തൃശൂര്: വാടാനപ്പിള്ളിയില് എസ്ഡിപിഐ ആക്രമണം. അഞ്ച് ബിജെപി പ്രവര്ത്തകര്ക്ക് വെട്ടേറ്റു. വാടാനപ്പിള്ളി ഗ്രാമപഞ്ചായത്തംഗം കെ.ബി. ശ്രീജിത്, എം.സി. സുജിത്, കെ.ഡി. കൃഷ്ണന്കുട്ടി, യു.ബി. രതീഷ്, രാംദാസ് മഠത്തില് എന്നിവര്ക്കാണ് വെട്ടേറ്റത്. ശ്രീജിത്തിന് തലയിലാണ് വെട്ടേറ്റത്. പരിക്കേറ്റവരെ തൃശൂര് അശ്വിനി ആശുപത്രിയില് പ്രവേശിപ്പിച്ചു.
ഇന്നലെ രാവിലെ പതിനൊന്നരയോടെ ഗണേശമംഗലത്തായിരുന്നു സംഭവം. ഹര്ത്താലിന്റെ ഭാഗമായി നടന്ന പ്രകടനത്തിന് ശേഷം മടങ്ങുകയായിരുന്നു ബിജെപി പ്രവര്ത്തകര്. ഗണേശമംഗലത്തെ ഹോട്ടലിന് മുന്നില് സംഘടിച്ച് നിന്ന എസ്ഡിപിഐ സംഘം വടിവാളും കത്തിയുമായി ആക്രമിക്കുകയായിരുന്നുവെന്ന് ദൃക്സാക്ഷികള് പറഞ്ഞു.
എസ്ഡിപിഐക്കാരായ നടുവില്ക്കര ഫഖാസ്, ഷറഫുദ്ദീന്, ഷെമീര്, ഫാര്വിന്, അഷ്റഫ് തുടങ്ങിയവരുടെ നേതൃത്വത്തിലുള്ള സംഘമാണ് ആക്രമണം നടത്തിയതെന്നും സംഭവം കണ്ടു നിന്നവര് പറഞ്ഞു. സംഭവമറിഞ്ഞ് എസ്പി എം.കെ. പുഷ്കരന്റെ നേതൃത്വത്തിലുള്ള പോലീസ് സ്ഥലത്തെത്തി. പോലീസ് നടത്തിയ റെയ്ഡില് ഹോട്ടലില് നിന്ന് വടിവാളുകളും കത്തികളും ഉള്പ്പെടെ ആയുധ ശേഖരം പിടികൂടി. തുടര്ന്ന് ഹോട്ടല് അടച്ചുപൂട്ടി.
ബിജെപി സംസ്ഥാന വക്താവ് ബി. ഗോപാലകൃഷ്ണന് ജില്ലാ നേതാക്കളായ എ. നാഗേഷ്, കെ.കെ. അനീഷ്കുമാര്, ടി.എസ്. ഉല്ലാസ് ബാബു തുടങ്ങിയവര് ആശുപത്രിയിലെത്തി പരിക്കേറ്റവരെ സന്ദര്ശിച്ചു.
ശബരിമല കര്മസമിതി ആഹ്വാനം ചെയ്ത ഹര്ത്താല് ജില്ലയില് പൂര്ണമായിരുന്നു. കടകമ്പോളങ്ങള് അടഞ്ഞുകിടന്നു. സ്വകാര്യവാഹനങ്ങളടക്കം മറ്റു വാഹനങ്ങളൊന്നും നിരത്തിലിറങ്ങിയില്ല. കെഎസ്ആര്ടിസി സര്വീസ് നടത്തിയില്ല. ഹര്ത്താലനുകൂല പ്രകടനങ്ങള്ക്ക് നേരെ ജില്ലയില് സിപിഎമ്മും എസ്ഡിപിഐയും വ്യാപകമായി അക്രമം അഴിച്ചുവിട്ടു.
തൃശൂര് നഗരത്തില് പ്രകടനം നടത്തിയവര്ക്കെതിരെ പോലീസ് ലാത്തി വീശി. പിന്നീട് കൂടുതല് പ്രവര്ത്തകരെത്തിയതോടെ പോലീസ് പ്രകോപനങ്ങളില് നിന്ന് പിന്മാറി. പഴയന്നൂര് ടൗണ്, തിരുവില്വാമല, കൊണ്ടാഴി തുടങ്ങിയ സ്ഥലങ്ങളില് കര്മ്മസമിതി പ്രവര്ത്തകര് നടത്തിയ പ്രകടനത്തിന് നേരെ സിപിഎം, എസ്ഡിപിഐ പ്രവര്ത്തകര് കല്ലേറ് നടത്തി.
വടക്കാഞ്ചേരിയില് ബിജെപി ഓഫീസ് സിപിഎമ്മുകാര് അടിച്ചു തകര്ത്തു. ഹര്ത്താലിനോടനുബന്ധിച്ച് പ്രകടനം നടത്തിയവര്ക്ക് നേരെ വിവിധയിടങ്ങളില് സിപിഎം ഓഫീസുകളില് നിന്ന് കല്ലേറുണ്ടായി.
