കണ്ണൂര്: ടിപി കേസ് പ്രതി പി.കെ. കുഞ്ഞനന്തന് അടിക്കടി പരോള് നല്കുന്ന ആഭ്യന്തര വകുപ്പിന്റെ നടപടിക്കെതിരെ പ്രതിഷേധം ശക്തം. ടി.പി. ചന്ദ്രശേഖരന് വധക്കേസിലെ പ്രതിയും സിപിഎം പാനൂര് ഏരിയ കമ്മറ്റി അംഗവുമായ കുഞ്ഞനന്തനു പിണറായി സര്ക്കാരിന്റെ കാലത്ത് 2016 മേയ് മുതല് 2018 ഏപ്രില് വരെ എല്ലാ മാസവും പരോള് ലഭിച്ചിട്ടുണ്ട്. ജീവപര്യന്തം ലഭിച്ച് കണ്ണൂര് സെന്ട്രല് ജയിലില് കഴിയുന്ന കുഞ്ഞനന്തന് 389 ദിവസത്തെ പരോളാണ് ഇതുവരെ ലഭിച്ചത്.
സപ്തംബര് 21നാണ് കുഞ്ഞനന്തന്റെ അപേക്ഷ പ്രകാരം പത്ത് ദിവസത്തെ അടിയന്തര പരോള് അനുവദിച്ചത്. പിന്നീട് പതിനഞ്ച് ദിവസത്തേക്ക് കൂടി ആഭ്യന്തര വകുപ്പ് പരോള് നീട്ടി. കുഞ്ഞനന്തന് അപേക്ഷ സമര്പ്പിച്ചതിനെ തുടര്ന്ന് വീണ്ടും പതിനഞ്ച് ദിവസത്തേക്ക് കൂടി പരോള് നീട്ടി. ഒക്ടോബര് പതിനാറിനാണ് ഉത്തരവ് പുറത്തുവന്നത്. ഇതില് കൂടുതലും അടിയന്തര അവധിയാണ്. പരോള് തുടര്ച്ചയായി നീട്ടിക്കൊടുക്കുകയാണ്. ഭാര്യയുടെ ചികില്സയ്ക്കെന്ന പേരിലായിരുന്നു കുഞ്ഞനന്തന് കൂടുതലും പരോള് ലഭിച്ചത്.
സാധാരണ അടിയന്തര പരോള് അനുവദിക്കുന്നത് നാല്പ്പത് ദിവസമാണ്. എത്ര തവണ വേണമെങ്കിലും പരോള് നീട്ടി നല്കാന് സര്ക്കാരിന് വിവേചനാധികാരം ഉണ്ട്. ഇത് ഉപയോഗിച്ചാണ് കുഞ്ഞനന്തന് പരോള് നീട്ടി ലഭിക്കുന്നത്. കണ്ണൂര് ജയില് സൂപ്രണ്ട് പറയുന്നതിങ്ങനെ, ഞങ്ങള് പത്ത് ദിവസത്തെ അടിയന്തര പരോളാണ് കുഞ്ഞനന്തന് നല്കിയത്. ബാക്കിയെല്ലാം നല്കിയത് സര്ക്കാരാണ്. സര്ക്കാരിന് അതിനുള്ള വിവേചനാധികാരമുണ്ട്. ഒറ്റത്തവണ പതിനഞ്ച് ദിവസം വരെ മാത്രമേ നീട്ടി നല്കാന് കഴിയൂ എന്ന് മാത്രം. അതിനനുസരിച്ചാണ് രണ്ട് തവണ പതിനഞ്ച് ദിവസം വീതം പരോള് ദിനങ്ങള് നീട്ടി നല്കിയത്. ഇപ്പോള് വീണ്ടും പരോള് നീട്ടി നല്കിയത് സംബന്ധിച്ച ഒരറിയിപ്പും ജയിലില് കിട്ടിയിട്ടില്ലെന്നും എത്രദിവസത്തേക്കാണ് നീട്ടി നല്കിയതെന്ന് അറിയില്ലെന്നും ആഭ്യന്തര വകുപ്പാണ് അത് തീരുമാനിക്കുന്നതെന്നുമാണ് ജയില് അധികൃതരുടെ വാദം.
എഴുപത് വയസ് തികഞ്ഞെന്ന ന്യായം പറഞ്ഞ് കുഞ്ഞനന്തനെ മോചിപ്പിക്കാന് സര്ക്കാര് ശ്രമിച്ചിരുന്നു. എന്നാല് ഗവര്ണര് ഇടപെട്ടതിനാല് അതു നടന്നിരുന്നില്ല. രണ്ടുവട്ടം പരോള് നീട്ടി നല്കി 40 ദിവസം കുഞ്ഞനന്തനെ വീട്ടില് താമസിക്കാന് അനുവദിച്ച ശേഷമമാണ് കഴിഞ്ഞ ദിവസം വീണ്ടും അഞ്ചു ദിവസം കൂടി കുഞ്ഞനന്തന് പരോള് ദീര്ഘിപ്പിച്ച് നല്കിയത്.
ശബരിമല വിഷയത്തില് സമരക്കാരെ അറസ്റ്റ് ചെയ്ത് സര്ക്കാര് ജയില് നിറയ്ക്കുമ്പോള് സിപിഎമ്മുകാരായ തടവുകാര് പുറത്തിറങ്ങി സൈ്വരവിഹാരം നടത്തുകയാണ്.
