ആലപ്പുഴ: മഹാപ്രളയത്തില് രക്ഷാദൗത്യത്തിലേര്പ്പെട്ട മത്സ്യത്തൊഴിലാളികളെ ആദരിക്കുന്ന ചടങ്ങുകള് സര്ക്കാര് രാഷ്ട്രീയ വത്കരിച്ചതായി ധീവരസഭ ജനറല് സെക്രട്ടറി വി. ദിനകരന് പത്രസമ്മേളനത്തില് കുറ്റപ്പെടുത്തി. ഈ സാഹചര്യത്തില് ഇന്നലെ തിരുവനന്തപുരത്ത് നടത്തിയ അനുമോദനയോഗം ധീവരസഭ ബഹിഷ്കരിച്ചെന്നും അദ്ദേഹം പറഞ്ഞു.
അനുമോദനയോഗം നടക്കുന്ന സമയം കരുനാഗപ്പള്ളിയില് പ്രതിഷേധയോഗവും നടത്തി. ഫിഷറീസ് വകുപ്പിന്റെ നിര്ദ്ദേശമില്ലാതെ കഴിഞ്ഞ 16 മുതല് രക്ഷാപ്രവര്ത്തനത്തിനുപോയ മത്സ്യത്തൊഴിലാളികളെ അനുമോദന ചടങ്ങില് നിന്നും ഒഴിവാക്കിയ നടപടി പ്രതിഷേധാര്ഹമാണ്. ഓരോ ജില്ലയില് നിന്നും ചടങ്ങിലേക്ക് മത്സ്യത്തൊഴിലാളികളെ ക്ഷണിച്ചതുപോലും രാഷ്ട്രീയ അടിസ്ഥാനത്തിലാണ്.
മത്സ്യത്തൊഴിലാളികളുടെ രക്ഷാദൗത്യം, പുന്നപ്ര- വയലാര് സമര സേനാനികളുടെ പ്രവര്ത്തനത്തിനു തുല്യമാണെന്ന മന്ത്രി ജി. സുധാകരന്റെ പ്രസ്താവന അവഹേളന പരമാണെന്നും ദിനകരന് കുറ്റപ്പെടുത്തി. മുഖ്യധാരയിലേക്ക് കൊണ്ടുവരുന്നതിനായാണ് മത്സ്യത്തൊഴിലാളികളെ സര്ക്കാര് ആദരിക്കുന്നതെന്ന മന്ത്രി മേഴ്സിക്കുട്ടിയമ്മയുടെ പ്രസ്താവന അപഹാസ്യമാണെന്നും അദ്ദേഹം പറഞ്ഞു.
