കൊച്ചി: ശബരിമല ആചാരലംഘനത്തിനെതിരെ ഹൈന്ദവ വിശ്വാസികള് ഹര്ത്താല് ആഹ്വാനം ചെയ്തപ്പോള് അതിനെതിരെ സിപിഎമ്മിനൊപ്പം ചേര്ന്നു പ്രതിഷേധിച്ച കോണ്ഗ്രസ് അര്ധരാത്രിയില് ഹര്ത്താല് പ്രഖ്യാപിച്ച് ജനങ്ങളെ ദ്രോഹിച്ചു.
ശബരിമലയില് ആക്ടിവിസ്റ്റുകളെ മലചവിട്ടിച്ച് വിശ്വാസങ്ങളെ ചവുട്ടി മെതിച്ചപ്പോള് വിശ്വാസികള് ഹര്ത്താല് നടത്തി പ്രതിഷേധിച്ചിരുന്നു. മിന്നല് ഹര്ത്താല് പാടില്ലെന്നാണ് പ്രതിപക്ഷ നേതാവ് രമേശ് ചെന്നിത്തല നിയമസഭയില് ഭരണപക്ഷത്തിനു പിന്തുണയേകി സംസാരിച്ചത്. ആരെ പിന്തുണച്ചോ അവരില് നിന്നു അടി കിട്ടിയപ്പോള് നയം പെട്ടെന്ന് തിരുത്തി. നാമജപത്തിനെതിരെ ലോകം മുഴുവന് പ്രസ്താവന നടത്തിയ ശശി തരൂര് എംപി കൊലപാതകത്തെ അപലപിച്ച് ട്വിറ്ററില് ഒന്നും എഴുതിയില്ല. തിരുവനന്തപുരത്ത് വീണ്ടും മത്സരിക്കുകയണെങ്കില് സിപിഎമ്മിന്റെ സഹായം വേണ്ടിവരുമെന്ന് തരൂരിന് അറിയാം. എല്ലാ ഹര്ത്താലിനെയും എതിര്ക്കുന്ന വി.ഡി. സതീശന് എംഎല്എയുടെ പ്രസ്താവനയും പുറത്ത് വന്നിട്ടില്ല.
ഹര്ത്താലില് ഹൈക്കോടതിയും ഇടപെട്ടു. സ്വമേധയാ കേസെടുത്തു. യൂത്ത് കോണ്ഗ്രസ് സംസ്ഥാന പ്രസിഡന്റ് ഡീന് കുര്യാക്കോസ്, കാസര്കോഡ് ജില്ലാ യുഡിഎഫ് ചെയര്മാന് എം.സി. കമറുദ്ദീന്, ജില്ലാ യുഡിഎഫ് കണ്വീനര് എ. ഗോവിന്ദന് നായര് എന്നിവര്ക്കെതിരെയാണ് ഹൈക്കോടതി സ്വമേധയാ കോടതിയലക്ഷ്യക്കേസെടുത്തത്. അടുത്ത ഫെബ്രുവരി 22ന് നേരിട്ട് ഹാജരായി വിശദീകരണം നല്കാന് ഇവര്ക്ക് പോലീസ് മുഖേന നോട്ടീസ് നല്കാനും ചീഫ് ജസ്റ്റീസ് ഉള്പ്പെട്ട ഡിവിഷന് ബെഞ്ച് നിര്ദേശം നല്കി.
പൊതു അവശ്യ സര്വീസുകളെ തടയുന്നതും കുട്ടികള്ക്ക് പഠിക്കാന് പോകാനാവാത്ത സാഹചര്യവും അനുവദിക്കാനാവില്ലെന്ന് ഹൈക്കോടതി അഭിപ്രായപ്പെട്ടു.
