്ക്കും നികുതി വെട്ടിപ്പുകാര്ക്കും ബിജെപിയോടും പ്രധാനമന്ത്രിയോടും തീര്ത്താല് തീരാത്ത പകയാണെന്ന് സംഭവം വ്യക്തമാക്കുന്നതായി ബിജെപി നേതാക്കള് പറഞ്ഞു.
