കോട്ടയം: ബിജെപി ന്യൂനപക്ഷ മോര്‍ച്ച സംസ്ഥാന സമ്മേളനത്തിന് കോട്ടയത്ത് തുടക്കം. ഇന്നലെ വൈകിട്ട് കോട്ടയം ഗാന്ധി സ്‌ക്വയറില്‍ ന്യൂനപക്ഷ മോര്‍ച്ച സംസ്ഥാന പ്രസിഡന്റ് അഡ്വ. നോബിള്‍ മാത്യു പതാക ഉയര്‍ത്തി. കാലാകാലങ്ങളില്‍ കോണ്‍ഗ്രസിനെ പിന്തുണച്ചിരുന്ന 46 ശതമാനത്തോളം വരുന്ന കേരളത്തിലെ മതന്യൂനപക്ഷങ്ങള്‍ മാറിച്ചിന്തിച്ചു തുടങ്ങിയെന്ന് അദ്ദേഹം പറഞ്ഞു. സംസ്ഥാന സമിതിയോഗവും നോബിള്‍ മാത്യു ഉദ്ഘാടനം ചെയ്തു.
തുടര്‍ന്ന് രാഷ്‌ട്രീയ- സാമ്പത്തിക പ്രമേയങ്ങള്‍ അവതരിപ്പിച്ചു. ഭാരതത്തിന്റെ പരമവൈഭവത്തിന് വേണ്ടി അഹോരാത്രം പ്രവര്‍ത്തിക്കുന്ന പ്രധാനമന്ത്രി നരേന്ദ്ര മോദിയുടെ ഭരണം വീണ്ടും വരണമെന്ന് രാഷ്‌ട്രീയ പ്രമേയം പറയുന്നു. മുന്നാക്ക സമുദായങ്ങളില്‍ സാമ്പത്തികമായി പിന്നാക്കം നില്‍ക്കുന്നവര്‍ക്ക് സംവരണം ഏര്‍പ്പെടുത്തിയ തീരുമാനം ശ്ലാഘനീയമാണെന്ന് സാമ്പത്തിക പ്രമേയം അഭിപ്രായപ്പെട്ടു.
ന്യൂനപക്ഷ മോര്‍ച്ച സംസ്ഥാന ജനറല്‍ സെക്രട്ടറി സി.പി. സെബാസ്റ്റ്യന്‍, സെക്രട്ടറിമാരായ ബിജോയ് തോമസ്, റിസണ്‍ ചെവിടന്‍, സംസ്ഥാന സമിതിയംഗങ്ങളായ കെ.സി. അബ്രഹാം, ഡോ. ജോജി ഏബ്രഹാം, നാസര്‍ റാവുത്തര്‍, പ്രഫ. വര്‍ക്കി മാത്യു, ടി.കെ. ഫിലിപ്പ് തുടങ്ങിയവര്‍ സംസാരിച്ചു.
ഇന്നത്തെ ന്യൂനപക്ഷ മഹാസംഗമത്തോടെ സംസ്ഥാന സമ്മേളനം സമാപിക്കും. ഉച്ചയ്ക്ക് മൂന്നിന് കോട്ടയം മാമ്മന്‍ മാപ്പിള ഹാളിലാണ് സമ്മേളനം.
