സന്നിധാനം: ദിവസവും ഉച്ചയ്ക്ക് അഞ്ചുതരം തൊടുകറികളും പരിപ്പും സാമ്പാറും പുളിശ്ശേരിയും രസവും പപ്പടവും പായസവും. രാവിലെ വിഭവസമൃദ്ധമായ പ്രഭാതഭക്ഷണം. രാത്രിയില് ചപ്പാത്തിയും കറികളും. ഇതിനൊക്കെ പുറമേ ചായയും ചെറുകടിയും. ശബരിമല ഡ്യൂട്ടിയുള്ള പോലീസുകാര്ക്ക് ഒരുക്കി നല്കേണ്ട ഭക്ഷണമാണ്. 2000 പേരോളമുള്ള ഓരോ ക്യാമ്പിലും ഇത്രയും ഭക്ഷണം തയ്യാറാക്കേണ്ടത് വിരലിലെണ്ണാവുന്ന ക്യാമ്പ് ഫോളോവേഴ്സാണ്.
നിലയ്ക്കല്, പമ്പ, സന്നിധാനം, വടശേരിക്കര, എരുമേലി, വണ്ടിപ്പെരിയാര്, കുമളി എന്നിവിടങ്ങളിലാണ് പോലീസ് മെസ് പ്രവര്ത്തിക്കുന്നത്. അറനൂറോളം പേര് വരുന്ന വണ്ടിപ്പെരിയാര് മെസ്സില് നാലുക്യാമ്പ് ഫോളോവേഴ്സ് മാത്രം. ഇരുനൂറോളം പേര് വരുന്ന കുമളിയില് രണ്ടുപേര്. ഇവര്ക്ക് അടിമപ്പണി തന്നെ.
രാത്രി എട്ട് മണിക്ക് ജോലി തുടങ്ങിയാലെ പിറ്റേന്ന് പ്രഭാതഭക്ഷണം നല്കാനാകൂ. രാത്രി പന്ത്രണ്ട് മണിയോടെ ഉച്ചയൂണിന്റെ പണികള് തുടങ്ങണം. രാത്രിയിലേക്ക് വേണ്ട ചപ്പാത്തിക്ക് ഉച്ചയോടെ മാവ് കുഴച്ച് തുടങ്ങണം. ഇതിനിടയില് രണ്ട് നേരം ചായയും ചെറുകടിയും വേണം. ഒരാള്ക്ക് പോലും വിശ്രമമില്ല. 24 മണിക്കൂറും പാചകപ്പുരയില് നരകിക്കുകയാണ് പോലീസിലെ ഈ അടിസ്ഥാനവര്ഗം.
ഇവര്ക്ക് കൃത്യമായ സ്പെഷ്യല് റൂള് ഇല്ലാത്തതിനാല് പുതിയ നിയമനങ്ങള് നടക്കുന്നില്ല. നിലവില് ഉള്ളവരെക്കൊണ്ടാണ് മുഴുവന് പണികളും ചെയ്യിക്കുന്നത്. ദിവസ വേതനാടിസ്ഥാനത്തില് പോലും ആളെ എടുക്കാന് തയാറായില്ല. വോളന്റിയേഴ്സ് എന്ന പേരില് ആയിരത്തി അഞ്ഞൂറോളം പേരെ വിവിധ ഇടങ്ങളില് ഡ്യൂട്ടിക്ക് നിയോഗിച്ചപ്പോഴും ക്യാമ്പ് ഫോളോവേഴ്സിന്റെ കാര്യത്തില് അതുപോലും ഉണ്ടായില്ല.
കുമളിയിലെ രണ്ട് പേരുടെയും ആരോഗ്യസ്ഥിതി മോശമായി. ഈ രണ്ട് ക്യാമ്പുകളിലെയും ക്യാമ്പ് ഫോളോവേഴ്സ് ഉറങ്ങിയിട്ട് എട്ട് ദിവസമാകുന്നു. കണ്ണടയ്ക്കാന്പോലും സമയം ലഭിക്കില്ല. കടുത്ത മനുഷ്യാവകാശലംഘനമാണ് പോലീസ് ഇവരുടെ കാര്യത്തില് പിന്തുടരുന്നത്. വണ്ടിപ്പെരിയാര് ഒഴികെ ബാക്കി മെസ്സുകളിലെല്ലാം 1800 മുതല് 2000 പേര്ക്ക് വരെ ഭക്ഷണം ഒരുക്കണം. എരുമേലിയില് 35, പമ്പ 35, സന്നിധാനം 85, വടശേരിക്കര 25, എരുമേലി 45 പേര് മാത്രമാണ് ക്യാമ്പ് ഫോളോവേഴ്സ്. ആഹാരസമയം അനുസരിച്ച് ജോലി തരംതിരിച്ചാല്പോലും ഓരോ ഷിഫ്റ്റിലും നാലോ അഞ്ചോ പേരേ ഉണ്ടാകൂ. അവര് വേണം പപ്പടവും പായസവും അടങ്ങുന്ന സദ്യ അടക്കം ഉണ്ടാക്കാന്.
കഴിഞ്ഞതവണയും ഇവരുടെ ദുരവസ്ഥ വാര്ത്തയില് നിറഞ്ഞിരുന്നു. എന്നാല് വാര്ത്തകള് നല്കിയവരെ അച്ചടക്ക ലംഘനത്തില്പ്പെടുത്തി ക്രൂശിക്കുകയാണ് പോലീസിലെ ഉന്നത ഉദ്യോഗസ്ഥര് ചെയ്തത്. പലരുടെയും ഇന്ക്രിമെന്റ് വരെ റദ്ദ്ചെയ്തു. അതുകൊണ്ട് ഭയപ്പാടിലാണ് ക്യാമ്പ് ഫോളോവര്മാരെല്ലാം.
