കണ്ണൂര്: ഒറ്റമുറിയില് ആറംഗ കുടുംബത്തിന്റെ ദുരിതജീവിതം കണ്ടിട്ടും കണ്ണ് തുറക്കാതെ അധികൃതരുടെ ക്രൂരത. ചെമ്പിലോട് പഞ്ചായത്തിലെ പൂവത്തുംതറയിലെ തൊണ്ണൂറ്റിയഞ്ചുകാരനായ കീരിയോട്ടെ എഞ്ചിനിയര് കുഞ്ഞിരാമന് എന്ന മാവില വീട്ടില് കുഞ്ഞിരാമനും കുടുംബവുമാണ് ഷീറ്റ് കൊണ്ട് മറച്ച ഒറ്റ മുറിയില് വര്ഷങ്ങളായി ദുരിതജീവിതം നയിക്കുന്നത്. എണ്പത് വയസ്സ് കഴിഞ്ഞ ഭാര്യ യശോദയും അസുഖങ്ങളുടെ പിടിയിലായിട്ട് വര്ഷങ്ങളായി. മകള് നിഷയും ഇവരുടെ വിദ്യാര്ത്ഥികളായ രണ്ട് മക്കളും ഇവിടെ തന്നെയാണ് കഴിയുന്നത്. നേരത്തെ ഡ്രൈവര് ജോലി ചെയ്തിരുന്ന കുഞ്ഞിരാമന് പിന്നീട് കൂലിപ്പണിക്ക് പോയിരുന്നു. രോഗാവസ്ഥയില് കഴിയുന്ന കുഞ്ഞിരാമന് വര്ഷങ്ങളായി ജോലിയൊന്നും ചെയ്യാറില്ല. കൂലി വേല ചെയ്ത് കുടുംബം പോറ്റുന്ന മകളുടെ ഭര്ത്താവിന്റെ വരുമാനമാണ് ഇവരുടെ ഏക ആശ്രയം.
നേരത്തെ ഇവര് താമസിച്ചിരുന്ന വീട് പഴകി ദ്രവിച്ച് തകര്ന്നതോടെയാണ് രണ്ട് വര്ഷം മുമ്പ് ഇവര് ഷീറ്റ് കൊണ്ട് മറച്ച ഒറ്റ മുറിയിലേക്ക് താമസം മാറ്റിയത്. അടുക്കളയും കിടപ്പു മുറിയും മക്കളുടെ പഠനവുമെല്ലാം ഈ ഒറ്റ മുറിയാണ്. മൂന്ന് മാസമായി നിര്ത്താതെ പെയ്യുന്ന ശക്തമായ മഴയില് ജീവന് പണയം വെച്ചാണ് ഇവര് കഴിഞ്ഞ് കൂടിയത്. വീടിനോട് ചേര്ന്ന് കിടക്കുന്ന ശൗചാലയം എപ്പോള് വേണമെങ്കിലും തകര്ന്ന് വീഴാറായ അവസ്ഥയിലാണ്. സ്വന്തമായ ഏഴ് സെന്റ് സ്ഥലമുണ്ടെങ്കിലും കടുത്ത ദാരിദ്ര്യത്തില് കഴിയുന്ന ഇവര്ക്ക് സ്വന്തമായി ഒരു വീടെന്നത് ഇപ്പോഴും സ്വപ്നം മാത്രമാണ്. പഞ്ചായത്തിന്റെ സഹായത്തോടെ വീട് ലഭിക്കുന്നതിന് ഇവര് അപേക്ഷ നല്കിയിരുന്നുവെങ്കിലും ഇതുവരെയും പരിഗണിച്ചിട്ടില്ല. കുഞ്ഞിരാമന്റെയും കുടുംബത്തിന്റെയും ദയനീയസ്ഥിതി അറിയുന്ന വാര്ഡ് മെമ്പര് പോലും ഇവരെ സന്ദര്ശിക്കുകയോ കാര്യങ്ങള് അന്വേഷിക്കുകയോ ചെയ്തില്ല. അധികൃതരുടെ അനാസ്ഥയിലും സുമനസ്സുകളുടെ സഹായത്തില് ഇപ്പോള് താമസിക്കുന്ന ഒറ്റമുറിയില് നിന്ന് നല്ല വീട്ടിലേക്ക് താമസം മാറ്റാനാകുമെന്ന പ്രതീക്ഷയിലാണ് ഇവര്.
