ന്യൂദല്ഹി: ബലാക്കോട്ടിലെ ഭീകരക്യാമ്പുകള് തകര്ത്ത സൈന്യത്തിന്റെ നടപടിയെ അപമാനിക്കുന്നത് കോണ്ഗ്രസ് നേതാക്കള് തുടരുന്നു. തകര്ന്ന ക്യാമ്പുകളുടെ തെളിവു വേണമെന്നും കൊല്ലപ്പെട്ട ഭീകരരുടെ കണക്കു വേണമെന്നും മൃതദേഹങ്ങളുടെ ചിത്രങ്ങള് വേണമെന്നുമൊക്കെയുള്ള വിചിത്ര വാദങ്ങളാണ് കോണ്ഗ്രസ് നേതാക്കളുടേത്. വിങ് കമാന്ഡര് അഭിനന്ദന് വര്ത്തമാനെ അപമാനിക്കുന്നതടക്കമുള്ള പ്രസ്താവനകളും അവരുടെ ഭാഗത്ത് നിന്ന് പുറത്തുവരുന്നു.
അഭിനന്ദന് യുദ്ധ വിമാനം പറത്താന് കഴിവു നേടിയത് യുപിഎ ഭരണകാലത്തെന്ന് സല്മാന് ഖുര്ഷിദ്
ന്യൂദല്ഹി: മാര്ച്ച് ഒന്നിന് രാജ്യം മുഴുവന് വിങ് കമാന്ഡര് അഭിനന്ദന്റെ ഇന്ത്യയിലേക്കുള്ള തിരിച്ചുവരവില് ആഹ്ലാദിച്ചപ്പോള് അദ്ദേഹത്തിന്റെ വീരോചിത മടങ്ങിവരവ് ചെറുതാക്കി ചിത്രീകരിക്കാന് കോണ്ഗ്രസ് നേതാവ് സല്മാന് ഖുര്ഷിദിന്റെ ശ്രമം. 2004ല് വ്യോമസേനയില് ചേര്ന്ന അഭിനന്ദന് യുദ്ധവിമാനം പറത്താന് ശേഷി നേടിയത് യുപിഎ ഭരണകാലത്താണെന്ന വിചിത്ര വാദവുമായി ഖുര്ഷിദ് രംഗത്തെത്തി. ട്വിറ്ററിലൂടെയാണ് സൈന്യത്തെയും അഭിനന്ദിനെയും അപമാനിച്ച് മുന്കേന്ദ്രമന്ത്രി കൂടിയായ ഇദ്ദേഹത്തിന്റെ പോസ്റ്റ്.
അഭിനന്ദനിന്റെ ധീരതയെ പുകഴ്ത്തിയുള്ള ട്വീറ്റിനൊടുവിലാണ് ഖുര്ഷിദ് ഇങ്ങനെ എഴുതിച്ചേര്ത്തത്.
പാക്കിസ്ഥാന് സൈന്യത്തിന്റെ കൈയിലകപ്പെട്ടിട്ടും രാജ്യത്തിന്റെ അഭിമാനമുയര്ത്തി ധൈര്യപൂര്വം നിന്ന അഭിനന്ദനെ രാജ്യം മുഴുവന് ആദരിക്കുന്നതിനിടെയാണ് ഖുര്ഷിദിന്റെ ഈ കണ്ടെത്തലുകള്.
ഇതാദ്യമായല്ല സമൂഹമാധ്യമങ്ങളിലൂടെ കോണ്ഗ്രസ് നേതാക്കള് തെറ്റായ വിവരങ്ങള് പ്രചരിപ്പിക്കുന്നത്. നടി ശ്രീദേവി മരിച്ചപ്പോള് ആദരാഞ്ജലി അര്പ്പിച്ച് പോസ്റ്റ് ചെയ്ത ട്വീറ്റില് 2013ല് യുപിഎ സര്ക്കാര് ഇവരെ പത്മശ്രീ നല്കി ആദരിച്ചിരുന്നുവെന്ന് പറഞ്ഞിരുന്നു. എന്നാല്, തെറ്റ് വ്യക്തമായതോടെ നിമിഷങ്ങള്ക്കകം പോസ്റ്റ് പിന്വലിച്ചു.
ബലാക്കോട്ടിലെ വ്യോമാക്രമണത്തിന് തെളിവ് വേണമെന്ന് ദിഗ്വിജയ് സിങ്
ഇന്ഡോര്: ബലാക്കോട്ടിലെ വ്യോമസേനാ നടപടിയെ അപമാനിച്ച് മധ്യപ്രദേശ് മുന്മുഖ്യമന്ത്രി കൂടിയായ മുതിര്ന്ന കോണ്ഗ്രസ് നേതാവ് ദിഗ്വിജയ് സിങ്. ബലാക്കോട്ടില് ജെയ്ഷെ മുഹമ്മദിന്റെ ഭീകരകേന്ദ്രം തകര്ത്ത് ഇന്ത്യന് വ്യോമസേന നല്കിയ തിരിച്ചടിയുടെ തെളിവ് കേന്ദ്രം നല്കണമെന്നാണ് ദിഗ്വിജയ് സിങ്ങിന്റെ ആവശ്യം.
തുറന്ന സ്ഥലങ്ങളിലെ ആക്രമണങ്ങള്ക്ക് ശേഷമുള്ള ചിത്രങ്ങള് സാറ്റലൈറ്റ് വഴി ലഭിക്കും. അതിനാല് തെളിവ് കാണിക്കണം. ഒസാമ ബിന്ലാദനെ കൊലപ്പെടുത്തിയ ചിത്രങ്ങള് അമേരിക്ക ലോകത്തിന് മുന്നില് അവതരിപ്പിച്ചു. അതുപോലെ ഇതും കാണിക്കണം, അദ്ദേഹം ആവശ്യപ്പെട്ടു. ഇന്ത്യയുടെ ശക്തമായ സമ്മര്ദത്താലാണ് അഭിനന്ദനെ മോചിപ്പിച്ചതെന്ന് മറച്ചുവച്ച് പാക്കിസ്ഥാന് പ്രധാനമന്ത്രി ഇമ്രാന്ഖാനെ സിങ് പുകഴ്ത്തി. ലഷ്കര് ഇ തൊയ്ബ നേതാവ് ഹഫീസ് സയിദിനെയും മസൂദ് അസ്ഹറിനേയും തിരിച്ചേല്പ്പിക്കാനുള്ള ധൈര്യം ഇമ്രാന് കാണിക്കണമെന്നും അദ്ദേഹം ആവശ്യപ്പെട്ടു.
