ചെന്നൈ: തമിഴ്നാട്ടില് ലോക്സഭാ സിറ്റ് വിഭജനത്തില് ബിജെപി-എഐഎഡിഎംകെ സഖ്യം ധാരണയിലെത്തി. പുതുച്ചേരിയിലെ ഒരു സീറ്റടക്കം തമിഴ്നാട്ടിലെ ആകെയുള്ള 40 സീറ്റുകള് 25-15 എന്ന നിലയില് വിഭജിക്കുവാനാണ് തീരുമാനം. മുഖ്യമന്ത്രി എടപ്പാടി പളനിസ്വാമി, ഉപമുഖ്യമന്ത്രി ഒ. പനീര്സെല്വം എന്നിവര് കേന്ദ്ര ധനമന്ത്രി പീയുഷ് ഗോയലുമായി വ്യാഴാഴ്ച രാത്രി നടത്തിയ ചര്ച്ചയിലാണ് തീരുമാനമായത്. ഇരുപാര്ട്ടികളും തങ്ങള്ക്ക് ലഭിച്ച സീറ്റുകള് ചെറുകക്ഷികളുമായി പങ്കിടും.
ബിജെപിക്ക് ലഭിച്ച പതിനഞ്ച് സീറ്റുകളില് എട്ടെണ്ണത്തില് സ്വന്തം സ്ഥാനാര്ഥികളെ നിര്ത്തും. ബാക്കി നാലു സീറ്റുകള് പിഎംകെയ്ക്കും മൂന്നെണ്ണം ഡിഎംഡികെയ്ക്കും നല്കും. എഐഎഡിഎംകെയുടെ 25 സീറ്റുകളില് നിന്ന് ടിഎംസി, എന്ആര്സി, പിടി എന്നീ ചെറു കക്ഷികള്ക്കു കൂടി പങ്കുവെക്കും.
അടുത്തയാഴ്ച നടക്കാനിരിക്കുന്ന രണ്ടാം വട്ട ചര്ച്ചയിലാണ് ഓരോ ചെറു കക്ഷികള്ക്കും നല്കേണ്ട സീറ്റുകളുടെ എണ്ണത്തില് അന്തിമ തീരുമാനമാകുക. എന്നാല്, എല്ലാ ഘടകകക്ഷികള്ക്കും സീറ്റുകള് ലഭ്യമാകുമോ എന്ന് ഉറപ്പില്ല.
ചെന്നൈ ആള്വാര്പേട്ടില് നടന്ന ചര്ച്ചയില് കേന്ദ്ര മന്ത്രി പൊന് രാധാകൃഷ്ണന്, ബിജെപി സംസ്ഥാന അധ്യക്ഷന് തമിളിസൈ സൗന്ദര്രാജന് എന്നിവരും പങ്കെടുത്തു. ചര്ച്ചയുടെ വിശദ വിവരങ്ങള് പീയുഷ് ഗോയല്, ബിജെപി ദേശീയ അധ്യക്ഷന് അമിത് ഷാ, എഐഡിഎംകെയിലെ മുതിര്ന്ന നാല് നേതാക്കള് എന്നിവര്ക്കു മാത്രമാണ് ലഭ്യമായിരിക്കുന്നത്.
