തിരുവനന്തപുരം: എല്‍ഡിഎഫ് ഭരണത്തില്‍ സ്ത്രീപീഡകര്‍ ഇരുമ്പഴിക്കുള്ളിലാകുന്നതില്‍ മാറ്റമുണ്ടാകില്ലെന്നാണ് സിപിഎം സംസ്ഥാന കോടിയേരി ബാലകൃഷ്ണന്റെ പ്രസ്താവന. പക്ഷെ എത്ര ഉന്നതനായാലും ദാക്ഷണിണ്യമില്ലെന്ന സിപിഎമ്മിന്റ നിലപാട് പി.കെ.ശശി എംഎല്‍എയുടെ കാര്യത്തില്‍ ചോദ്യചിഹ്നമാകുന്നു.
കന്യാസ്ത്രീയുടെ പീഡന പരാതിയില്‍ 84 ദിവസത്തിനു ശേഷം ബിഷപ്പ് ഫ്രാങ്കോ മുളയ്‌ക്കലിനെ നിയമത്തിനു മുന്നില്‍ കൊണ്ടുവന്നെന്ന് വീമ്പിളക്കുന്ന പാര്‍ട്ടി നേതാക്കളും മന്ത്രിമാരും സ്വന്തം എംഎല്‍എയുടെ കാര്യത്തില്‍ എന്ത് നടപടി സ്വീകരിച്ചെന്നാണണ് ചോദ്യം.
ഷൊര്‍ണൂര്‍ എംഎല്‍എ പികെ ശശിയ്‌ക്കെതിരെ നടപടി എടുത്താലും ഇല്ലെങ്കിലും അത് പാര്‍ട്ടിയെയും ഭരണത്തെയും ബാധിക്കും. ഡിവൈഎഫ്‌ഐ വനിതാ നേതാവിനെ എംഎല്‍എ പീഡിപ്പിച്ചെന്ന പരാതിയില്‍ പാര്‍ട്ടി സിഐഡികളായ പി.കെ.ശ്രീമതിയും മന്ത്രി എ.കെ.ബാലനും നടത്തിയ അന്വേഷണ റിപ്പോര്‍ട്ട് എംഎല്‍എയ്‌ക്ക് അനുകൂലമല്ല. നടപടി ആവശ്യപ്പെടുന്നുണ്ടെന്നാണ് വിവരം.
ശശിയ്‌ക്കെതിരെ നടപടി സ്വീകരിച്ചാല്‍ കുറ്റം ചെയ്തുവെന്ന് വ്യക്തമാകും. അങ്ങനെയെങ്കില്‍ പാര്‍ട്ടി നടപടിയല്ല നിയമ നടപടിയാണ് വേണ്ടത്. ഈ ആവശ്യം സംസ്ഥാനവ്യാപകമായി ഉയരും. ബിഷപ്പിന്റെ അറസ്റ്റ് സംബന്ധിച്ച് വേട്ടക്കാരനെ പിടികൂടി കഴിഞ്ഞെന്നാണ് മന്ത്രി ജയരാജന്റെ പ്രതികരണം. എങ്കില്‍ ഡിവൈഎഫ്‌ഐ വനിതാ നേതാവിനെ പിഡിപ്പിച്ച വേട്ടക്കാരനെയും പിടികൂടേണ്ടേയെന്ന ചോദ്യവും ഉയരുന്നു.
ബിഷപ്പിനെതിരെ പഴുതില്ലാത്ത കുറ്റപത്രം നല്‍കാനുള്ള നീക്കം നടത്തിയതിനാലാണ് അറസ്റ്റിനു കാലതാമസം നേരിട്ടതെന്നാണ് നിയമമന്ത്രി എ.കെ. ബാലന്റെ പ്രതികരണം. നടന്‍ ദിലീപിന്റെ കാര്യത്തിലും ഇതുതന്നെയാണു ചെയ്തത്. ശാസ്ത്രീയ തെളിവുകള്‍ ആവശ്യമാണെന്നും കോടതിയില്‍ നിലനില്‍ക്കുന്ന കുറ്റപത്രമാണു വേണ്ടതെന്നുമാണ് മന്ത്രിയുടെ അഭിപ്രായം. എന്നാല്‍ പി.കെ.ശശിയ്‌ക്കെതിരെയുള്ള അന്വേഷണം സംബന്ധിച്ച് ആരാഞ്ഞപ്പോള്‍ പ്രതികരിക്കുന്നില്ലെന്നാണ് മറുപടി.
പാര്‍ട്ടിയെ പ്രതിരോധത്തിലാക്കി സിപിഎം പോളിറ്റ് ബ്യൂറോ അംഗം എം.എ.ബേബി രംഗത്ത് വന്നിട്ടുണ്ട്. യുവതി നല്‍കിയ പരാതിയില്‍ സിപിഎം തീരുമാനം ഉടനെന്നാണ് ബേബി പറഞ്ഞത്. ആര്‍ക്ക് പരാതി നല്‍കാനും പെണ്‍കുട്ടിക്കു സ്വാതന്ത്ര്യമുണ്ടെന്നും ബേബി അറിയിച്ചു. ഇതിനിടെ പരാതി പിന്‍വലിപ്പിക്കാന്‍ യുവതിക്കു മേല്‍ ഡിവൈഎഫ്‌ഐ, മഹിളാ അസോസിയേഷന്‍ നേതാക്കള്‍ കടുത്ത സമര്‍ദ്ദം ചെലുത്തുന്നുണ്ട്. അന്വേഷണ റിപ്പോര്‍ട്ടിന്‍മേലുള്ള തുടര്‍ നടപടികള്‍ മുഖ്യമന്ത്രി സംസ്ഥാനത്ത് എത്തിയിട്ട് എടുത്താല്‍ മതിയെന്ന നിലപാടിലാണ് പാര്‍ട്ടി.
