തിരുവനന്തപുരം: പോത്തന്കോട് കാഞ്ഞാംപാറ, കള്ളിക്കാട്, നെയ്യാറ്റിന്കര എന്നിവിടങ്ങളിലെ ചിന്താലയ ആശ്രമങ്ങളുടെ സ്ഥാപകനും മഠാധിപതിയും ആയിരുന്ന സ്വാമി ചിന്താലയേശന്റെ (ആലയില് സ്വാമി) തിരുജയന്തി ആഘോഷം, പോത്തന്കോട് കാഞ്ഞാംപാറ ആശ്രമത്തില് ഇന്നു (ജൂണ് 17) മുതല് 21 വരെ നടക്കും.
അഖണ്ഡനാമജപയജ്ഞം, ഹോമങ്ങള്, പൂജകള് തുടങ്ങിയവ ആഘോഷ പരിപാടിയില് ഉള്പ്പെടുത്തിയിരിക്കുന്നു. ജയന്തി ദിനമായ ജൂണ് 20 ശനിയാഴ്ച രാവിലെ 6 മണി മുതല് മഹാഗണപതി ഹോമം, മഹാമൃത്യുഞ്ജയഹോമം, നവഗ്രഹ പൂജ, ഗുരുപൂജ, മഹാഗണപതിക്ക് അഭിഷേകം, ചക്രാബ്ജപൂജ, സുദര്ശന ഹോമം, ഭഗവതിസേവ എന്നിവയും 10.30 ന് തിരുനാള് സദ്യയും ഉണ്ടാകും. ആദ്യനാള് പ്രഭാതത്തില് ആരംഭിക്കുന്ന അഖണ്ഡനാമജപയഞ്ജം ജയന്തി ദിനത്തില് വൈകുന്നേരം 6.30ന് സമാപിക്കും.
സ്വാമി ചിന്താലയേശന്റെ അഞ്ചാം സമാധിവാര്ഷികം ജൂണ് 26(വെള്ളിയാഴ്ച) ആചരിക്കും. സ്വാമിയുടെ സമാധി സ്ഥിതി ചെയ്യുന്ന പോത്തന്കോട് കാഞ്ഞാംപാറ ആശ്രമത്തില് രാവിലെ 5 മണിക്ക് ഗണപതി ഹോമത്തോടെ ആരംഭിച്ച് കലശപൂജ, യോഗീശ്വരപൂജ, ഗുരുപാദുക പൂജ, 7 മുതല് 8 വരെ ഗുരുപൂജ, 8 മണിക്ക് രുദ്രഹോമവും, രുദ്രാഭിഷേകത്തിനുള്ള കലശപൂജയും ഉണ്ടായിരിക്കും. പതിനൊന്നു മണിക്കുള്ള മഹാദീപാരാധനയോടു കൂടി മഹാസമാധി ദിനപൂജാദികള് അവസാനിക്കും. അഖണ്ഡനാമജപയഞ്ജം രാവിലെ 8ന് ആരംഭിച്ച് വൈകുന്നേരം 7.30ന് അവസാനിക്കും.
സ്വാമി ചിന്താലയേശന്റെ മൂന്ന് ആശ്രമങ്ങളിലും ആറ് പതിറ്റാണ്ടുകളായി നടത്തി വരുന്ന അന്നദാനം ആഘോഷ ദിനങ്ങളിലും, സമാധിവാര്ഷികത്തിലും ഉണ്ടായിരിക്കുന്നതാണെന്നും, സ്വാമിയുടെ ദര്ശനങ്ങള് പൂര്ണ്ണമായും പാലിച്ചുകൊണ്ടാണ് ആഘോഷ പരിപാടികള് സംഘടിപ്പിച്ചിരിക്കുന്നതെന്നും ആശ്രമ കണ്വീനര് ജയകുമാര് അറിയിച്ചു.
