ഐക്യരാഷ്‌ട്രസഭ; ഭീകരതയും കാലാവസ്ഥാ വ്യതിയാനവുമാണ് ലോകം ഇന്ന് നേരിടുന്ന ഏറ്റവും വലിയ വെല്ലുവിളികളെന്ന് വിദേശകാര്യ മന്ത്രി സുഷമസ്വരാജ് ഐക്യരാഷ്‌ട്രസഭയിലെ പ്രസംഗത്തില്‍.
ഭീകരതയില്‍ നിന്ന് ദൗര്‍ഭാഗ്യവശാല്‍ ഇന്ന് ഒരു രാജ്യവും മുക്തമല്ല. അയല്‍ക്കാരില്‍ നിന്നാണ് ഭീകരത ഇന്ത്യയില്‍ എത്തുന്നതെന്നത് ദുഖകരമാണ്. അമേരിക്കയിലെ ഭീകരാക്രമണത്തിന്റെ സൂത്രധാരന്‍ ഒസാമ ബിന്‍ ലാദനെ സംരക്ഷിച്ചത് അവരുടെ വലിയ സുഹൃത്തായ പാക്കിസ്ഥാനാണ്. സുഷമ യുഎന്‍ പൊതുസഭാ സമ്മേളനത്തില്‍ പാക്കിസ്ഥാനെതിരെ ആഞ്ഞടിച്ചു.
ഇന്ത്യയിലെ ഭീകരാക്രമണക്കേസിലെ മുഖ്യപ്രതി പാക്കിസ്ഥാനില്‍ സസുഖം വാഴുകയാണ്. പാക്കിസ്ഥാന്റെ യഥാര്‍ഥ മുഖം ലോകത്തിനു ദര്‍ശിക്കാം. ഭീകരതയ്‌ക്ക് മണ്ണൊരുക്കുക മാത്രമല്ല പാക്കിസ്ഥാന്‍ ചെയ്യുന്നത്. ഭീകരതയെന്ന ഈ കൊടിയ വിഷത്തെ മനോഹരമായ വാക്കുകള്‍ക്കുള്ളില്‍ അവര്‍ മൂടിവയ്‌ക്കുകയാണ്.
ചര്‍ച്ചകള്‍ ഇന്ത്യ അട്ടിമറിച്ചുവെന്നാണ് പാക് ആരോപണം. ഇത് പച്ചക്കള്ളമാണ്. പാക്കിസ്ഥാനുമായി പലകുറി ചര്‍ച്ചകള്‍ നടന്നിട്ടുണ്ട്. അവ ഇടയ്‌ക്കു വച്ച് നിന്നിട്ടുണ്ടെങ്കില്‍ അത് പാക്കിസ്ഥാന്റെ പെരുമാറ്റം കാരണമാണ്. ഇപ്പോഴും ചര്‍ച്ചയ്‌ക്ക് ഇന്ത്യ ആഗ്രഹിച്ചു, അവര്‍ ഞങ്ങളുടെ സൈനികനെ കൊന്നു.
ഭീകരരേക്കാള്‍ വലിയ മനുഷ്യവകാശധ്വസംകരായി ആരാണുള്ളത്? നിരപരാധികളുടെ ജീവനെടുക്കുന്ന കൊലയാളികളെ പാക്കിസ്ഥാന്‍ മഹത്വവല്‍ക്കരിക്കുകയാണ്. അവര്‍ നിരപരാധികളുടെ ചോരയൊഴുകുന്നത് കണ്ടില്ലെന്ന് നടിക്കുന്നു. അവര്‍ പറഞ്ഞു.ലോകത്തെ ഏറ്റവും വലിയ ചികില്‍സാ സഹായ പദ്ധതിയും നരേന്ദ്ര മോദി സര്‍ക്കാരിന്റെ വമ്പന്‍ പദ്ധതികളില്‍ ഒന്നുമായ ആയുഷ്മാന്‍ ഭാരത് യുഎന്‍ പൊതുസഭാ സമ്മേളനത്തില്‍ സുഷമ അവതരിപ്പിച്ചു.
പദ്ധതി വഴി 50 കോടി ജനങ്ങളെയാണ് ചികില്‍സാ ഇന്‍ഷ്വറന്‍സ് പദ്ധതിയില്‍പ്പെടുത്തിയത്. മോദി ഭരണത്തില്‍ ഇന്ത്യയില്‍ സാമൂഹ്യ സാമ്പത്തിക രംഗങ്ങളില്‍ വലിയ പരിവര്‍ത്തനമാണ് ഉണ്ടായിക്കൊണ്ടിരിക്കുന്നത്. 2022 ഓടെ മുഴുവന്‍ പേര്‍ക്കും വീട് എന്ന മറ്റൊരു വലിയ പദ്ധതി മുന്നേറുകയാണ്. അഞ്ചു കോടിപ്പേര്‍ക്കാണ് സൗജന്യമായി പാചക വാതകം നല്‍കിയത്. ജന്‍ധന്‍ യോജനയെപ്പറ്റിയും സുഷമ വിവരിച്ചു.
