കോഴിക്കോട്: ക്ഷേത്രവിശ്വാസികളെ വേദനിപ്പിക്കുന്നതാണ് ശബരിമല സ്ത്രീപ്രവേശനം സംബന്ധിച്ച കോടതിവിധിയെന്ന് കേരള ക്ഷേത്രസംരക്ഷണ സമിതി. സ്വയം ശുദ്ധീകരണം നടത്തിയും കാലോചിതമായി പരിഷ്കരണങ്ങള് വരുത്തിയും തന്നെയാണ് ഹിന്ദുസമൂഹം മുന്നോട്ട് പോയിട്ടുള്ളത്. പക്ഷെ ക്ഷേത്രസംബന്ധമായ കാര്യങ്ങളില് തന്ത്രിമാര്ക്കും ആചാര്യന്മാര്ക്കും നിലനില്ക്കുന്ന പ്രാധാന്യം കോടതി അല്പ്പം പോലും പരിഗണിച്ചില്ലെന്നും സമിതി ചൂണ്ടിക്കാട്ടി.
മറ്റ് മതവിശ്വാസികളുടെ ആരാധനാലയങ്ങളില് നിലനില്ക്കുന്ന സ്ത്രീവിവേചനങ്ങള് പരിഗണിക്കാതെ ഹിന്ദുമതത്തിന് നേരെ നിരന്തരമായുള്ള കടന്നുകയറ്റവും ആക്രമണവും തുടരുന്നു. ശബരിമലയില് സ്ത്രീകള് പ്രവേശിക്കണമെന്ന് വാദിക്കുന്നവര് ഇതരമതസ്ഥരുടെ കാര്യത്തിലും ഈ നിലപാടെടുക്കാന് തയ്യാറാകുമോ? ഇടതുസര്ക്കാര് സുപ്രീംകോടതിയില് സ്വീകരിച്ച ക്ഷേത്രവിരുദ്ധനിലപാടാണ് ഇങ്ങനെ ഒരു വിധിയിലേക്ക് നയിച്ചത്. സഹസ്രാബ്ദങ്ങളായി നിലനിന്നുപോരുന്ന ശാസ്ത്രാധിഷ്ഠിതമായ ആചാരാനുഷ്ഠാനങ്ങള് പുനഃസ്ഥാപിക്കല്. ശബരിമലയില് ഉണ്ടാകാന് പോകുന്ന വൈഷമ്യങ്ങളെ എങ്ങനെ പരിഹരിക്കും തുടങ്ങിയ കാര്യങ്ങള് സമാനചിന്താഗതിയുള്ള ഹിന്ദുസംഘടനകളുമായും ഭക്തജനങ്ങളുമായും ആചാര്യന്മാരുമായും തന്ത്രിമാരുമായും ആലോചിച്ച് തീരുമാനിക്കുമെന്നും സമിതി സംസ്ഥാന സെക്രട്ടറി കെ. നാരായണന്കുട്ടി പ്രസ്താവനയില് പറഞ്ഞു.
