പീരുമേട്: വണ്ടിപ്പെരിയാര് സത്രത്തിലെ തോട് കൈയേറി സ്വകാര്യവ്യക്തിയുടെ അനധികൃത ചെക്ക്ഡാം നിര്മാണം. മഞ്ചുമല വില്ലേജില്പ്പെട്ട സത്രത്തിലെ സ്വകാര്യ ഏലതോട്ടത്തിലാണ് നിര്മാണം അതിവേഗം പുരോഗമിക്കുന്നത്. തേക്കടി വനത്തില് നിന്നുത്ഭവിച്ച് അഴുതയാറ്റില് എത്തി അവിടെ നിന്നും പമ്പയിലെത്തുന്ന സത്രം തോടാണിത്.
കുത്തക പാട്ട നിയമം ലംഘിച്ചാണ് നിര്മാണ പ്രവര്ത്തനം രഹസ്യമായി നടത്തി വരുന്നത്. ഈ തോട്ടിലെ വെള്ളത്തെ ആശ്രയിച്ചാണ് സത്രത്തിലെ 150 ഓളം കുടുംബങ്ങള് കഴിഞ്ഞ് വരുന്നത്. ചെക്ക്ഡാം നിര്മാണം തുടങ്ങിയതോടെ ഇവര് പ്രതിസന്ധിയിലായി. മണ്ഡലകാലത്ത് ശബരിമലയിലേക്ക് ഇതുവഴി പോകുന്ന തീര്ഥാടകരെയും ഇത് ഏറെ ബാധിക്കുമെന്നാണ് നിഗമനം. ഇത്തരത്തില് നടക്കുന്ന നിര്മാണ പ്രവര്ത്തനങ്ങള് സംബന്ധിച്ച് റവന്യൂ അധികൃതരെ വിവരം അറിയിച്ചിട്ടും വേണ്ട നടപടി ഒന്നും ഉണ്ടായില്ലന്ന് സത്രം നിവാസികള് കുറ്റപ്പെടുത്തുന്നു.
രണ്ട് ഹിറ്റാച്ചിയും നിരവധി തൊഴിലാളികളും ഇപ്പോഴും നിര്മാണം നടത്തി വരികയാണ്. കഴിഞ്ഞ ഒരു മാസമായി ജോലി നടക്കുന്നു. തേക്കടി വനാതിര്ത്തിയിലുള്ള മേഖലയാണിത്. സംഭവം അറിഞ്ഞില്ലെന്നും ഉടന് പരിശോധിക്കുമെന്നുമാണ് മഞ്ചുമല വില്ലേജ് ഓഫീസര് ഇത് സംബന്ധിച്ച് നല്കുന്ന പ്രതികരണം.
