കണ്ണൂര്: അപകടങ്ങളില്പ്പെടുന്നവരെ രക്ഷിക്കുന്നത് മൗലീകമായ കടമയായി മാറണമെന്നാണ് തന്റെ അഭിപ്രായമെന്ന് ഗവര്ണര് റിട്ട.ജസ്റ്റിസ് പി.സദാശിവം പറഞ്ഞു. കണ്ണൂരില് ലുബ്നാഥ് ഷാ മെമ്മോറിയില് ചാരിറ്റബിള് ട്രസ്റ്റ് ഏര്പ്പെടുത്തിയ ആര്യബന്ധു പുരസ്ക്കാരം വിപിഎസ് ഹെല്ത്ത് കെയര് യൂണിറ്റ് ചെയര്മാനും മാനേജിംഗ് ഡയരക്ടറുമായ ഡോ.ഷംസീര് വയലിലിന് സമര്പ്പിച്ച് സംസാരിക്കുകയായിരുന്നു അദ്ദേഹം. റോഡപകടങ്ങളുടെ കാര്യത്തില് മറ്റ് സംസ്ഥാനങ്ങളേക്കാള് മുന്നില് നില്ക്കുന്ന കേരളത്തില് അപകടങ്ങള് കുറയ്ക്കുന്നതിനായി നിരന്തരമായ ബോധവല്ക്കരണ പരിപാടികള് ആവശ്യമാണ്. കഴിഞ്ഞ വര്ഷത്തെ കണക്കു പ്രകാരം ഏഴുവര്ഷത്തേക്കാള് ഉയര്ന്ന അപകടനിരക്കാണ് കേരളത്തില് ഉളളത്. ദേശീയ ശരാശരിയേക്കാള് കൂടുതലാണ് കേരളത്തിലെ വാഹന നിരക്ക്. 1300 വാഹനങ്ങളാണ് കേരളത്തില് പ്രതിദിനം പുതുതായി നിരത്തിലിറങ്ങുന്നത്. രാജ്യത്തെ ജനസംഖ്യയില് 2.76 ശതമാനം മാത്രമാണ് കേരളത്തിലുള്ളതെങ്കിലും റോഡ് അപകടത്തിന്റെ 7.8 ശതമാനവും ഇവിടെയാണു നടക്കുന്നത്. 2017ല് മാത്രം 3915 പേരാണ് റോഡ് അപകടങ്ങളില് മരിച്ചത്.
അപകടത്തില്പ്പെട്ടവരെ ആശുപത്രിയിലെത്തിച്ചാല് ആദ്യം വിദഗ്ധ ചികിത്സ നല്കണം. ചോദ്യം ചെയ്യല് പിന്നീടുമതി. ആശുപത്രിയില് എത്തിക്കുന്നവരെ വലയ്ക്കുന്ന തരത്തില് പോലീസ് ഇടപെടാന് പാടില്ലെന്നും താന് ചീഫ് ജസ്റ്റിസ് ആയിരിക്കെ പുറപ്പെടുവിച്ച വിധി ഓര്മപ്പെടുത്തിക്കൊണ്ട് ഗവര്ണര് പറഞ്ഞു. സ്വന്തം ജീവിത വിജയത്തിന് വേണ്ടി ആരംഭിക്കുന്ന വ്യവസായ സംരംഭങ്ങള് മറ്റുളളവര്ക്ക് കൂടി ഗുണകരമായി മാറുമ്പോള് മാത്രമാണ് വിജയിക്കുന്നതെന്നും സാമൂഹ്യ പ്രതിബദ്ധതയുളളവരായിരിക്കണം സംരംഭകരംഗത്തേക്ക് കടന്നു വരുന്നവരെന്നും ഗവര്ണര് പറഞ്ഞു. വ്യവസായ സംരഭകര് ഉദ്യോഗാര്ത്ഥികളുടെ നൈപുണ്യ വികസനത്തിനായി പദ്ധതികള് ആവിഷ്ക്കരിക്കണമെന്നും അദ്ദേഹം പറഞ്ഞു.
കണ്ണൂര് ചേംമ്പര് ഓഫ് കൊമേഴ്സ് ഹാളില് നടന്ന ചടങ്ങില് ലുബ്നാഥ് ഷ മെമ്മോറിയില് ട്രസ്റ്റ് പുറത്തിറക്കുന്ന ജീവന് രക്ഷാ ആപ്പിന്റെ ഉദ്ഘാടനവും ഗവര്ണ്ണര് നിര്വ്വഹിച്ചു. ജീവകാരുണ്യ പ്രവര്ത്തനങ്ങളില് നിസ്വാര്ത്ഥ സേവനം നടത്തുന്ന ഡോ.ഷംസീര് വയലില് 2019 ജനവരി 26 ന് രാജ്ഭവനില് നടക്കുന്ന ചടങ്ങില് പ്രത്യേക ക്ഷണിതാവായിരിക്കുമെന്നും ഗവര്ണ്ണര് സദസ്സിനെ അറിയിച്ചു. ചടങ്ങില് മന്ത്രി രാമചന്ദ്രന് കടന്നപ്പളളി അധ്യക്ഷത വഹിച്ചു. മന്ത്രി കെ.കെ.ശൈലജ, പി.കെ.ശ്രീമതി എംപി,മേയര് ഇ.പി.ലത, ജില്ലാ പഞ്ചായത്ത് പ്രസിഡണ്ട് കെ.വി.സുമേഷ് തുടങ്ങി സാമൂഹ്യ-സാസംക്കാരിക രംഗത്തെ നിരവധിപേര് പങ്കെടുത്തു. ട്രസ്റ്റ് ചെയര്മാന് ഷാനില് സ്വാഗതവും സെക്രട്ടറി രഞ്ചിത്ത് രാജരത്നം നന്ദിയും പറഞ്ഞു.
