ലണ്ടന്: കോടികളുടെ ബാങ്ക് തട്ടിപ്പ് നടത്തി രാജ്യം വിട്ട കേസിലെ പ്രതിയും വജ്ര വ്യാപാരിയുമായ നീരവ് മോദിക്കെതിരെ അറസ്റ്റ് വാറണ്ട്. ലണ്ടനിലെ വെസ്റ്റ്മിന്സ്റ്റര് കോടതിയാണ് വാറണ്ട് പുറപ്പെടുവിച്ചത്. നീരവിനെതിരെ അറസ്റ്റ് വാറണ്ട് പുറപ്പെടുവിക്കണമെന്ന് ഇന്ത്യന് എന്ഫോഴ്സ്മെന്റ് നേരത്തെ ആവശ്യപ്പെട്ടിരുന്നു.
വരുന്ന ഏത് ദിവസം വേണമെങ്കിലും നീരവിനെ അറസ്റ്റ് ചെയ്യാന് സാധ്യതയുണ്ടെന്നാണ് പുറത്ത് വരുന്ന റിപ്പോര്ട്ട്. കഴിഞ്ഞ വര്ഷം ആഗസ്റ്റിലാണ് നീരവിനെ അറസ്റ്റ് ചെയ്യണമെന്ന് ലണ്ടന് കോടതിയോട് ഇന്ത്യ ആവശ്യപ്പെട്ടത്. നീരവ് മോദിയെ അറസ്റ്റ് ചെയ്താല് വെസ്റ്റ് മിന്സ്റ്റര് കോടതിയില് വിചാരണ തുടങ്ങും. കോടതിക്ക് നീരവിനെ കൈമാറാന് അനുവദിച്ചുകൊണ്ട് വിധി പുറപ്പെടുവിക്കാനാകും.
പഞ്ചാബ് നാഷണല് ബാങ്കില്നിന്ന് 13,000 കോടി രൂപയോളം തട്ടിച്ച് മുങ്ങിയ വജ്രവ്യാപാരി നിരവ് മോദി ലണ്ടനില് സുഖജീവിതം നയിക്കുന്നുവെന്ന വാര്ത്ത പുറത്തുവന്നത് ഏതാനും ദിവസം മുന്പാണ്. ലണ്ടനില് താമസിക്കുന്നതിനായി ഗോള്ഡന് വിസയെന്നറിയപ്പെടുന്ന ടയര്-1 ഇന്വെസ്റ്റര് വിസ സ്വന്തമാക്കിയാണ് നീരവ് തന്റെ പദ്ധതികള് നടപ്പിലാക്കിയത്. രണ്ട് മില്യണ് പൗണ്ട് നിക്ഷേപിച്ചാണ് ഡോള്ഡന് വിസ നീരവ് സ്വന്തമാക്കിയത്.
