ദുബായ്: ശബരിമല പ്രശ്നത്തില് വിചിത്രമായ നിലപാടുമായി കോണ്ഗ്രസ് പ്രസിഡന്റ് രാഹുല് ഗാന്ധി. ആചാരലംഘനത്തിനെതിരെ കേരളത്തില് ഭക്തജനങ്ങള് സംഘടിപ്പിച്ച വലിയ പോരാട്ടത്തില് ഒളിച്ചുകളിച്ച കോണ്ഗ്രസിന്റെ ഇരട്ടത്താപ്പു തുറന്നു കാട്ടുന്ന നിലപാടാണ് രാഹുല് ഗാന്ധിയും വ്യക്തമാക്കുന്നത്.
ശബരിമലയില് ആചാരവും സംരക്ഷിക്കണം, സ്ത്രീകളുടെ അവകാശവും സംരക്ഷിക്കണം, രാഹുല് പറഞ്ഞു. യുഎഇ സന്ദര്ശനത്തിനിടയ്ക്ക് പത്രസമ്മേളനത്തില് സംസാരിക്കുമ്പോഴാണ് രാഹുല് പാര്ട്ടിയുടെ മാറിയ നിലപാടു വ്യക്തമാക്കിയത്.
ആചാരം സംരക്ഷിക്കപ്പെടേണ്ടതാണെന്ന വാദത്തില് കാര്യമുണ്ടെന്ന് എനിക്കു തോന്നുന്നു. അതേസമയം, സ്ത്രീകളുടെ അവകാശം സംരക്ഷിക്കേണ്ടതാണെന്ന വാദത്തിലും കാര്യമുണ്ട്. കേരളത്തിലെ കോണ്ഗ്രസ് നേതൃത്വവുമായി ആശയവിനിമയം നടത്തിയാണ് ഈ നിലപാടു താന് സ്വീകരിക്കുന്നതെന്നും രാഹുല് പറഞ്ഞു.
കേരളത്തില് ശബരിമല പ്രക്ഷോഭം തുടങ്ങിയ നാള് മുതല് കോണ്ഗ്രസില് ആശയക്കുഴപ്പം വ്യക്തമായിരുന്നു. പ്രത്യക്ഷ സമരത്തില് നിന്നു പിന്മാറിയ കേരളത്തിലെ കോണ്ഗ്രസ് നേതാക്കള് പിന്നീട് പ്രസ്താവനകളില് മാത്രം ഒതുങ്ങി. കേരളാ ഘടകത്തോടുള്ള എതിര്പ്പ് ദേശീയ നേതൃത്വം പലപ്പോഴും പ്രകടിപ്പിക്കുകയും ചെയ്തു.
ഭക്തര്ക്കൊപ്പമാണെന്ന് കേരളത്തിലെ കോണ്ഗ്രസ് പ്രഖ്യാപിച്ചപ്പോള്, കഴിഞ്ഞ ഒക്ടോബറില് അതില് നിന്നു വിരുദ്ധമായാണ് രാഹുല് സംസാരിച്ചത്. കേരളത്തിലെ പാര്ട്ടിയുടെ നിലപാടിനോടു താന് വിയോജിക്കുന്നു എന്ന് തുറന്നടിച്ചു. സ്ത്രീയും പുരുഷനും തുല്യരാണെന്നും എവിടെ വരെ പോകാനും സ്ത്രീകളെ അനുവദിക്കണമെന്നും പറഞ്ഞ രാഹുലാണ് ഇന്നലെ ശബരിമലയില് ആചാരവും സംരക്ഷിക്കണം എന്നു തിരുത്തിപ്പറഞ്ഞത്.
ശബരിമല യുവതീപ്രവേശന വിഷയം സങ്കീര്ണമാണെന്ന് ഇപ്പോഴാണ് മനസ്സിലായതെന്നാണ് നിലപാടു മാറ്റത്തിനുള്ള ന്യായീകരണമായി രാഹുല് പറയുന്നത്. സ്ത്രീസമത്വം സംരക്ഷിക്കപ്പെടണം. എന്നാല്, ആചാരങ്ങള് സംരക്ഷിക്കപ്പെടണമെന്ന വാദത്തിലും കഴമ്പുണ്ട്, ഇന്നലെ രാഹുല് പറഞ്ഞു. ഇക്കാര്യത്തില് കേരളത്തിലെ ജനങ്ങള് ഉചിതമായ തീരുമാനം എടുക്കുന്നതാണ് നല്ലതെന്നും കോണ്ഗ്രസ് പ്രസിഡന്റ്പറയുന്നു.
