മുംബൈ: ഇരുചക്ര വാഹന ഉടമകള്‍ അടക്കം മുഴുവന്‍ വാഹന ഉടമകള്‍ക്കും 15 ലക്ഷത്തിന്റെ അപകട ഇന്‍ഷ്വറന്‍സ് നിര്‍ബന്ധമാക്കാനൊരുങ്ങി കേന്ദ്രം. അപകട മരണമുണ്ടായാല്‍ കുടുംബത്തിന് വലിയ ധനസഹായം ലഭ്യമാക്കാന്‍ ഉദ്ദേശിച്ചുള്ളതാണ് പുതിയ പരിഷ്‌ക്കാരം.
വാഹന ഇന്‍ഷ്വറന്‍സ് പോളിസികളില്‍ ഇത് ഉള്‍പ്പെടുത്താന്‍ കേന്ദ്ര ഇന്‍ഷ്വറന്‍സ് റെഗുലേറ്ററി അതോറിറ്റി ഇന്‍ഷ്വറന്‍സ് കമ്പനികളോട് നിര്‍ദേശിച്ചു. എല്ലാത്തരം വാഹനങ്ങളുടെയും വാര്‍ഷിക ഇന്‍ഷ്വറന്‍സ് പ്രീമിയത്തിനൊപ്പം 750 രൂപ കൂടി വാങ്ങി അവര്‍ക്ക് 15 ലക്ഷത്തിന്റെ ഇന്‍ഷ്വറന്‍സ് നല്‍കാനാണ് ഐആര്‍ഡിഐയുടെ ഉത്തരവ്. ഈ പോളിസി ഇനി നിര്‍ബന്ധമാണ്. തേര്‍ഡ് പാര്‍ട്ടി ഇന്‍ഷ്വറന്‍സിലെ അപാകത പരിഹരിക്കാന്‍ കൂടിയാണിത്.
തേര്‍ഡ് പാര്‍ട്ടി ഇന്‍ഷ്വറന്‍സ് വഴി ഇതുവരെ ഒരു ലക്ഷം രൂപവരെയാണ് വാഹന ഉടമയ്‌ക്ക് പരമാവധി ലഭിച്ചിരുന്നത്. ഇത് വര്‍ധിപ്പിക്കുന്ന കാര്യം ആലോചിക്കാന്‍ 2017 ഒക്ടോബര്‍ 17ന് മദ്രാസ് ഹൈക്കോടതി ഉത്തരവിട്ടിരുന്നു. ഇതു കൂടി പരിഗണിച്ചാണ് പുതിയ നടപടി. വാഹന ഉടമകള്‍ അപകടത്തില്‍ മരിക്കുകയോ പരിക്കേല്‍ക്കുകയോ ചെയ്താല്‍ അവരുടെ കുടുംബത്തിന് ഇന്‍ഷ്വറന്‍സ് തുക ലഭിക്കും.
അപകടത്തില്‍ മരിക്കുന്ന, വാഹന ഉടമകളുടെ ബന്ധുക്കള്‍ക്ക് ന്യായമായ നഷ്ടപരിഹാരത്തുക ലഭിക്കുന്നില്ലെന്ന പരാതി വ്യാപകമാണ്. പുതിയ ഇന്‍ഷ്വറന്‍സ് വരുന്നതോടെ അത് പരിഹരിക്കപ്പെടുമെന്ന് ബജാജ് അലയന്‍സ് ഇന്‍ഷ്വറന്‍സ് എംഡി തപന്‍ സിങ്കേള്‍ പറഞ്ഞു. വേണമെങ്കില്‍ ഇന്‍ഷ്വറന്‍സ് കമ്പനികള്‍ക്ക് 15 ലക്ഷത്തിനേക്കാള്‍ കൂടിയ തുക നല്‍കാം. അതനുസരിച്ച് പ്രീമിയം കൂട്ടിയാല്‍ മതി. പക്ഷെ ഏറ്റവും കുറഞ്ഞത് 15 ലക്ഷം നിര്‍ബന്ധമാണ്, ഐസിഐസിഐ ലൊംബാര്‍ഡ് മേധാവി സഞ്ജയ് ദത്ത പറഞ്ഞു.
2011ലുണ്ടായ ഒരു ദുരന്തമാണ് പുതിയ ഇന്‍ഷ്വറന്‍സിന് കാരണം. ബൈക്കപകടത്തില്‍ മരിച്ചയാളുടെ ഭാര്യയ്‌ക്ക് 53 ലക്ഷം നല്‍കാന്‍ മോട്ടോര്‍ വാഹന അപകട തര്‍ക്ക പരിഹാര ട്രൈബ്യൂണല്‍ ഉത്തരവിട്ടെങ്കിലും യുണൈറ്റഡ് ഇന്ത്യ ഇന്‍ഷ്വറന്‍സ് കോടതിയെ സമീപിച്ചു. തേര്‍ഡ് പാര്‍ട്ടി ഇന്‍ഷ്വറന്‍സ് ആയതിനാല്‍ ഒരു ലക്ഷത്തിനു മാത്രമേ അര്‍ഹതയുള്ളൂവെന്ന കമ്പനി വാദം കോടതി അംഗീകരിച്ചു. തേര്‍ഡ് പാര്‍ട്ടി ഇന്‍ഷ്വറന്‍സിലെ ഈ അപാകത പരിഹരിക്കാന്‍ കൂടിയാണ് പുതിയ ഇന്‍ഷ്വറന്‍സ്.
