തീരരക്ഷാ സേനാ വിഭാഗം നടത്തുന്ന രക്ഷാ പ്രവര്ത്തനം
കൊച്ചി: രാജ്യം മഴക്കെടുതിയില് ദുരിതമനുഭവിക്കുന്ന കേരളജനതയോടൊപ്പം. എല്ലാവിധ സഹായവും നല്കാമെന്ന് പ്രധാനമന്ത്രി നരേന്ദ്ര മോദി ആവര്ത്തിച്ചു.
രാഷ്ട്രപതി രാംനാഥ് കോവിന്ദും ഉപരാഷ്ട്രപതി എം. വെങ്കയ്യ നായിഡുവും കേരള സ്ഥിതിയില് ആശങ്കപ്പെട്ടു. ആവുന്ന എല്ലാ സഹായവും സംസ്ഥാനത്തിന് ഉറപ്പാക്കുമെന്ന് അറിയിച്ചു.
– രാഷ്ട്രപതി കേന്ദ്ര ആഭ്യന്തര മന്ത്രി രാജ്നാഥ് സിങ്ങുമായി സംസാരിച്ചു.
– സൈനിക സഹായം എത്തിക്കാന് നാവികനേയുടെ കൊച്ചിയിലേയും വ്യോമസേനയുടെ തിരുവനന്തപുരത്തെയും വിമാനത്താവളങ്ങള് തുറന്നുകൊടുക്കാന് നിര്ദ്ദേശിച്ചതായി പ്രതിരോധ മന്ത്രി നിര്മ്മല സീതാരാമന് അറിയിച്ചു.
– എല്ലാവിധ സഹായങ്ങളും സംസ്ഥാനത്തിന് നല്കാന് മൂന്ന് സേനാ വിഭാഗങ്ങള്ക്കും മന്ത്രി നിര്ദ്ദേശം നല്കി.
– വ്യാഴാഴ്ച സംസ്ഥാനത്തെ എല്ലാ വിദ്യാഭ്യാസ സ്ഥാപനങ്ങള്ക്കും അവധി പ്രഖ്യാപിച്ചു.
– സര്വകലാശാലകളും ഹയര് സെക്കണ്ടറിയും നടത്താനിരുന്ന എല്ലാ പരീക്ഷകളും മാറ്റി.
– ഒന്നു മുതല് പത്തുവരെ ക്ലാസിലെ ഓണപ്പരീക്ഷ നീട്ടി. പുതുക്കിയ തീയതി പിന്നീടറിയിക്കും.
– ഇടുക്കി ഗാന്ധി നഗറില് ഉരുള്പൊട്ടി; രണ്ട് സ്ത്രീകള് മരിച്ചു.
– ഇടുക്കിയിലേക്ക് വാഹനങ്ങള് കടക്കരുതെന്ന കളക്ടര് അഭ്യര്ഥിച്ചു.
– കുട്ടനാട്ടില് (അപ്പര്-ലോവര് പ്രദേശങ്ങളില്) ജാഗ്രതാ നിര്ദ്ദേശം. ജില്ലാ അധികൃതര് നേവിയുടെ സഹായം തേടി.
– ബംഗാള് ഉള്ക്കടലിലെ ന്യൂന മര്ദ്ദം ശക്തിപ്രാപിച്ചതാണ് ഇപ്പോള് മഴകനക്കാന് കാരണം.
– ശനിയാഴ്ചവരെ തുടരാം. 21 സംസ്ഥാനങ്ങള്ക്ക് കാലാവസ്ഥാ മുന്നറിയിപ്പുണ്ടായിരുന്നു. മറ്റിടങ്ങളില് മഴയുടെ തോത് കുറവായിരുന്നു.
– 27 ഡാമുകള് തുറന്നു.
– മൂന്നാര് ഒറ്റപ്പെട്ടു. വിനോദ സഞ്ചാരികളെ സുരക്ഷിത സ്ഥാനങ്ങളിലേക്ക് മാറ്റി. പുതിയ സഞ്ചാരികള്ക്ക് വിലക്കുണ്ട്.
– മാട്ടുപ്പെട്ടി ഡാമിന്റെ രണ്ട് ഷട്ടറുകള് തുറന്നു. മൂന്നാര് ടൗണിലെ മുപ്പതിലേറെ സ്ഥാപനങ്ങളില് വെള്ളം കയറി മുങ്ങി. പഴയ മൂന്നാറിലെ സര്ക്കാര് സ്കൂള് സമീപത്തെ തൂക്കുപാലം ഒലിച്ചുപോയി.
– കുഞ്ചിത്തണ്ണിയില് ഉരുള്പൊട്ടി വീട്ടമ്മയെ കാണാതായി.
– പാലക്കാട്ട്, മലമ്പുഴ, പോത്തുണ്ടി, മംഗലം ഡാമുകളുടെ ഷട്ടറുകള് കൂടുതല് ഉയര്ത്തി. വാളയാര് ഡാം ഷട്ടര് തുറന്നു. ചുള്ളിയാറും തുറക്കും. കല്പ്പാത്തി പഴയോരത്തെയും പാലക്കാട് നഗരത്തിലെ ചിലയിടങ്ങളും വെള്ളത്തിനടിയിലാണ്.
– മലപ്പുറത്ത് ഉരുള്പൊട്ടി രണ്ടുപേര് മരിച്ചതായി സ്ഥിരീകരിക്കാത്ത റിപ്പോര്ട്ട്.
– ബാണാസുര സാഗര്, കാരാപ്പുഴ ഡാം ഷട്ടറുകള് കൂടുതലുയര്ത്തി.
