ന്യൂദല്ഹി : പ്രതിപക്ഷം വീണ്ടും രാജ്യത്തിന്റെ സേനയെ അപമാനിക്കുകയാണ്, രാജ്യം ഇതിന് മാപ്പ് നല്കില്ലെന്ന് പ്രധാനമന്ത്രി നരേന്ദ്രമോദി. ഇന്ത്യന് വ്യോമസേന ബലാകോട്ട് നടത്തിയ തിരിച്ചടിയില് കോണ്ഗ്രസ് നേതാവ് സാം പിത്രോഡ സംശയം പ്രകടിപ്പിച്ചിരുന്നു. ഇതിന് ട്വിറ്ററിലൂടെ നല്കിയ മറുപടിയിലാണ് പ്രധാനമന്ത്രിയുടെ ഈ രൂക്ഷമായ വിമര്ശനം.
പ്രതിപക്ഷം തുടര്ച്ചയായി ഇന്ത്യന് സൈന്യത്തെ സംശയിക്കുകയാണ്. വ്യോമാക്രമണത്തില് വീണ്ടും വീണ്ടും കോണ്ഗ്രസ് സംശയം ഉന്നയിക്കുന്നത് സൈന്യത്തെ നിന്ദിക്കുന്നതിന് തുല്യമാണ്. ഭീകരര്ക്കുള്ള മറുപടിനല്കാന് പുതിയ ഇന്ത്യ പ്രാപ്തരാണ്. തുടര്ച്ചയായി സൈന്യത്തിന്റെ പ്രവര്ത്തിയെ ഇത്തരത്തില് സംശയിക്കുന്നതിന് ജനങ്ങള് മാപ്പ് നല്കില്ലെന്നും പ്രധാനമന്ത്രി അറിയിച്ചു.
അതിനിടെ മുംബൈ ഭീകരാക്രമണത്തിനു പിന്നില് എട്ട് ഭീകരരാണ്. അതിന്റെ പേരില് പാക്കിസ്ഥാനെ ഒന്നടങ്കം കുറ്റപ്പെടുത്തേണ്ടതുണ്ടോയെന്നും പിത്രോഡ ചോദിച്ചതും വിവാദമായി. രാജകുടുംബത്തിന്റെ സേവകന് പുല്വാമയിലെ രക്ത സാക്ഷികളേയും സൈന്യത്തേയും അപമാനിക്കുകയാണെന്ന് മോദി പറഞ്ഞു.
എന്നാല് ഇന്ത്യ സൈന്യത്തിന് ഒപ്പമാണ് നിലകൊള്ളുന്നത്. പ്രതിപക്ഷം കാട്ടുന്ന ഈ കോമാളിത്തം രാജ്യത്തെ 130 കോടി ജനങ്ങള് പൊറുക്കില്ല. ഭീകരരോട് കോണ്ഗ്രസ് പുലര്ത്തിവരുന്ന മൃദു സമീപനത്തിന്റെ തെളിവാണ് ഈ പ്രസ്താവനയെന്നും അദ്ദേഹം കുറ്റപ്പെടുത്തി.
പുല്വാമ ഭീകരാക്രമണം പാര്ട്ടിയുടെ അജണ്ടയാണെന്നും വോട്ട് പിടിക്കുന്നതിനായി മനപ്പൂര്വ്വം ഉണ്ടാക്കിയ ആക്രമണം ആണെന്നും, സമാന്തര സൈനിക വിഭാഗങ്ങള് ഇതില് അതൃപ്തരാണെന്നും സമാജ്വാദി പാര്ട്ടി നേതാവ് രാം ഗോപാല് യാദവ് കഴിഞ്ഞ ദിവസം അറിയിച്ചിരുന്നു. രാം ഗോപാലിന്റെ ഈ പ്രസ്താവനയ്ക്ക് ജനങ്ങള് ഒരിക്കലും മാപ്പ് നല്കില്ലെന്നും പ്രധാനമന്ത്രി വിമര്ശിച്ചു.
അതേസമയം രാജ്യത്തെ ഒരു പൗരനെന്ന നിലയിലാണ് ബലാകോട്ട് വ്യോമാക്രമണം സംശയിച്ചതെന്ന് പറഞ്ഞ് തലയൂരാനുള്ള ശ്രമത്തിലാണ് ഇപ്പോള് പിത്രോഡ.
