വര്ക്കല: ശിവഗിരിയില് ഭക്തിനിര്ഭരമായ ചടങ്ങുകളോടെ ഗുരുദേവസമാധി ദിനം ആചരിച്ചു. ഗുരുപൂജയിലും ഘോഷയാത്രയിലും പങ്കെടുക്കാനായി നൂറ് കണക്കിന് ഭക്തര് പങ്കെടുത്തു. ചിന്മയാമിഷന് കേരളഘടകം മേധാവി സ്വാമി വിവിക്താനന്ദ സരസ്വതി മഹാസമാധി നവതിയാചരണ സമ്മേളനം ഉദ്ഘാടനം ചെയ്തു.
ഗുരുദേവകൃതികള് സ്വയം പഠിക്കുകയും വരുംതലമുറയ്ക്ക് പകര്ന്നു കൊടുക്കുകയും വേണമെന്ന് അദ്ദേഹം പറഞ്ഞു. ഗുരുവിനെ അറിയുകയെന്നാല് പ്രബുദ്ധത നേടുകയെന്നതാണ്. ഭൗതിക പുരോഗതിക്കൊപ്പം ആധ്യാത്മിക പുരോഗതിയും നാം നേടണം. അതിന് ഗുരുദേവകൃതികള് സഹായകമാണ്. അദ്ദേഹം പറഞ്ഞു.
എസ്എന്ഡിപിയോഗം ജനറല് സെക്രട്ടറി വെള്ളാപ്പള്ളി നടേശന് മുഖ്യപ്രഭാഷണം നടത്തി. ധര്മസംഘവും എസ്എന്ഡിപിയോഗവും സ്ഥാപിച്ചതും അതിന്റെ വളര്ച്ചയ്ക്ക് പിന്നിലെ ശക്തിയും ഗുരുദേവനാണെന്ന് വെള്ളാപ്പള്ളി പറഞ്ഞു. ധര്മസംഘം ട്രസ്റ്റ് പ്രസിഡന്റ് സ്വാമി വിശുദ്ധാനന്ദ അധ്യക്ഷനായി.
ധര്മസംഘം ട്രസ്റ്റ് ജനറല് സെക്രട്ടറി സ്വാമി സാന്ദ്രാനന്ദ, ട്രഷറര് സ്വാമി ശാരദാനന്ദ, സ്വാമി ശിവസ്വരൂപാനന്ദ, സ്വാമി വിശാലാനന്ദ, എംപിമാരായ വി.മുരളീധരന്, എ.സമ്പത്ത്, വി.ജോയി എംഎല്എ., വര്ക്കല നഗരസഭാ ചെയര്പേഴ്സണ് ബിന്ദു ഹരിദാസ് എന്നിവര് സംസാരിച്ചു. ശിവഗിരി ഭരണനിര്വഹണ കാര്യാലയ സമര്പ്പണം സ്വാമി വിശുദ്ധാനന്ദ നിര്വഹിച്ചു. കാര്യാലയം നിര്മിച്ചു നല്കിയ കെ.ജി.ബാബുരാജനെ ചടങ്ങില് അനുമോദിച്ചു.
രാവിലെ നടന്ന ചടങ്ങില് സ്വാമി വിശുദ്ധാനന്ദയും വെള്ളാപ്പള്ളി നടേശനും ചേര്ന്ന് യാഗാഗ്നി ജ്വലിപ്പിച്ച് മണ്ഡലമഹായജ്ഞത്തിന് തുടക്കം കുറിച്ചു. ഗുരുദേവന്റെ സമാധിസമയമായ ഉച്ചക്ക് 3.30ന് സമാധിപൂജ നടന്നു. യജ്ഞശാലയില് നിന്നും സ്വാമി സാന്ദ്രാനന്ദ മഹാസമാധിയിലേക്ക് പൂര്ണകുംഭ കലശപ്രദക്ഷിണ പ്രയാണം നടത്തി.
