കണ്ണൂര്: കഴിഞ്ഞ ഒരു വര്ഷമായി കേരളത്തില് മുഴവന് സമയ സൈനിക വെല്ഫെയര് ഡയറക്ടറില്ലെന്നും എത്രയും വേഗം ഡയറക്ടറെ നിയമിക്കണമെന്നും പൂര്വസൈനിക സേവാപരിഷത്ത് ആറാം സംസ്ഥാന സമ്മേളനം ആവശ്യപ്പെട്ടു. വിരമിച്ച ബ്രിഗേഡിയര്ക്ക് തത്തുല്യ യോഗ്യതയുള്ളയാളെയാണ് നിയമിക്കേണ്ടത്. അതില്ലെങ്കില് സേനയില് നിന്ന് ഡെപ്യൂട്ടേഷനില് കേണല് റാങ്കിലുള്ള ആരെയെങ്കിലും നിയമിക്കണമെന്നും പ്രമേയം ആവശ്യപ്പെടുന്നു.
പൊതുമേഖലാ സ്ഥാപനങ്ങളില് സുരക്ഷയ്ക്കായി വിമുക്തഭടന്മാരെ നിയമിക്കണമെന്ന് നിയമമുണ്ട്. സംസ്ഥാന സര്ക്കാരും ഉത്തരവിറക്കിയിട്ടുണ്ട്. പല സ്ഥലത്തും സീനിയോറിറ്റി അനുസരിച്ച് ജോലി നല്കുന്നില്ല. ജോലി ലഭിക്കുന്നവര്ക്ക് സമയത്തിന് ശമ്പളവും ലഭിക്കുന്നില്ല. കമ്പനികള് കൃത്യസമയത്ത് പണമടച്ചാലും അത് വിതരണം ചെയ്യുന്നതിലുള്ള കാലതാമസം ഒഴിവാക്കണം. വിമുക്തഭടന്മാര്ക്ക് കോണ്ട്രാക്റ്റ് ഒഴിവാക്കി കെസ്കോണ് വഴി നിയമനം നല്കണം.
ജില്ലാ കൃഷി ഓഫീസര്മാരുടെ കീഴില് പ്രവര്ത്തിക്കുന്ന ഉപദേശക സമിതിയില് ഒരു വിമുക്തഭടനെ ഉള്പ്പെടുത്തണം. ശമ്പളമില്ലാതെ ജോലി ചെയ്യുന്നതിനാല് സര്ക്കാരിന് പണച്ചെലവില്ലാതെ ഇത് നടത്താം. വിമുക്തഭടന്മാരെ പുനരധിവസിപ്പിക്കാന് സംസ്ഥാന സര്ക്കാര് നടപടിയെടുക്കണമെന്നും സമ്മേളനം ആവശ്യപ്പെട്ടു.
കണ്ണൂര് ശിക്ഷക് സദനില് ഇന്ത്യന് കോസ്റ്റ്ഗാര്ഡ് മുന് ഡയറക്റ്റര് ജനറല് പ്രഭാകരന് പലേരി സമ്മേളനം ഉദ്ഘാടനം ചെയ്തു. മേജര് ജനറല് കെ.ടി.ജി. നമ്പ്യാര് വിഎസ്എം അധ്യക്ഷത വഹിച്ചു. സ്വാമിനി ദേവി ജ്ഞാനാഭിനിഷ്ഠ അനുഗ്രഹ ഭാഷണം നടത്തി. ആര്എസ്എസ് പ്രാന്ത സഹസംഘചാലക് അഡ്വക്കറ്റ് കെ.കെ. ബാലറാം, മേജര് ജനറല് ഡോ.പി. വിവേകാനന്ദന്, വിജയന് പാറാലി, ലഫ്റ്റനന്റ് കേണല് കെ. രാംദാസ് തുടങ്ങിയവര് സംസാരിച്ചു. പ്രളയ ദുരിതാശ്വാസ പ്രപര്ത്തനങ്ങളില് സേവനമനുഷ്ഠിച്ച കണ്ണൂര് ഡിഎസ്സി സെന്റര് ഇന്ഫന്ട്രി ബറ്റാലിയന് 122, മിലിട്ടറി ഹോസ്പിറ്റല് കണ്ണൂര്, ടെറിട്ടോറിയല് ആര്മി, മത്സ്യപ്രവര്ത്തക സംഘം, സേവാഭാരതി കണ്ണൂര് എന്നിവയെ ചടങ്ങില് ആദരിച്ചു. സംസ്ഥാന വൈസ് പ്രസിഡന്റ് കമാന്ഡര് കെ.സി. മോഹനന് പിള്ള സ്വാഗതവും കണ്ണൂര് ജില്ലാ അധ്യക്ഷന് പി.ആര്.രാജന് നന്ദിയും പറഞ്ഞു.
ഭാരവാഹികളായി ക്യാപ്റ്റന് ഗോപകുമാര് തിരുവനന്തപുരം (പ്രസിഡന്റ്), മേജര് ധനപാലന് ആലപ്പുഴ (വൈസ് പ്രസിഡന്റ്), മധു വട്ടവിള കൊല്ലം (ജനറല് സെക്രട്ടറി), പി. ശിവദാസന് കോഴിക്കോട് (ട്രഷറര്), പത്മകുമാര്, കേണല് കെ. ജോണ്, കേണല് റാം മോഹന്, രവീന്ദ്രനാഥ്, എസ്. സഞ്ജയ്, അജയകുമാര്, കൃഷ്ണന് കോട്ടായി, വിജയകുമാര്, മുരളീധരന്, പി.ആര്. രാജന്, ശ്രീകുമാര് (സെക്രട്ടറിമാര്), ലഫ്. കേണല് കെ.രാംദാസ് (ഉന്നതാധികാര സമിതി), വേലായുധന് കളരിക്കല്, (ദക്ഷിണമേഖലാ പ്രഭാരി) എന്നിവരെ തെരഞ്ഞെടുത്തു.
