കണ്ണൂര്: ജില്ലയുടെ വിവിധ ഭാഗങ്ങളില് ശക്തമായിക്കൊണ്ടിരിക്കുന്ന ജനകീയ സമരങ്ങളെ നിരീക്ഷിക്കാനും ആഭ്യന്തര വകുപ്പിന് വിവരങ്ങള് നല്കാനും ജില്ലയില് പ്രത്യേക രഹസ്യാന്വേഷണ വിഭാഗം. ദേശീയപാത ബൈപ്പാസിനെതിരെ കണ്ണൂര് ജില്ലയില് സിപിഎം പാര്ട്ടി ഗ്രാമമായ കീഴാറ്റൂരിലും തുരുത്തിയിലും നിര്ദ്ദിഷ്ട ജലപാതയ്ക്കെതിരെ പാനൂര് ഭാഗത്തും ബഹുജനസമരം ശക്തമായ സാഹചര്യത്തിലാണ് ഇത് സംബന്ധിച്ച് വിവരം ലഭിക്കുന്നതിന് ആഭ്യന്തര വകുപ്പ് പ്രത്യേക സംവിധാനമേര്പ്പെടുത്തിയത്. ഇതിനായി പോലീസ് സേനയ്ക്കകത്തെ സിപിഎം അനുകൂല സംഘടനയില്പ്പെട്ടവര്ക്ക് തന്നെയാണ് ചുമതല നല്കിയിരിക്കുന്നത്.
പാര്ട്ടിഗ്രാമമായ കീഴാറ്റൂരിലുള്പ്പടെ നേതൃത്വത്തിന്റെ അവഗണനയും ഭീഷണിയും വകവെയ്ക്കാതെ ശക്തമായ ബഹുജനസമരം ഉയര്ന്ന് വന്നത് ആഭ്യന്തരവകുപ്പിനെയും സിപിഎം നേതൃത്വത്തെയും അമ്പരപ്പിച്ചിരുന്നു. നേരത്തെ പാര്ട്ടി ഗ്രാമങ്ങളില് നേതൃത്വത്തിന്റെ ഒത്താശയില്ലാതെ ജനകീയ സമരങ്ങള് ആരംഭിക്കാന് പോലും സാധിക്കുമായിരുന്നില്ല. എന്നാല് കീഴാറ്റൂരില് പാര്ട്ടി പിന്തുണയില്ലെന്നറിയിച്ചിട്ടും ഒരുഘട്ടത്തില് സമരത്തില് പങ്കാളികളായവരെ പാര്ട്ടിയില് നിന്ന് പുറത്താക്കിയിട്ട് പോലും സമരത്തെ പരാജയപ്പെടുത്താന് സാധിച്ചില്ല. സിപിഎം നേതൃത്വത്തിന്റെ ഭീഷണി മറികടന്ന് സമരം ശക്തമാവുകയും ദേശീയ ശ്രദ്ധയാകര്ഷിക്കുകയും ചെയ്തു.
ജനകീയ സമരങ്ങളെ പരാജയപ്പെടുത്താന് സാധിക്കാത്ത സാഹചര്യത്തില് ഇത്തരം സമരങ്ങള്ക്ക് നേതൃത്വം നല്കുന്നവരുടെ പ്രവര്ത്തനങ്ങള് നിരീക്ഷിച്ച് തുടക്കത്തിലേ തടയിടുകയെന്നതാണ് സര്ക്കാര് ലക്ഷ്യമിടുന്നത്. സമരസമിതിയുമായി ബന്ധപ്പെട്ടവരുടെ എല്ലാ നീക്കങ്ങളും കൃത്യമായി വിലയിരുത്തുന്നതിനുള്ള സംവിധാനമുണ്ടാക്കിയിട്ടുണ്ട്. വാര്ത്താസമ്മേളനങ്ങളും മാധ്യമവാര്ത്തകളുമുള്പ്പടെ സമരസമിതിയുടെ എല്ലാ പ്രവര്ത്തനങ്ങളും നിരീക്ഷണത്തിലാണ്.
നിലവിലെ സമരങ്ങളെ പരാജയപ്പെടുത്തുന്നതിനോടൊപ്പം പുതിയ പ്രദേശങ്ങളില് സമരങ്ങള് ആരംഭിക്കാതിരിക്കാനും ആഭ്യന്തരവകുപ്പ് പ്രത്യേക ശ്രദ്ധ ചെലുത്തുന്നുണ്ട്. എന്നാല് രഹസ്യാന്വേഷണ വിഭാഗം സിപിഎം പാര്ട്ടി ഘടകങ്ങളെപ്പോലെ പ്രവര്ത്തിക്കുന്നതിനെതിരെ പോലീസ് സേനയ്ക്കകത്ത് നിന്ന് തന്നെ അമര്ഷം ശക്തമായിട്ടുണ്ട്.
