ന്യൂദല്ഹി: റഫാല് കരാറിലെ കോണ്ഗ്രസ് ചതി തുറന്നുകാട്ടി പ്രധാനമന്ത്രി നരേന്ദ്ര മോദി. റഫാല് വിമാനങ്ങള് ഇന്ത്യക്ക് നേരത്തെ ലഭിച്ചിരുന്നെങ്കില് പാക്കിസ്ഥാനെതിരായ ഭീകരവിരുദ്ധ പോരാട്ടത്തിന്റെ ഫലം മറ്റൊന്നായേനെയെന്ന് വ്യോമാക്രമണം ചൂണ്ടിക്കാട്ടി മോദി പറഞ്ഞു. ”എന്തുകൊണ്ടാണ് ഇതുവരെ റഫാല് വാങ്ങാതിരുന്നത്. റഫാല് ഇല്ലാതിരുന്നതിന്റെ നഷ്ടം ഇപ്പോള് അനുഭവിച്ചറിയുകയാണ്. കരാറിനെ രാഷ്ട്രീയവത്കരിക്കുന്ന കോണ്ഗ്രസ് രാജ്യസുരക്ഷയെ അപകടപ്പെടുത്തുന്നു.” ദല്ഹിയില് ഇന്ത്യാ ടുഡെ കോണ്ക്ലേവില് അദ്ദേഹം ആഞ്ഞടിച്ചു.
പൊതുതെരഞ്ഞെടുപ്പില് കേന്ദ്ര സര്ക്കാരിനെതിരെ ഏറ്റവും വലിയ ആയുധമായി കോണ്ഗ്രസ് കരുതിവച്ചത് റഫാല് കരാറാണ്. ഇതിനായി അന്താരാഷ്ട്ര ഏജന്സികളുടെ സഹായത്തോടെ അര്ധസത്യങ്ങളും നുണകളും പ്രചരിപ്പിച്ച് വരികയായിരുന്നു രാഹുലും സംഘവും. എന്നാല് പുതിയ സംഭവങ്ങളോടെ കരാര് വൈകിപ്പിച്ച കോണ്ഗ്രസ്സിലേക്കാണ് ആരോപണങ്ങള് നീളുന്നത്. വ്യോമസേനയുടെ വര്ഷങ്ങളായുള്ള ആവശ്യമായിരുന്നു റഫാലെങ്കിലും യുപിഎ സര്ക്കാര് അവഗണിച്ചു. എന്നാല് മോദിയാണ് കരാര് വൈകിപ്പിച്ചതെന്ന വിചിത്രവാദവുമായി രാഹുല് രംഗത്തെത്തി.
ഇന്ത്യയുടെ വിദേശ നയത്തിന്റെ ഫലങ്ങള് ഇപ്പോള് ജനങ്ങള്ക്ക് കാണാന് സാധിക്കുന്നുണ്ടെന്ന് പ്രധാനമന്ത്രി വിശദീകരിച്ചു. രാജ്യത്തിന്റെ ഐക്യം അകത്തും പുറത്തുമുള്ള ശത്രുക്കളില് ഭയം ഉണ്ടാക്കിയിട്ടുണ്ട്. അകത്തും പുറത്തുമുള്ള ശത്രുക്കളെന്ന് മോദി പ്രസംഗത്തില് ആവര്ത്തിക്കുകയും ചെയ്തു. ശത്രുക്കള് ഇന്ത്യയുടെ ധൈര്യവും ഭീകരവാദത്തിന്റെ സംരക്ഷകര് സൈന്യത്തിന്റെ ഉശിരും ഭയക്കുന്നത് നല്ലതാണ്. സൈനികരും സാധാരണക്കാരും കൊല്ലപ്പെട്ടപ്പോള് മുന് സര്ക്കാര് ഒന്നും ചെയ്തില്ല. സൈനികരുടെ ഓരോ തുള്ളി ചോരയും ഈ സര്ക്കാരിന് വിലപ്പെട്ടതാണ്. ഭയമില്ലാത്ത, നിശ്ചയദാര്ഢ്യമുള്ള പുതിയ ഇന്ത്യയാണ് ഇപ്പോഴുള്ളത്. ഒരാളും നമ്മളെ വെല്ലുവിളിക്കാന് ധൈര്യപ്പെടില്ല.
പ്രതിപക്ഷത്തെ രൂക്ഷമായി വിമര്ശിച്ച മോദി രാജ്യം മുഴുവന് സൈന്യത്തിനൊപ്പം തോളോടുതോള് ചേര്ന്ന് നിലകൊണ്ടപ്പോള് ചിലയാളുകള് രാജ്യത്തിന്റെ കാവല്ക്കാരെ അവിശ്വസിച്ചതായി കുറ്റപ്പെടുത്തി. ഒരു വശത്ത് ലോകം മുഴുവന് ഭീകരതയ്ക്കെതിരായ ഇന്ത്യയുടെ പോരാട്ടത്തെ പിന്തുണയ്ക്കുന്നു. മറുവശത്ത് ചില പാര്ട്ടികള് സംശയം ഉന്നയിക്കുന്നു. ഇതേയാളുകളുടെ വാക്കുകളും ചിത്രങ്ങളുമാണ് ഇന്ത്യക്കെതിരായ തെളിവുകളായി പാക്കിസ്ഥാന് പാര്ലമെന്റിലും അവരുടെ റേഡിയോയിലും ഉയര്ത്തിക്കാട്ടപ്പെട്ടത്. മോദിയെ എതിര്ത്ത് അവരിപ്പോള് രാജ്യത്തെയും എതിര്ക്കാന് തുടങ്ങിയിരിക്കുന്നു. അദ്ദേഹം ചൂണ്ടിക്കാട്ടി.
