കന്യാകുമാരി: പാക് വിമാനത്തെ പിന്തുടര്‍ന്ന് വെടിവച്ചുവീഴ്‌ത്തിയ വ്യോമസേനാ ഉദ്യോഗസ്ഥന്‍ വിങ്് കമാന്‍ഡര്‍ അഭിനന്ദന്‍ രാജ്യത്തിന്റെ അഭിമാനമാണെന്ന് പ്രധാനമന്ത്രി നരേന്ദ്ര മോദി. കന്യാകുമാരിയില്‍ പൊതുസമ്മേളനത്തെ അഭിസംബോധന ചെയ്തു സംസാരിക്കുകയായിരുന്നു പ്രധാനമന്ത്രി.
ധീര സൈനികന്‍ തമിഴ്‌നാട്ടുകാരനായതില്‍ നമുക്ക് ഓരോരുത്തര്‍ക്കും സന്തോഷിക്കാം. കൃത്യമായ നടപടികളിലാണ് തന്റെ സര്‍ക്കാര്‍ വിശ്വസിക്കുന്നത്. ഉറിയില്‍ ഭീകരാക്രണം നടന്നു. അതിനു ശേഷം നമ്മുടെ വീര സൈനികര്‍ എന്താണ് ചെയ്തതെന്നും നാം കണ്ടു. പുല്‍വാമയിലെ ഭീകരാക്രമണത്തിനു പിന്നാലെ നമ്മുടെ വ്യോമസേനാ എന്താണ് ചെയ്തതെന്നും നാം കണ്ടു. മോദി വരും, പോകും. പക്ഷെ ഇന്ത്യ ശക്തമായി തുടരും. നിങ്ങളുടെ രാഷ്‌ട്രീയം ശക്തമാക്കാം. പക്ഷെ അതിന് രാജ്യത്തെ ദുര്‍ബലമാക്കേണ്ടതില്ല. പക്ഷെ ചില രാഷ്‌ട്രീയ പാര്‍ട്ടികള്‍ അവരുടെ മോദിയോടുള്ള വെറുപ്പ് ഒരു സംശയമാക്കി മാറ്റിയിരിക്കുന്നു.
രാജ്യം ഒന്നടങ്കം നമ്മുടെ സായുധ സേനയെ പിന്തുണയ്‌ക്കുമ്പോള്‍ ചില പാര്‍ട്ടികള്‍ ഭീകരതയ്‌ക്ക് എതിരായ നമ്മുടെ പോരാട്ടത്തെത്തന്നെ സംശയിക്കുകയാണ്. രണ്ടു ദിവസമായി നടന്നുവരുന്ന സംഭവ വികാസങ്ങള്‍ നമ്മുടെ സായുധ സേനയുടെ ശക്തിയാണ് തെളിയിക്കുന്നത്. കാലങ്ങളായി ഇന്ത്യ ഭീകരത അനുഭവിക്കുകയാണ്. പക്ഷെ ഇപ്പോള്‍ അതിന് ഒരു മാറ്റമുണ്ട്. ഭീകരതയ്‌ക്കു മുന്‍പില്‍ നാം ഇനി ഒരിക്കലും തലകുനിക്കില്ല.
ഒരു റാങ്ക് ഒരു പെന്‍ഷന്‍ പദ്ധതി തന്റെ സര്‍ക്കാര്‍ നടപ്പാക്കിയ ചരിത്രം കുറിച്ച നടപടിയാണ്.പ്രധാനമന്ത്രി പറഞ്ഞു.
മധുരയ്‌ക്കും ചെന്നൈക്കു മിടയ്‌ക്കുള്ള അതിവേഗ ട്രെയിന്‍ തേജസ് ഫ്‌ളാഗ് ഓഫ് ചെയ്ത ശേഷം നിരവധി വികസന പ്രവര്‍ത്തനങ്ങള്‍ക്കും പ്രധാനമന്ത്രി തുടക്കം കുറിച്ചു.
