ഇടുക്കി: റെക്കോഡുകള് പഴങ്കഥയാക്കി സംസ്ഥാനത്ത് പുതുവര്ഷത്തില് ആരംഭിച്ച തണുപ്പ് തുടരുന്നു. ഇന്നലെ രാവിലെ 8.30ന് അവസാനിച്ച 24 മണിക്കൂറിനിടെ പുനലൂരില് രേഖപ്പെടുത്തിയ 15.5 ഡിഗ്രി സെല്ഷ്യസാണ് പുതിയ റെക്കോഡ്. കേന്ദ്ര അന്തരീക്ഷ ശാസ്ത്ര കേന്ദ്രത്തിന്റെ കഴിഞ്ഞ 10 വര്ഷത്തെ കണക്കുകള് (ലഭ്യമായത്) പ്രകാരം സംസ്ഥാനത്ത് രേഖപ്പെടുത്തുന്ന ഏറ്റവും കുറഞ്ഞ താപനിലയാണിത്.
ഈ വര്ഷം ആദ്യം കോട്ടയത്താണ് പുതിയ റെക്കോഡ് സ്ഥാപിച്ച് ഏറ്റവും കുറവ് ചൂട് രേഖപ്പെടുത്തിയത്. ജനുവരി രണ്ടിന് രേഖപ്പെടുത്തിയ 16 ഡിഗ്രി സെല്ഷ്യസായിരുന്നു ഇത്. പുനലൂരില് ഇതിലും കുറഞ്ഞ ചൂട് രേഖപ്പെടുത്തിയെങ്കിലും 1975ല് കോട്ടയത്ത് രേഖപ്പെടുത്തിയ 16.9 ഡിഗ്രി സെല്ഷ്യസ് ഇതോടെ പഴങ്കഥയായി. രാത്രി സമയത്തെ തണുപ്പിനേക്കാള് ഇരട്ടിയിലധികമാണ് പകല് സമയത്ത് പുനലൂരിലെ ചൂട്. മലയോര മേഖലയ്ക്ക് ഭാവിയില് ഇത് ദോഷകരമാകുമെന്നും വിദഗ്ധര് ചൂണ്ടിക്കാട്ടുന്നു.
ഇതിന് മുമ്പ് 2012ലാണ് പുനലൂരില് സമാനമായ തണുപ്പ് രേഖപ്പെടുത്തുന്നത്. അന്ന് ജനുവരി 18,19 നും 16.6 ഡിഗ്രി സെല്ഷ്യസായിരുന്നു കുറഞ്ഞചൂട്, കൂടിയ ചൂട് 35.6 ഡിഗ്രി സെല്ഷ്യസ്. 1968 ജനുവരി എട്ടിന് രേഖപ്പെടുത്തിയ 12.9 ഡിഗ്രി സെല്ഷ്യസാണ് കേരളത്തിലെ എക്കാലത്തെയും കുറഞ്ഞ ചൂട്. അന്തരീക്ഷ ശാസ്ത്ര കേന്ദ്രത്തിന് കേരളത്തിലാകെ 12 സ്റ്റേഷനുകളുണ്ടെങ്കിലും താപനില താരതമ്യം ചെയ്യുന്നതിന് സൗകര്യമുള്ളത് ഏഴിടങ്ങളിലാണ്. കൊച്ചി, കോട്ടയം, തിരുവനന്തപുരം, പുനലൂര്, കോഴിക്കോട്, ആലപ്പുഴ, കണ്ണൂര് എന്നിവിടങ്ങളില്.
